Read sango Amato 17 Bible Online

Amato 17 - sango bible

Amato 17

¹Tengo holengo nduru mapa na ndo so siriri ayeke daa ayeke nzoni ahon tengo kobe ti matanga na ya ti da so gba ti tënë asi singo daa.

²Zo ti kua so le ti lo ahan, lo yeke mu ndo ti molenge ti da so azia kamene na le ti azo. Fade zo ti kua ni ayeke wara akungba na peko ti kuâ ti babâ ni legeoko na tanga ti amolenge ni.

³A yeke tara lôro nga na wen ti nginza na ya ti wâ; me KOTA GBIA laa ayeke tara be ti zo.

⁴Zo ti sarango sioni ayeke dingi mê ti lo ti ma gi asioni tënë; zo ti mvene ayeke zia mê ti lo kpoo ti ma gi atënë ti mvene.

⁵Zo so ahe wayere, andaa lo he lo so asara lo. Zo so, tongana mbeni ye ti ngangu asi na mba ti lo si tere ti lo anzere daa, fade a yeke zia peko ni senge na lo pepe.

⁶Ye so ayeke sara nengo ti atara ayeke amolenge ti amolenge ti ala; ye so ayeke sara gonda ti amolenge ayeke ababâ na amama ti ala.

⁷Pendere tënë alingbi na buba zo pepe; âdu ti kota zo, atënë ti mvene alingbi na lo oko pepe.

⁸Ambeni zo abaa ti ala petengo goro tongana waraga so ayeke zi lege na ala; ala baa atene, ndo so kue ala yeke gue daa, aye ti ala kue ayeke ga nzoni.

⁹Zo so ayeke zi tënë na li ti azo, lo yeke gi titene ala ye lo; me zo so ayeke kiri na ndö ti tënë ni, fade amba ti lo ayeke ke lo.

¹⁰Tongana a suku na zo ti hingango ndo fani oko, nzoni ye ti peko ni ayeke daa ahon ti zo ti buba so a pika lo fani ngbangbo oko.

¹¹Zo ti sioni ayeke gi gi lege ti bi wusuwusu; tongaso, fade a yeke tokua asioni ye mingi na ndö ti lo.

¹²Tengbingo tere na mama ti mbeni sioni nyama so a zi amolenge ti lo na tere ti lo, so laa ayeke nzoni ahon tengbingo tere na zo so ahinga ndo pepe si sarango aye ti buba ahon ndö ti lo.

¹³Zo so ayeke kiri sioni ndali ti nzoni, akpale ayeke zia da ti lo laoko pepe.

¹⁴Tongo nda ti papa ayeke tongana zingo lege na kota ngu ti buba ndo; kozo titene tiri aga ngangu, mo zia lege ni!

¹⁵Zo so amu mbeni zo so tënë ayeke na li ti lo tongana zo ti mbirimbiri, lo na zo so amu zo ti mbirimbiri tongana zo so tënë ayeke na li ti lo, ala use kue, be ti KOTA GBIA ake ala mingi.

¹⁶Nginza ayeke sara nyen na maboko ti zo ti buba? Lo ye ti vo na ndara? Ka so li ti lo ayeke daa pepe so!

¹⁷Zo so aye mba ti lo, lo yeke ye lo na ngoi kue. A du ita titene lo mu maboko na ya ti ye ti ngangu.

¹⁸Zo so li ti lo ayeke daa pepe laa ayeke mu zendo ti futa yongo na peko ti mba ti lo.

¹⁹Zo so aye tënë ti papa, andaa lo ye siokpari; zo so azi yanga ti lo ti tene tënë ti baba, gigi ti lo ayeke buba.

²⁰Zo so ayeke na be ti kirikiri, lo yeke baa nzoni pepe; zo so ayeke tene sioni tënë na tere ti amba ti lo, lo yeke ti na ya ti akpale.

²¹Zo so adu molenge so ahinga ndo pepe, lo yeke gi na vundu; ngia atia babâ so molenge ti lo ayeke molenge ti buba.

²²Be ti zo so ayeke na ngia asara si kobela ti lo akai; me be ti zo so ayeke na vundu asara si ngangu atia lo.

²³Zo ti sioni amu goro so a pete na lo na hondengo ni ti sara si mbirimbiri fango ngbanga aduti daa pepe.

²⁴Le ti zo ti hingango ye angba lakue na ndö ti ye ti ndara; me zo so ahinga ndo pepe, le ti lo angba na ndö ti ye so nda ni ayeke daa pepe.

²⁵Molenge so ahinga ndo pepe ayeke zia vundu na be ti babâ ti lo; lo yeke zia mawa na be ti mama ti lo.

²⁶Ti diko lamande na li ti zo ti mbirimbiri ayeke nzoni pepe; ti pika akota zo ayeke na legeni pepe.

²⁷Zo so le ti lo azi, lo yeke diko tënë mingi pepe; zo so aduti gi kpoo ayeke zo ti hingango ndo.

²⁸Ataa zo ti buba, tongana lo duti kpoo, azo alingbi ti baa lo tongana zo ti ndara; tongana lo zi yanga pepe, azo alingbi ti baa lo tongana zo ti hingango ndo.