Read sango Amato 27 Bible Online

Amato 27 - sango bible

Amato 27

¹Pika kate ti mo ndali ti ye ti kekereke pepe, ngbanga ti so ye so ayeke si laso, mo de ti hinga ni pepe.

²Mo zia mbeni zo nde agonda mo; mo zia wande si asara ni, me mo wani pepe!

³Têne na mbutu ane; me ngonzo ti zo so li ti lo ayeke daa pepe ane ahon aye use so kue.

⁴Ngonzo ti wâ ayeke sioni mingi, ngonzo ayeke buba ye mingi; me zo wa laa alingbi ti luti na le ti mbanda ti zo?

⁵Sukungo na zo na le ti lo ayeke nzoni ahon yengo tere so ahonde le ni hondengo.

⁶Titene mbeni zo so mo na lo aye tere mingi aso be ti mo, so laa ayeke nzoni ahon titene mbeni wato asu ngbangba ti mo gbani gbani.

⁷Zo so ya ti lo asi awe, ataa mafuta ti wotoro, lo yeke ke ni; me zo so nzara asara lo, ataa kobe asee tongana nyen, kobe ni ayeke nzere na yanga ti lo.

⁸Zo so azia kodro ti lo ti hon na ando kirikiri, lo yeke tongana ndeke so azia da ti lo ti hon na ando kirikiri.

⁹Mafuta na yombo ayeke zia ngia na be ti zo; me zo so aye mo si be ti lo awoko na mo, so laa ayeke nzoni ahon wango so mo mu na mo wani.

¹⁰Zo so mo na lo aye tere, wala zo so babâ ti mo na lo aye tere, mo zia lo pepe. Tongana mbeni ye ti ngangu asi na mo, mo gue na ndo ti ita ti mo pepe. Zo so ayeke nduru na mo ayeke nzoni ahon ita ti mo so ayeke na yongoro ndo.

¹¹Molenge ti mbi, mo duti na ndara si fade be ti mbi aduti na ngia. Tongana mbeni zo akasa mbi, fade mbi yeke wara lege ti kiri tënë na lo.

¹²Zo ti hango le, tongana lo baa sioni ye ayeke ga, lo yeke honde tere ti lo. Ti azo so le ti ala ahan pepe, ala yeke hon ti ala hongo; tongaso, ala yeke wara ye ti pekoni.

¹³Tongana mbeni zo aga abaa mo titene mo sara boon na mbeni wande, alingbi mo mu bongo ti zo so aga abaa mo so; mo bata bongo ni, ngbanga ti so lo mu zendo ti sara boon na mbeni wande.

¹⁴Zo so aga na kota ndaperere si abara mba ti lo na kota go, fade barango ndo ti lo ni ayeke duti tongana zongango ndo.

¹⁵Wali so aye tënë ti papa, lo yeke tongana li ti da so akoro si ngu-Nzapa so apika ayeke yuru daa lakue.

¹⁶Zo so aye ti kanga lege na lo ayeke tongana zo so aye ti kanga lege na pupu wala ti gbu mafuta na ya ti maboko ti lo.

¹⁷A yeke mu wen ti sara na yanga ti wen titene aza; titene zo aga nzoni, ayeke nzoni lo ga nduru na amba ti lo.

¹⁸Zo so abata keke ti fige ti lo nzoni, fade lo yeke te ale ni. Zo ti kua so abata wa ti lo nzoni, fade azo ayeke ne zo ti kua ni.

¹⁹Tongana ti so zo ayeke baa le ti lo wani na ya ti ngu, a yeke hinga tënë so ayeke na be ti zo gi na ndö ti le ti lo.

²⁰Ndo ti akuâ na *kota du so alinda mingi, ya ni asi laoko pepe. Legeoko nga, nzara ti warango ye ayeke hunzi na be ti zo laoko pepe.

²¹A yeke tara lôro na wen ti nginza na ya ti wâ; me ye so a yeke hinga zo na ni ayeke nzoni tënë so azo ayeke tene na ndö ti lo.

²²Ataa mo pika zo ti buba na ya ti kpu tongana ti so a yeke pika ale ti kobe, mo yeke sara gbaa, asarango ye ti buba ti lo ayeke ngba lakue na tere ti lo.

²³Ayeke nzoni mo hinga dutingo ti ataba na angasa ti mo nzoni; mo bata anyama ti mo nzoni.

²⁴Biani, mosoro ayeke ngba lakue pepe; kpoto ti gbia alondo na babâ ti si na molenge wala na ata ti lo pepe.

²⁵Mo fâ apere ti yaka si na ndembe so afini pere ayeke sigigi, ayeke nzoni mo ro aholengo pere so ayeke na ndö ti ahoto.

²⁶Mo bata ataba titene mo mu kua ti tere ti ala mo leke na bongo ti yungo ni; mo bata akoli-ngasa ti vo na yaka.

²⁷Na lege ti angasa ti mo, mo yeke wara ngu ti me gbani gbani titene aga kobe ti mo, ti azo ti sewa ti mo na ti azo ti kua ti mo ti wali.