Read sango Amato 28 Bible Online

Amato 28 - sango bible

Amato 28

¹Zo ti sioni ayeke kpe, ataa zo oko atumba peko ti lo pepe; me zo ti mbirimbiri ayeke tongana bamara so ayeke na mbeto oko pepe.

²Tongana wusuwusu ayeke na ya ti kodro, amakonzi ayeke daa mingi; me tongana gbia ti kodro ayeke zo ti hingango ye si lo yeke na ndara, fade kodro ni ayeke duti kpoo si aluti mbirimbiri.

³Mbeni kota zo so ye atia lo si lo yeke sara ngangu na awayere, lo yeke tongana ngu-Nzapa so abuba kobe ti yaka kue.

⁴Azo so azia lege ti *Ndia, ala yeke gonda azo ti sioni; me azo so abata lege ti Ndia, ala yeke kanga lege na azo ti sioni ni.

⁵Azo ti sioni ahinga nda ti sarango ye ti mbirimbiri oko pepe; me azo so ayeke gi KOTA GBIA, ala hinga nda ni kue.

⁶Wayere so ayeke sara ye na legeni, lo yeke nzoni lo hon zo so sarango ye ti lo ayeke kirikiri, ataa lo yeke zo ti mosoro.

⁷Molenge so ayeke sara ye alingbi na Ndia, lo yeke zo ti hingango ye; me lo so lo yeke mu peko ti azo ti sarango ye ti kamene, lo yeke zia kamene na le ti babâ ti lo.

⁸Mbeni zo aye ti ga zo ti mosoro; lo yeke sara boon ti nginza na azo titene azo ni azia gba ti nginza na ndö ni si akiri na ni na lo. Me fade mosoro ni so ayeke gue na maboko ti zo so ayeke baa mawa ti awayere.

⁹Zo so akanga mê ti lo ti ma atënë ti Ndia, ataa sambela ti lo, be ti KOTA GBIA ayeke ke ni.

¹⁰Zo so asara si azo ti mbirimbiri amu sioni lege, fade lo yeke ti na ya ti kuku ti lo wani. Me azo so sarango ye ti ala ayeke na legeni, ye so ayeke ga ti ala ayeke nzoni duti.

¹¹Zo ti mosoro abaa tere ti lo tongana zo ti ndara; me wayere so ahinga ndo, fade lo yeke hinga nda ti zo ti mosoro ni.

¹²Tongana azo ti mbirimbiri abaa nzoni, kota ngia ayeke daa; me tongana azo ti sioni asi na kota ndo, azo kue ayeke honde tere ti ala.

¹³Zo so ahonde asioni ti lo, aye ti lo ayeke ga nzoni pepe; me zo so afa ni na gigi si lo zia lege ni, fade Nzapa ayeke sara nzoni be na lo.

¹⁴Ti lo nzoni, zo so akpe lakue mbeto ti sarango sioni ye! Me zo so akpengba be ti lo, fade lo yeke ti na ya ti kpale.

¹⁵Sioni makonzi so asara ngangu na azo ti kodro so ayeke na ya ti mawa, lo yeke tongana bamara so atoto, wala tongana sioni nyama so ahuru ti gbu nyama.

¹⁶Makonzi so ahinga ndo pepe, kua ti lo gi ti mu ye ti azo na ngangu. Me zo so be ti lo ake tënë ti warango ye na lege ti nzi, fade gigi ti lo ague, ayo.

¹⁷Zo so ngbanga ti kuâ ti mbeni zo ayeke na li ti lo, lo yeke kpe ngbii ti li na da ti kanga; ayeke nzoni zo oko akanga lege na lo pepe.

¹⁸Zo so ayeke sara ye na lege ti taa-tënë, fade lo yeke soo kuâ; me zo so ayeke sara ye ge nde si lo yeke sara kâ nde, oko ti asarango ye ni ayeke sara si lo ti.

¹⁹Zo so ayeke fâ yaka, fade lo yeke na gba ti kobe; me zo so ayeke tumba peko ti asenge senge ye, yere ayeke hon ndö ti lo.

²⁰Zo so abata tënë ti yanga ti lo, fade a yeke sara tufa gbani gbani na ndö ti lo; me zo so aye ti ga zo ti mosoro na loro, a yeke zia peko ni na lo senge pepe.

²¹Mungo mbage ti mbeni zo oko ayeke nzoni pepe. Gi ndali ti kete nduru mapa, ambeni zo ayeke sara mara ti siokpari so.

²²Zo so be ayeke sara lo, lo yeke kpe kpengo na peko ti mosoro; me lo hinga pepe atene, fade yere ayeke ti na ndö ti lo.

²³Zo so asuku na amba ti lo, mbeni lâ, ala yeke baa so nzoni ye laa lo sara na ani; zo ni ayeke nzoni ahon zo so atene anzerengo tënë ti handa na zo.

²⁴Zo so anzi babâ na mama ti lo si lo tene: “So siokpari laa pepe”, zo ni ayeke legeoko na zo ti fango zo!

²⁵Zo so kota be ahon ndö ti lo, lo sara si papa alondo; me zo so azia be ti lo na ndö ti KOTA GBIA, fade lo yeke duti na aye gbani gbani.

²⁶Zo so ayeke zia be ti lo na ndö ti gbungo-li ti lo wani, lo yeke zo ti buba; me zo so ayeke sara ye na lege ti ndara, fade lo yeke sigigi na ya ti kuâ.

²⁷Zo so ayeke mu ye na awayere, fade ye ayeke tia lo pepe; me zo so ayeke baa ndo na ala pepe, azo mingi ayeke deba lo.

²⁸Tongana azo ti sioni asi na kota ndo, azo kue ayeke honde tere ti ala. Tongana azo ti sioni ni akui, azo ti mbirimbiri ayeke ga gbani gbani.