Read sango Amato 31 Bible Online

Amato 31 - sango bible

Amato 31

¹So ayeke awango so mama ti Lemuel, gbia ti Masa amu na lo:

²“Molenge ti mbi, taa molenge ti ya ti mbi! Mo yeke molenge ti zendo so mbi mu; mo ma mbi si.

³Mo buba ngangu ti mo na tere ti awali pepe; awali so ayeke buba lege ti agbia so, mo zia fini ti mo na maboko ti ala pepe.

⁴Lemuel, nyongo vin alingbi na agbia pepe; nyongo angangu samba alingbi na amakonzi pepe.

⁵Tongana ala nyon samba ahon ndö ti ala, fade ala yeke girisa tënë ti ndia si ala yeke fâ ngbanga ti asenge zo na legeni pepe.

⁶Ngangu samba alingbi na zo so aga nduru ti kui, wala na zo so vundu ahon ndö ti lo.

⁷Lo nyon samba ni si fade lo yeke wara lege ti girisa mawa ti lo; lo yeke kiri ti dabe ti lo na vundu ti lo pepe.

⁸Me ti mo, alingbi mo tene tënë ti gbu koko ti azo so alingbi ti tene tënë pepe. Azo so ambeni zo ado ala azia, alingbi mo duti wagbungo-koko ti ala.

⁹Mo tene tënë, mo fâ ngbanga ti azo na legeni! Gbu koko ti awayere na ti azo ti mawa!”

¹⁰Zo wa laa ayeke wara wali so alingbi, zo wa? Wali so alingbi ane na le ti azo ahon atêne ti ngangu ngere!

¹¹Koli ti lo ayeke zia be ti lo na ndö ti lo; anzoni ye ayeke tia koli ni pepe.

¹²Na lango ti fini ti lo kue, lo yeke sara gi nzoni na koli ti lo, me lo yeke sara sioni pepe.

¹³Lo yeke gi ti wara kua ti tere ti taba nga na *len ti sara na bongo; lo yapu na sarango kua na maboko ti lo wani.

¹⁴Lo yeke tongana mangboko ti azo ti dengo buze; lo mu akobe ti lo na yongoro ndo si lo ga na ni.

¹⁵So ndo angba kâ, lo londo awe; lo to kobe na asewa ti lo si lo fa na azo ti kua ti lo ti wali kua so ala lingbi ti sara.

¹⁶Lo gbu li ti lo na ndö ti mbeni yaka; na pekoni, lo vo ni. Na lege ti nginza so lo wara, lo yeke lu yaka ti *vinye.

¹⁷Lo yeke gbu kua na ngangu ti tere ti lo kue; ayeke ngangu na lo ti duti senge tongaso.

¹⁸Lo baa so dengo buze ti lo ayeke gue gi na nduzu; na bi kue, lamba ti lo ayeke mingo pepe.

¹⁹Lo yeke leke akamba ti sarango na abongo; lo wani, lo yeke sara abongo.

²⁰Maboko ti lo akpengba na mungo ye na zo ti mawa pepe; lo yeke mu ye na wayere.

²¹Mbeto titene de asara azo ti da ti lo asara lo pepe, ngbanga ti so ala kue ayeke na abongo ti de.

²²Lo sara abalangeti ndali ti lo wani; abongo ti lo ayeke na len ti nzoni ni si a kpo apendere nzoroko daa.

²³Azo ti kodro ane koli ti lo mingi, tongana lo yeke duti na ya ti bongbi ti *akangba ti kodro ni.

²⁴Lo yeke fu abongo ti kango ni; lo yeke ka akamba ti ndö ti bongo na azo ti dengo buze so ayeke hon na lege.

²⁵Lo yeke na ngangu si azo ane lo. Tongana lo gbu li ti lo na ndö ti ye ti kekereke, be ti lo ayeke na ngia.

²⁶Lo yeke tene tënë na ndara si lo yeke mu wango na azo na nzoni be.

²⁷Lo yeke baa lege ti aye so kue ayeke si na ya ti da ti lo; lo ye ti duti gi senge tongaso pepe.

²⁸Amolenge ti lo ayeke ga ti bi kongo na li ti lo; koli ti lo ayeke gonda lo.

²⁹Lo tene: “Awali mingi alingbi, me mo hon ala kue!”

³⁰Pendere ayeke handa zo; pendere ti tere ayeke ninga pepe. Gi wali so akpe mbeto ti KOTA GBIA, wali so alingbi titene azo agonda lo laa.

³¹Alingbi a mu na lo ye ti peko ti kua so lo sara. Alingbi azo ti kodro ni kue agonda lo ndali ti akua so lo sara!