Read sango Amato 30 Bible Online

Amato 30 - sango bible

Amato 30

¹So ayeke akota tënë ti Agur, molenge ti Yake. Nengo tënë ti koli so lo tene na Itiel, Itiel na Ukal ayeke so:

²“Biani, buba ti mbi ahon ti azo kue, hingango ndo so zo ayeke na ni, mbi yeke na ni pepe.

³Mbi manda ndara laoko pepe; lo so ayeke nde si ayeke nzoni kue so, mbi de ti hinga tënë na ndö ti lo pepe.

⁴Zo wa laa ague na yayu si lo londo kâ lo zu na sese, zo wa? Zo wa laa agbu pupu laoko na ya ti maboko ti lo, zo wa? Zo wa laa akanga ngu laoko na ya ti bongo ti lo, zo wa? Zo wa laa aleke nda ti sese kue, zo wa? Iri ti lo ayeke nyen? Iri ti molenge ti lo ayeke nyen? Mo hinga ni?

⁵“Atënë ti Nzapa kue ayeke taa-tënë. Nzapa ayeke tongana *vala ndali ti azo so akpe na lo ti bata tere ti ala.

⁶Mo zia mbeni tënë na ndö ti atënë ti lo pepe. Tongaso pepe, fade lo yeke suku na mo si lo yeke baa mo tongana zo ti mvene.

⁷“Nzapa ti mbi, mbi hunda gi aye use na mo. Mo mu aye ni so na mbi kozoni si mbi kui.

⁸Mo zi na ya ti fini ti mbi aye ti kirikiri na atënë ti mvene. Mo sara si mbi ga wayere pepe wala zo ti mosoro nga pepe; mo mu na mbi gi kobe so alingbi na mbi.

⁹Biani, tongana mbi yeke na gba ti aye, mbi lingbi ti bere tënë ti mo, mbi tene: ‘KOTA GBIA ni ayeke zo wa?’ Wala tongana mbi yeke wayere, mbi lingbi ti nzi ye. Tongaso, fade mbi yeke buba iri ti Nzapa ti mbi.

¹⁰“Mo tene mvene na iri ti mbeni zo ti kua na le ti wa ti lo pepe; tongaso pepe, fade lo yeke deba mo si tënë ni aga na li ti mo.

¹¹“Ambeni zo ayeke daa so ayeke deba babâ ti ala si ala yeke tene nzoni tënë na ndö ti mama ti ala pepe.

¹²“Ambeni zo ayeke daa so ayeke baa tere ti ala tongana azo ti vurungo be, ataa so ade a *sukula sioni ti ala pepe.

¹³“Ambeni zo ayeke daa so baba ahon ndö ti ala si ala yeke baa amba ti ala tongana ambumbuse ye.

¹⁴“Ambeni zo ayeke daa so pembe ti ala ayeke tongana yongoro zeme si abio ti ngbangba ti ala ayeke tongana zeme. Azo ni ayeke te azo ti mawa ti kodro ni si ala ye ti zi awayere na popo ti azo.”

¹⁵Nikpa ayeke na amolenge ti lo ti wali use so ayeke tene: “Mu na mbi! Mu na mbi!” Aye ota ayeke daa so nzara ni ahunzi laoko pepe, osio ni ayeke nga daa so atene laoko pepe, atene: “Awe!”; aye ni ayeke tongana:

¹⁶ndo ti akuâ, wali ti dungo ni pepe, sese so ngu ayeke daa pepe na wâ so ayeke tene laoko pepe: “Awe!”

¹⁷Zo so ahe babâ ti lo si lo ke ti ma yanga ti mama ti lo, fade *akpakpo ti tere ti ngu ayeke koro le ti lo si *angoalo ayeke te lo.

¹⁸Aye ota ayeke daa so mbi gi li ti mbi daa gbaa, osio ni ayeke nga daa so mbi de ti hinga nda ni pepe:

¹⁹lege ti ngoalo na le ti nduzu, lege ti ngbo na ndö ti kota têne, lege ti mangboko na le ti kota ngu-ingo na lege ti koli na tere ti mbeni maseka-wali.

²⁰Lege ti sarango ye ti wali ti gingo koli ti amba ti lo ayeke so: so lo te kobe awe, lo yeke mbo yanga ti lo, na pekoni lo tene: “Mbi sara sioni ye oko pepe!”

²¹Aye ota ayeke daa so asara si sese ado, osio ni ayeke nga daa so zo ayeke kanga be ti lo daa gbaa:

²²ngbaa so aga gbia, buba zo so ayeke te kobe gbani gbani,

²³wali so azo ake lo si lo mu koli na zo ti kua ti wali so amu ndo ti wa ti lo.

²⁴Na ndö ti dunia so, mara ti anyama osio ayeke daa, ala yeke kete mingi, me ala yeke na ndara mingi; ayeke anyama tongana:

²⁵amini: ala yeke na ngangu pepe, me na ngoi ti fango ale ti kobe, ala yeke bongbi akobe ti ala ti bata ni;

²⁶aleli: ala yeke na ngangu pepe, me ala sara ada ti ala na popo ti atêne;

²⁷agbadola: ala yeke na gbia pepe, me ala yeke tambula na lege ti molongo ti ala;

²⁸akada: zo alingbi ti gbu ala na maboko ti lo senge, me ala yeke gue ngbii asi na yangbo ti gbia.

²⁹Aye ota so ayeke na fini ayeke daa, ala yeke tambula na baba, osio ni ayeke nga daa so ayeke pendere mingi; aye ni ayeke tongana:

³⁰bamara: mbeto ti mbeni ye oko ayeke sara lo pepe, lo yeke kiri na peko na dawa ti mbeni ye oko pepe;

³¹koli-kondo: lo yeke tambula na baba, wala koli-ngasa, na gbia so atambula na le ti aturugu ti lo.

³²Tongana mo sara ye ti buba na lege ti pikango kate ti mo, me na pekoni mo gbu li ti mo daa, ayeke nzoni mo kiri mo zi yanga ti mo ti tene tënë pepe.

³³Biani, tongana zo amu ngu ti me ti bagara si apika ya ni, dubere ayeke sigigi daa. Tongana zo apika hon ti mba ti lo, mene ayeke sigigi daa, tongana zo azingo ngonzo ti mba ti lo, tiri ayeke londo.