Read sango Amato 19 Bible Online

Amato 19 - sango bible

Amato 19

¹Wayere so fini ti lo ayeke na legeni, lo yeke nzoni lo hon zo ti buba so ayeke tene gi atënë ti mayere.

²Tongana zo agbu li ti lo pepe, so ayeke nzoni pepe. Zo so ayeke sara ye na loro na loro, gbaa lo yeke sara ye ti kirikiri.

³Sarango ye ti buba ayeke buba gigi ti zo; na pekoni, be ti lo aso na KOTA GBIA.

⁴Mosoro ti zo asara si azo so aye lo awu wungo; me ti wayere, ataa zo oko so aye lo, ayeke do lo ti zia.

⁵Zo so atene mvene na le ti ngbanga, fade pekoni ayeke ngba na lo senge pepe; zo so atene mvene, lo nga lo yeke sigigi na ya ti ngbanga pepe.

⁶Azo mingi ayeke tene anzerengo tënë ti handa na akota zo; azo kue aye tënë ti zo so ayeke mu kadoo na azo.

⁷A-ita ti wayere kue ayeke ke lo; ti akamarade ti lo, ye ni ahon ndoni: ala yeke kpe lo kpengo. Tongana lo ye ti tene tënë na ala, andaa peko ti ala ayo awe.

⁸Zo so ayeke manda ti gbu li ti lo nzoni, lo yeke sara nzoni na lo wani; zo so asara ngangu kue ti hinga ndo, lo yeke baa nzoni daa.

⁹Zo so atene mvene na le ti ngbanga, fade pekoni ayeke ngba na lo senge pepe. Zo so atene mvene, ti lo ahunzi awe.

¹⁰Titene zo ti buba aduti na gba ti apendere ye, so alingbi na lo pepe; titene ngbaa ayeke sara komandema na ndö ti amakonzi, so alingbi nga kete pepe.

¹¹Zo ti hingango ndo ayeke sara ngonzo hio hio pepe; tongana azo asara sioni na lo si lo baa ni tongana ye pepe, tongaso laa lo yeke ne tere ti lo.

¹²Ngonzo ti gbia ayeke tongana toto ti bamara; me nzoni be ti lo ayeke tongana ngu ti ndö ti pere.

¹³Molenge ti buba ayeke ga na kpale na ndö ti babâ ti lo. Wali so aye tënë ti papa, lo yeke tongana li ti da so akoro si ngu ayeke yuru daa lakue.

¹⁴Na peko ti kuâ ti ala, ababâ ayeke zia da na nginza na amolenge ti ala, me KOTA GBIA laa ayeke mu wali ti ndara na zo.

¹⁵Sopo ayeke sara si zo ati na ya ti kota lango; zo so asara kua pepe, nzara ayeke fâ lo.

¹⁶Zo so ayeke sara ye alingbi na atënë ti ndia, lo yeke bata fini ti lo. Zo so ayeke bata lege ti dutingo ti lo pepe, fade lo yeke kui.

¹⁷Zo so abaa mawa ti wayere, andaa boon laa zo ni asara na KOTA GBIA; fade KOTA GBIA ayeke kiri peko ni na lo.

¹⁸So ngoi angba titene mo mu maboko na molenge ti mo, ayeke nzoni mo pika lo na zaza. Me ngonzo ague na mo ngbii titene mo fâ lo pepe.

¹⁹Zo so be ti lo wâ wâ, alingbi lo futa mbeni lamande. Tongana a diko lamande na li ti lo pepe, andaa a yeke pusu lo ti kiri ti sara ngonzo.

²⁰Mo ma awango, mo yeda na aye so a yeke fa na mo; na ndani, fade mo yeke ga zo ti ndara.

²¹Apialo asi singo na ya ti be ti zo; me ye so KOTA GBIA aleke na be ti lo ti sara, ni laa ayeke si.

²²Ye so a yeke ku na mbage ti zo ayeke sarango nzoni be. Dutingo wayere ayeke nzoni ahon dutingo zo ti mvene.

²³Kpengo mbeto ti KOTA GBIA asara si zo aduti na fini; zo so asara ni, fini ti lo ayeke si singo na anzoni ye si sioni ye oko ayeke si na lo pepe.

²⁴Zo ti sopo ayeke yoro maboko ti lo na ya ti sembe ti kobe, me lo yeke kiri na maboko ni na yanga ti lo pepe.

²⁵Mo pika zo ti hengo ndo, tongaso si zo so li ti lo ayeke daa pepe so, le ti lo ahan. Mo suku na zo ti hingango ndo, fade lo yeke hinga ye ahon ti kozo.

²⁶Molenge so asara ngangu na babâ ti lo si lo tumba mama ti lo, lo yeke molenge so azia kamene na le ti azo si lo bi buba na tere ti ala.

²⁷Molenge ti mbi, tongana mo ye ti ma wango pepe, mo do lege ti mandango ye, mo zia ma!

²⁸Mbumbuse zo so a iri lo ti fa na gbe ti ngbanga peko ti ye so lo baa, fade lo yeke he fango ngbanga ti mbirimbiri hengo. Gi sarango asioni ye laa anzere na be ti azo ti sioni.

²⁹A leke ngbanga ndali ti azo ti hengo ndo; pika ayeke ku ngbonda ti azo ti buba kungo.