Read sango Amato 4 Bible Online

Amato 4 - sango bible

Amato 4

¹Amolenge, ala ma wango ti babâ ti ala. Ala zia be ti ala kue ti hinga nda ti aye.

²Biani, aye so mbi fa na ala so ayeke nzoni mingi; aye so mbi yeke fa na ala so, ala zia lege ni pepe.

³Mbi nga, mbi yeke lani nzoni molenge ti babâ ti mbi; mama ti mbi aye mbi mingi tongana oko molenge.

⁴Lani, babâ ti mbi ayeke fa na mbi aye tongaso: “Bata atënë ti mbi na be ti mo; sara ye alingbi na atënë ti yanga ti mbi si fade mo ngba na fini.

⁵Sara kue ti wara ndara na hingango nda ti ye. Be ti mo agirisa na atënë ti yanga ti mbi pepe; mo hon nde na atënë ni pepe.

⁶Mo zia ndara pepe, fade lo yeke bata mo. Mo ye ndara, fade lo yeke bata mo si sioni ye asi na mo pepe.

⁷Tongo nda ti ndara ayeke so: mo sara kue ti wara ndara. Ye so kue mo wara, mo mu ni ti wara na hingango nda ti aye.

⁸Gbu ndara na tere ti mo, fade lo yeke sara si mo ga kota; gbu ndara na kate ti mo, lo yeke sara si mo wara gonda.

⁹Lo yeke zia mbeni pendere kpoto na li ti mo; lo yeke zia na li ti mo mbeni ye ti pendere so aza zango.”

¹⁰Molenge ti mbi, ma mbi! Mo sara ye alingbi na atënë ti mbi si fade gigi ti mo ague, ayo.

¹¹Mbi fa na mo lege ti dutingo na ndara; mbi fa na mo lege ti sarango ye ti mbirimbiri.

¹²Tongaso, mo yeke tambula, mbeni ye ti kanga lege na mo ayeke daa pepe; mo kpe loro, mo yeke ti pepe.

¹³Wango so a mu na mo, mo bata ni ngangu, mo zia lege ni pepe. Mo bata ni, ngbanga ti so fini ti mo laa!

¹⁴Mo mu peko ti sarango ye ti azo ti sioni pepe, mo mu lege ti azo ti sarango sioni pepe.

¹⁵Mo zia lege ti ala ni, mo hon daa pepe! Mo kpe lege ti ala ni, mo hon ti mo hongo!

¹⁶Biani, azo ni ayeke lango pepe ngbii ala sara sioni si. Lango ayeke gbu le ti ala pepe ngbii ala kinda mbeni zo si.

¹⁷Sarango sioni aga kobe ti ala ti tengo ni; sarango ngangu na azo aga samba so ayeke sara ala.

¹⁸Lege ti dutingo ti azo ti mbirimbiri ayeke tongana lumiere ti ndaperere, lo yeke su ngbii lo su ngangu ngangu na bekombite.

¹⁹Me lege ti dutingo ti azo ti sioni ayeke tongana bi so avuko pitipiti. Ye so ala pika gere ti ala daa ti ti, ala baa ni pepe.

²⁰Molenge ti mbi, mo ma tënë ti mbi, dingi mê ti mo, mo ma atënë so mbi yeke tene na mo.

²¹Mo girisa ni pepe; mo bata ni na ya ti be ti mo.

²²Atënë ni ayeke mu fini nga na seni na azo so kue ayeda na ni.

²³Mo sara hange na atënë so ayeke na be ti mo kâ, ngbanga ti so lege ti fini ti mo alondo daa.

²⁴Mo zia atënë ti mvene asigigi na yanga ti mo pepe, mo tene asioni tënë na iri ti amba ti mo pepe.

²⁵Ayeke nzoni mo baa gi ya ti le ti zo; mo baa ndo mbirimbiri gi na dawa ti mo.

²⁶Mo gbu li ti mo mbirimbiri kozo si mo mu mbeni lege; ayeke nzoni mo mu lege so mbeni sioni ye oko alingbi ti si na mo daa pepe.

²⁷Mo zia lege ni ti hon mbage na mbage pepe; mo kpe lege ti sioni ye.