Read sango Amato 13 Bible Online

Amato 13 - sango bible

Amato 13

¹Molenge ti ndara ama ye so babâ ti lo agboto mê ti lo daa; me molenge ti hengo ndo ake titene a suku na lo.

²Atënë so zo atene alingbi ti sara si lo wara nzoni ye na pekoni; me ti azo ti kango zo, gi nzara ti sarango ngangu na zo laa ayeke na be ti ala.

³Zo so ayeke bata yanga ti lo, lo yeke bata fini ti lo wani; me zo so ayeke diko atënë gbani gbani, lo yeke buba fini ti lo.

⁴Zo ti sopo asara nzara ti ye, me lo yeke wara ni pepe; me azo so ayeke gbu kua ngangu, ala yeke wara aye gbani gbani.

⁵Zo ti mbirimbiri ake tënë ti mvene; me zo ti sioni ayeke bi buba na tere ti azo si lo yeke zia kamene na le ti ala.

⁶Sarango ye ti mbirimbiri ayeke bata zo so dutingo ti lo ayeke na legeni; me siokpari ayeke buba fini ti azo ti sioni.

⁷Ambeni zo asara tere ti ala tongana azo ti mosoro, andaa ala yeke na ye oko pepe. Ambeni zo asara tere ti ala tongana awayere, me ala yeke na ye mingi.

⁸Mosoro ti zo alingbi ti soo fini ti lo; me ti wayere, mbeni zo ti gi lege ti sara sioni na lo ayeke daa pepe.

⁹Zo ti mbirimbiri ayeke tongana lumiere so aza si azo awara ngia; zo ti sioni ayeke tongana lamba so aga nduru ti mingo.

¹⁰Kuru baba ayeke sara si papa alondo; me ndara ayeke ye ti azo ti mango wango.

¹¹Mosoro so zo awara na loro ayeke ninga pepe; me mosoro so zo awara ni kete na kete ayeke wu.

¹²Ye so zo azia be ti lo daa ti ku si asi hio pepe, ye ni asara si be ti lo awoko. Me tongana zo awara ye so lo sara nzara ni, ye ni ayeke ga tongana keke so amu fini na zo.

¹³Zo so abaa wango tongana mbumbuse ye, lo yeke buba fini ti lo wani. Me zo so asara ye alingbi na atënë ti ndia, lo yeke wara nzoni ye ti pekoni.

¹⁴Fango ye ti zo ti ndara ayeke tongana li ti ngu so ayeke mu fini na zo; ayeke sara si zo akpe aye ti sioni so aye ti gbu lo tongana kuku si ayeke fâ lo.

¹⁵Zo ti hingango ndo, be ti azo anzere na lo; me azo ti kango amba ti ala, lege ti ala ague kirikiri.

¹⁶Zo ti hango le ayeke gbu li ti lo kozo titene lo sara mbeni ye; me zo ti buba ayeke fa buba ti lo na le ti azo kue.

¹⁷Sioni zo ti tokua aga na kpale na ndö ti azo; me nzoni zo ti tokua asara si aye akiri aga nzoni.

¹⁸Zo so ake titene a gboto mê ti lo, fade lo yeke ga wayere si azo ayeke baa lo tongana mbumbuse zo; me zo so aye titene a suku na lo, azo ayeke ne lo.

¹⁹Zo kue aye titene ye so ni sara nzara ni, ni wara ni! Ndani laa, be ti azo ti buba ake ti ala ti zia lege ti sioni ye.

²⁰Zo so ayeke fono na azo ti ndara, fade lo yeke ga zo ti ndara; me zo so ayeke sara kamarade na azo ti buba, lo yeke baa sioni daa.

²¹Sioni ye ayeke tumba peko ti azo ti siokpari; ti azo ti mbirimbiri, gi nzoni ye laa ala yeke wara daa.

²²Zo ti nzoni ayeke zia anzoni ye na peko ti kuâ ti lo na *ahale ti lo; me mosoro ti zo ti siokpari ayeke ngba ndali ti azo ti mbirimbiri.

²³Kobe adu gbani gbani na yaka ti awayere; me ambeni akui ndali ti so sarango ye na legeni ayeke daa pepe.

²⁴Zo so ake ti pika molenge ti lo na zaza, andaa lo ye molenge ni pepe; me zo so aye molenge ti lo, lo yeke so ngbonda ti molenge ni hio.

²⁵Zo ti mbirimbiri ayeke te kobe, ya ti lo asi; me zo ti sioni ayeke kui nzara.