Read sango Amato 29 Bible Online

Amato 29 - sango bible

Amato 29

¹Zo so a gboto mê ti lo si lo ngba ti sara ngangu li, fade a yeke kinda lo gi hio tongaso, mbeni ye ti sara titene lo kiri lo ga nzoni ayeke daa pepe.

²Tongana azo ti mbirimbiri awu mingi, azo ti kodro ayeke na ngia; me tongana zo ti sioni laa ayeke na ndö ti mbata ti gbia, azo ayeke dema.

³Zo so aye tënë ti ndara, lo yeke zia ngia na be ti babâ ti lo; me zo so ayeke fono na awali-ndumba, lo yeke buba nginza ti lo kue.

⁴Gbia so asara ye na lege ti mbirimbiri, ye ayeke ga nzoni na ya ti kodro; me lo so lo hunda lapo ahon ndoni, lo yeke buba kodro.

⁵Zo so atene anzerengo tënë ti handa na mba ti lo, lo zia gbanda na lege ti lo.

⁶Siokpari ti zo ti sioni ayeke gbu lo tongana kuku; me zo ti mbirimbiri ayeke na ngia si lo yeke dodo na ngia.

⁷Zo ti mbirimbiri ayeke gbu koko ti awayere; me zo ti sioni ayeke na li pepe ti hinga tënë ni.

⁸Azo so abaa amba ti ala tongana ambumbuse zo ayeke bi wâ na ya ti gbata; me azo ti ndara asara si ngonzo ade.

⁹Tongana zo ti ndara ague na zo ti buba na ngbanga, ataa lo sara ngonzo, ataa lo he ngia, fade lo yeke duti kpoo laoko pepe.

¹⁰Azo ti fango zo ake zo so sarango ye ti lo ayeke na legeni; me azo ti mbirimbiri agi lege ti bata fini ti zo so.

¹¹Zo ti buba ayeke fa polele ngonzo ti lo kue; me zo ti ndara ayeke kanga ngonzo ti lo, lo yeke sara nga si ngonzo ni ade.

¹²Tongana mbeni makonzi adingi mê ti lo ti ma gi atënë ti mvene, azo ti gbe ti lo kue ayeke ga azo ti sioni.

¹³Ye so abongbi wayere na zo ti sarango ngangu na azo ayeke so: KOTA GBIA laa amu na ala use kue le ti baa na ndo.

¹⁴Gbia so ayeke fâ ngbanga ti azo ti mawa na legeni, fade lengo-gbia ti lo ayeke luti ngangu lakue.

¹⁵Pikango molenge na sukungo na lo asara si lo duti na ndara; me molenge so azia lo gi senge tongaso, lo yeke zia kamene na le ti mama ti lo.

¹⁶Tongana azo ti sioni awu mingi, sarango sioni ye ayeke wu nga mingi; me fade azo ti mbirimbiri ayeke baa tingo ti azo ti sioni.

¹⁷Mo pika molenge ti mo na zaza si fade mo wara lege ti duti kpoo; lo yeke sara ande titene be ti mo asi singo na ngia.

¹⁸Kodro so wayanga-Nzapa ayeke daa pepe ayeke duti gi na ya ti wusuwusu. Ti lo nzoni, zo so asara ye alingbi na *Ndia!

¹⁹Gi na lege ti atënë senge si zo alingbi ti mu wango na zo ti kua pepe. Biani, lo lingbi ti ma atënë ni, me fade lo yeke sara ye alingbi na ni pepe.

²⁰Tongana mo baa mbeni zo so ayeke gbu li ti lo pepe si lo yeke tene tënë, ye so mo lingbi ti ku na mbage ti zo ti buba ayeke nzoni ahon ti zo tongaso.

²¹Zo ti kua ti mo so mo sara nzoni na lo ahon ndoni, ti londo na ngoi so lo ngba molenge ngbii si lo ga kota zo, mbeni lâ, lo yeke baa akungba so mo yeke na ni tongana ye so ayeke ga ande ti lo.

²²Zo ti ngonzo asara si papa alondo; zo so be ti lo gi wâ wâ asara si siokpari awu ahon ndoni.

²³Kuru baba ti zo asara si azo abaa lo tongana kete zo; me zo so asara tere ti lo kete, azo ayeke gonda lo.

²⁴Zo so asara songo na zo ti nzi, zo ni asara sioni gi na lo wani. Lo ma tënë ti dengo ba so aye ti ga na ndö ti lo so kue, me lo ke ti fa zo ti nzi ni.

²⁵Sarango mbeto ti azo ayeke tongana kuku ndali ti zo; me zo so azia be ti lo na ndö ti KOTA GBIA, ye oko ayeke sara lo pepe.

²⁶Azo mingi ayeke gi lege ti ga nzoni na le ti makonzi ti ala, me gi KOTA GBIA oko laa ayeke fâ ngbanga ti zo oko oko na legeni.

²⁷Be ti azo ti mbirimbiri ake azo ti kirikiri mingi; be ti azo ti sioni ake azo so sarango ye ti ala ayeke na legeni.