Read sango Amato 25 Bible Online

Amato 25 - sango bible

Amato 25

¹So ayeke ambeni *mato ti Salomon so azo ti tere ti Ezekias, gbia ti Juda, asu na mbeti.

²Gonda ti Nzapa ayeke ti honde aye; gonda ti agbia ayeke ti gi nda ti aye.

³Ndo so le ti nduzu ague ngbii aluti daa, ndo so sese ali ngbii aluti daa, zo agi nda ni gbaa. Legeoko nga, zo alingbi ti gi nda ti atënë ti be ti gbia pepe.

⁴Zi zende na tere ti wen ti nginza si fade zo ti sarango aye ti kode alingbi ti sara na mbeni ye ti pendere.

⁵Zi azo ti sioni na tere ti gbia si fade lengo-gbia ti lo akpengba na lege ti sarango ye ti mbirimbiri.

⁶Mo pika kate ti mo na le ti gbia pepe; mo mu ndo ti akota zo pepe.

⁷Tongana a tene na mo: “Ga mo duti na li ni ge”, so laa ayeke nzoni ahon titene a zia mo na peko kâ na dawa ti mbeni kota zo.

⁸Ye so mo baa na le ti mo, mo mu tënë ni hio ti gue na ni na gbe ti ngbanga pepe. Tongaso pepe, tongana zo so tënë ni abaa lo ague, abi kamene na le ti mo, fade mo yeke kiri ti sara nyen?

⁹Tongana mo na mba ti mo awara tënë, ayeke nzoni mo na lo aleke tënë ni; me tënë so mbeni zo atene na mo na hondengo ni, mo sigigi na ni pepe.

¹⁰Tongaso pepe, tongana zo ni ama so mo sigigi na tënë ni, lo yeke zonga mo si abuba tënë so mo tene ayeke ngba ti gue.

¹¹Tënë so zo atene si alingbi taa na ngoi ni ayeke tongana aye ti pendere so a sara na lôro si a zia alimo so a sara na wen ti nginza daa.

¹²Wango so zo ti ndara amu na azo so azia mê ti ala kpoo ti ma tënë ayeke tongana bage ti lôro nga na ye ti go ti lôro ti nzoni ni.

¹³Na ngoi ti fango ale ti kobe, ngu ti de ayeke sara si tere ti zo ade nzoni. Legeoko nga, zo ti tokua so asara kua ti lo na legeni ayeke de be ti zo ti tokuango lo.

¹⁴Zo so amu zendo ti mu mbeni nzoni ye na mba ti lo si lo mu ni pepe, lo yeke tongana mbinda na pupu so ayeke ga, me aga na ngu-Nzapa pepe.

¹⁵Na lege ti kangango be ti ku, zo alingbi ti woko be ti mbeni wafango-ngbanga ti yeda na mbeni tënë. Atënë so ayeke de be ti zo alingbi ti zi angangu ye so ayeke kanga lege.

¹⁶Tongana mo wara mafuta ti wotoro, mo su ni alingbi na mo; tongana mo su ahon ndoni, fade mo yeke de ni kue.

¹⁷Mo gue na ndo ti mba ti mo lakue lakue pepe, tongaso pepe, fade mo yeke fun sen na hon ti lo si lo yeke ke mo.

¹⁸Zo so atene mvene na tere ti mba ti lo na le ti ngbanga, lo yeke tongana kota martoo, wala yongoro zeme, wala le ti kokora so yanga ni aza.

¹⁹Na ndembe ti ye ti ngangu, ziango be na ndö ti zo ti kango amba ti lo ayeke tongana tengo kobe na apembe so afun, wala lutingo na ndö ti gere so abuba awe.

²⁰Hengo bia na mê ti zo so be ti lo ayeke na vundu ayeke tongana ti so zo azi bongo na tere ti lo na ngoi ti de, wala tongana ti so zo azia kpingo vin na le ti ka.

²¹Tongana nzara asara wato ti mo, mo mu na lo kobe lo te; tongana nzara ti ngu asara lo, mo mu na lo ngu, lo nyon.

²²Tongana mo sara tongaso, ye ni ayeke tongana ale ti wâ laa mo zia na li ti lo, tongaso fade KOTA GBIA ayeke kiri peko ni na mo.

²³Tongana ti so pupu ti Banga ayeke ga na ngu-Nzapa, tenengo sioni tënë na hondengo ni na tere ti zo asara si ngonzo ti lo alondo.

²⁴Ti lango na gigi na gbe ti mbeni gbefa ayeke nzoni ahon ti lango na ya ti da oko na wali so aye tënë ti papa mingi.

²⁵Nzoni sango so alondo na yongoro ndo si aga ayeke tongana ngu ti de ndali ti zo so nzara ti ngu ahon ndö ti lo.

²⁶Zo ti mbirimbiri so awoko tere ti lo na dawa ti zo ti sioni ayeke tongana li ti ngu nga na du ti ngu so azende ayeke daa.

²⁷Sungo mafuta ti wotoro gbani gbani ayeke nzoni pepe; gingo lege ti duti na gonda gbani gbani ayeke nga nzoni pepe.

²⁸Zo so ayeke ngangu na lo titene lo kanga ngonzo ti lo, lo yeke tongana mbeni gbata so ngangu gbagba ayeke na tere ni pepe.