Read sango Amato 2 Bible Online

Amato 2 - sango bible

Amato 2

¹Molenge ti mbi, yeda na atënë ti mbi; bata andia ti mbi nzoni tongana ti so zo ayeke bata ye ti ngangu ngere.

²Dingi mê ti mo, mo ma atënë ti ndara, gi lege ngangu ti ma ya ni.

³Biani, gi hingango ye; sara ngangu ti wara hingango ndo!

⁴Gi ndara tongana ti so zo ayeke gi nginza; gi ni ngangu tongana ti so zo ayeke gi mbeni mosoro so ahonde.

⁵Tongana mo sara tongaso, fade mo yeke hinga nda ti kpengo mbeto ti KOTA GBIA, mo yeke wara lege ti hinga Nzapa.

⁶KOTA GBIA laa ayeke mu ndara na zo; hingango ye na hingango ndo alondo na lo.

⁷KOTA GBIA ayeke bata anzoni ye ndali ti azo ti mbirimbiri; lo yeke tongana *vala ndali ti azo so sarango ye ti ala ayeke na legeni.

⁸Lo yeke bata azo so ayeke sara ye na lege ti ndia; lo yeke bata lege ti azo so abata be ti ala kue na lo.

⁹Molenge ti mbi, tongana mo ma mbi, fade mo yeke hinga, mo tene, sarango ye ti mbirimbiri, sarango ye na lege ti ndia na sarango ye na legeni ayeke sara si zo abaa nzoni daa.

¹⁰Fade ndara ayeke li na ya ti be ti mo, hingango ye ayeke zia ngia na be ti mo.

¹¹Nzoni gbungo-li ayeke sara si sioni ye awara mo pepe, hingango ndo ayeke bata mo.

¹²Aye use so ayeke sara si mo kpe lege ti sioni sarango ye; ala yeke zi mo na maboko ti azo ti tenengo mvene;

¹³ala yeke zi nga mo na maboko ti azo so azia lege ti mbirimbiri titene ala mu lege so avuko.

¹⁴Be ti azo ni ayeke na ngia na sarango sioni; tere ti ala anzere na asioni sarango ye ti kirikiri.

¹⁵Lege ti sarango ye ti ala ayeke kirikiri si lege so ala mu aba bango.

¹⁶Tongaso, mo yeke kpe lege ti wali so ayeke ti mo pepe, wali wande so ayeke tene anzerengo tënë.

¹⁷Lo do koli ti lo ti maseka, lo zia; tongaso lo buba lege ti *mbuki na Nzapa ti lo.

¹⁸Sioni dutingo ti lo ayeke gue na lo na kuâ; alege ti sarango ye ti lo ayeke gue na lo na ndo ti akuâ.

¹⁹Azo so kue ague na ndo ti lo ayeke kiri pepe; lege so ayeke gue na zo na fini, ala yeke wara ni mbeni pepe.

²⁰Tongaso, ayeke nzoni mo mu lege ti dutingo ti azo ti nzoni; mo sara ye tongana ti azo ti mbirimbiri.

²¹Biani, fade azo ti mbirimbiri ayeke lango na ya ti kodro so; azo so dutingo ti ala ayeke na legeni ayeke ngba daa.

²²Me ti azo ti sioni, a yeke zi ala na ya ti kodro ni; azo ti handango amba ti ala, a yeke tumba ala daa.