Read sango Amato 18 Bible Online

Amato 18 - sango bible

Amato 18

¹Zo so aye ti duti gi lo oko, lo yeke gi gi nzoni ti lo wani. Tongana a ye ti mu na lo wango, lo yeke sara ngonzo.

²Mango ya ti ye anzere na zo ti buba pepe; me lo ye ti fa na le ti azo kue gi atënë ti be ti lo.

³Tongana sioni zo aga, bango mba tongana mbumbuse zo nga aga; tongana zonga aga, kamene nga aga.

⁴Nda ti atënë ti zo ali tongana kota ngu; atënë ni ayeke tongana ngu so ayeke sua, tongana li ti ngu so ayeke mu ndara na zo.

⁵Tongana zo ake ti fâ ya ti ngbanga ti zo ti mbirimbiri si lo mu gi mbage ti zo ti sioni, so ayeke nzoni pepe.

⁶Atënë ti zo ti buba ayeke sara si tiri alondo; atënë ti yanga ti lo ayeke pusu azo ti pika tere.

⁷Tënë ti zo ti buba ayeke buba fini ti lo wani; atënë ti yanga ti lo aga kuku ndali ti lo wani.

⁸Atënë ti mvene so zo adu na iri ti mba ti lo ayeke tongana mbeni nzerengo kobe; atënë ni ayeke li zo ngbii asi na be ti lo.

⁹Zo so asara sopo na kua ti lo, lo yeke ita ti zo so abuba kua ni.

¹⁰KOTA GBIA ayeke tongana ngangu gbagba na tere ti azo; zo ti mbirimbiri ayeke kpe na ya ni ti bata tere ti lo.

¹¹Ti zo ti mosoro, mosoro ti lo ayeke tongana ngangu gbagba ti batango lo. Na ya ti gbungo-li ti lo, lo baa lo tene, mosoro ni ayeke tongana ngangu gbagba na tere ti lo.

¹²Kozo titene zo ati biani biani, be ti lo asi singo na baba. Kozo titene zo awara gonda, ayeke nzoni lo sara tere ti lo kete si.

¹³Zo so akiri tënë hio kozo titene lo ma tënë nzoni, lo yeke fa buba ti lo na gigi si lo yeke zia kamene na le ti lo wani.

¹⁴Zo so nzara ti be ti lo ayeke ti ngba na fini, fade lo yeke hon ndö ti kobela so ayeke sara lo. Me tongana be ti lo awoko, zo wa laa ayeke kiri ti mu ngangu na lo, zo wa?

¹⁵Zo ti gbungo-li ayeke gi lege ti hinga ye; zo ti ndara ayeke gi lege ti ma atënë so ayeke fa ye na lo.

¹⁶Akadoo ayeke zi yanga-da kota na zo; ayeke sara si lege azi na lo ti baa akota zo.

¹⁷Zo so amu tënë kozo na le ti ngbanga, azo abaa atene, atënë ti lo ayeke na legeni; me tongana mbeni zo nde aga, atënë ti lo ayeke gue nde na ti kozo zo ni.

¹⁸Azo ayeke bi ka *dee ti kai na papa; ala yeke bi nga ni ti fâ ngbanga na popo ti angangu zo.

¹⁹Ayeke ngangu ti ga nduru na tere ti mbeni ita so be ti lo aso tongana ti so ayeke ngangu ti li na ya ti mbeni gbata so ngangu gbagba ayeke na tere ni. Atënë ti papa ayeke tongana ngbongboro wen so a yeke kanga na yanga-da ti kota zo.

²⁰Zo alingbi ti wara kobe ti yanga ti lo na lege ti atënë ti lo; atënë so lo tene alingbi ti sara si ya ti lo asi.

²¹Zo alingbi ti ngba na fini wala ti kui na lege ti atënë ti yanga ti lo. Zo so aye tënë, fade lo yeke wara ye ti peko ni.

²²Zo so awara wali, andaa lo wara nzoni ye; so nzoni be laa KOTA GBIA asara na lo.

²³Wayere ayeke tene tënë na vorongo tere; me zo ti mosoro ayeke kiri tënë ngangu ngangu.

²⁴Zo so ayeke na gba ti akamarade, ye so alingbi ti ga kota kungba na ndö ti lo; me taa kamarade ayeke sara na mo ahon ita ti mo.