Read sango Amato 24 Bible Online

Amato 24 - sango bible

Amato 24

¹Sara kota be na tere ti azo ti sioni pepe; mo gi lege ti sara kamarade na ala pepe.

²Biani, ala yeke gbu li ti ala gi ti buba ndo; ala yeke tene gi tënë ti asioni ye so ala ye ti sara.

³Na lege ti ndara si zo ayeke sara da; da ni ayeke luti mbirimbiri na lege ti hingango ndo ti lo;

⁴na lege ti hingango ye si ya ti akubu ti da ni asi singo na aye ti ngangu ngere nga na apendere ye.

⁵Zo ti ndara ayeke ngangu zo; zo ti hingango ye asara titene ngangu ti lo akiri akono ahon ti kozoni.

⁶Kozo titene mo londo ti gue na bira, ayeke nzoni mo leke gere ni nzoni si. Ndali ti gba ti awamungo-wango si kodro ayeke sigigi na ya ti akpale.

⁷Ayeke ngangu na zo ti buba ti ma ya ti atënë ti ndara. Na ndo so azo ayeke leke ka atënë daa, alingbi lo zi yanga oko pepe!

⁸Zo so ayeke gbu li ti lo lakue ti sara sioni ye, a yeke iri lo “zo ti mayere”.

⁹Ye so zo ti buba agbu li ti lo daa ayeke lakue gi siokpari; zo ti hengo ndo, be ti azo ake lo mingi.

¹⁰Tongana be ti mo awoko na lango so ye ti ngangu asi na mo, andaa ngangu ti mo ayeke kete biani!

¹¹Azo so a fâ ngbanga ti kuâ na li ti ala, mo zi ala na ya ti kuâ ni; azo so a gboto ala ti gue na ala ti fâ ala senge senge, mo soo ala.

¹²Mo lingbi ti tene: “Mbi hinga fade pepe!” Me lo so abaa atënë ti be ti zo, lo yeke hinga ni senge. Lo yeke baa mo, lo hinga ye kue; fade lo yeke futa zo oko oko alingbi na ye so lo sara!

¹³Molenge ti mbi, mo su mafuta ti wotoro, ngbanga ti so ayeke sara nzoni na mo; fade ayeke nzere na yanga ti mo.

¹⁴Me alingbi mo hinga nzoni so, fade ndara ayeke duti legeoko tongaso ndali ti mo! Tongana mo yeke na ni, fade ye ayeke ga nzoni ndali ti gigi ti mo ti kekereke si ye so mo zia be ti mo ti ku, mo yeke ku ni gbaa pepe.

¹⁵Mo zo ti sioni, mo honde tere ti mo pepe titene mo buba da ti zo ti mbirimbiri; aye so ayeke na ndo ti lango ti lo, mo nzi ni pepe.

¹⁶Biani, zo ti mbirimbiri alingbi ti ti fani mbarambara, me fade lo yeke londo. Azo ti sioni ayeke ti ti ala biani biani na ya ti kpale.

¹⁷Tongana wato ti mo ati, mo duti na ngia ndali ni pepe; tongana lo ti na ya ti kpale, mo huru na ngia pepe.

¹⁸Tongaso pepe, fade KOTA GBIA ayeke baa ye so mo sara so na sioni le si lo yeke zia lege ti sarango ngonzo na tere ti wato ti mo.

¹⁹Azo ti sarango sioni, mo sara ngonzo na tere ti ala pepe; mo sara kota be na tere ti azo ti sioni pepe.

²⁰Mbeni nzoni ye ndali ti gigi ti ala ti kekereke ayeke daa pepe; fini ti ala ayeke tongana lamba so ayeke mingo.

²¹Molenge ti mbi, mo kpe mbeto ti KOTA GBIA nga na ti gbia ti kodro. Azo so aye titene ye kue aga nde so, mo na ala aduti na ndo oko pepe.

²²Biani, ye ti ngangu alingbi ti ga na ndö ti ala gi hio tongaso. Zo wa laa ahinga kpale so KOTA GBIA na gbia ti kodro alingbi ti tokua na ndö ti ala?

²³Ambeni tënë so azo ti ndara akiri atene ayeke so: Mungo mbage ti zo na le ti ngbanga ayeke nzoni pepe.

²⁴Tongana mbeni wafango-ngbanga atene na zo so tënë ayeke na li ti lo, atene: “Tënë ayeke na li ti mo pepe”, azo ti kodro ayeke deba wafango-ngbanga ni; amara ayeke ke lo.

²⁵Me azo so ayeke fâ ngbanga na li ti zo ti sioni so, azo ayeke sara tufa na ndö ti ala si ala yeke duti nzoni na gigi ti ala.

²⁶Zo so akiri tënë na lege ti taa-tënë na mba ti lo, lo yeke biani zo ti yengo zo.

²⁷Mo sara akua ti mo so ayeke na gigi; mo fâ nga yaka ti mo ti ku na lango ti fango ale ti kobe kozoni si mo to nda ti sara da ti mo.

²⁸Mo bi tënë na li ti mba ti mo senge senge pepe. Mo ye ti handa ndo na lege ti atënë ti yanga ti mo?

²⁹Mo tene pepe: “Ye so lo sara na mbi so, mbi yeke sara gi ni na lo; mbi yeke kiri na zo peko ti ye so lo sara na mbi so!”

³⁰Mbeni lâ, mbi hon na tere ti yaka ti mbeni zo ti sopo; mbi hon na tere ti yaka ti *vinye ti mbeni zo so li ti lo ayeke daa pepe.

³¹Mbi baa so, akamba ti ki na asioni pere amu le ti yaka ni kue; gbagba so a sara na tere ti yaka ni atuku kue na sese.

³²Mbi gbu li ti mbi na ndö ti ye so mbi baa so; na pekoni, ye so mbi manda daa ayeke so:

³³Mo ye ti lango kete si, le ti mo aye ti ne na lango kete si, mo ye ti kanga maboko ti mo kete si, mo ye ti lango na sese kete si.

³⁴So mo ngba ti sara tongaso, yere ayeke ga na ndö ti mo tongana zo so ayeke fono senge senge; pasi ayeke ga na ndö ti mo tongana zo ti gbungo ye ti azo na ngangu.