Read sango Amato 8 Bible Online

Amato 8 - sango bible

Amato 8

¹Ndara ayeke to mbela ti iri azo, hingango ye atene tënë na kota go. Ala azo, ala ma ni pepe?

²Na ndö ti akete hoto so ayeke na tere ti lege, na asangbi-lege, Ndara aluti na nduzu.

³Na tere ti ayanga ti gbagba, na ndo so azo ti gbata ni ayeke bongbi daa, lo yeke dekongo, lo tene:

⁴“Ala azo laa, mbi yeke iri ala; mbi yeke tene tënë so na ala kue.

⁵Ala azo so le ti ala ahan pepe so, ala gi lege ti hinga ye. Ala so ahinga ndo pepe so, ala manda lege ti duti na hingango ndo.

⁶Ala ma mbi si, mbi yeke na mbeni kota tënë ti tene na ala; mbi yeke tene tënë so polele.

⁷Biani, mbi yeke tene taa-tënë, ngbanga ti so mbi ke na kuru go asioni tënë.

⁸Atënë so kue mbi yeke tene ayeke mbirimbiri; tënë ti mayere wala tënë ti handa ayeke na ya ni pepe.

⁹Zo ti hingango ndo ayeke ma ya ti atënë ti mbi polele; na le ti azo ti hingango ye, atënë ni ayeke taa na legeni.

¹⁰Ala soro wango ti mbi, me nginza pepe; ayeke nzoni ala ye hingango ye ahon lôro ti nzoni ni.

¹¹Biani mbi Ndara, mbi yeke nzoni mbi hon pendere têne ti ngangu ngere. Na popo ti aye so kue azo aye, mbeni oko ti lingbi na mbi ayeke daa pepe.”

¹²“Mbi Ndara, mbi na hingango ndo, e yeke duti na ndo oko. Mbi hinga ti sara ye na lege ti gbungo-li.

¹³Kpengo mbeto ti KOTA GBIA ayeke ti ke sioni ye. Baba, pikango kate, asioni sarango ye na atënë ti mvene, mbi ke ni.

¹⁴Kua ti mbi ayeke ti mu wango na azo; mbi yeke mu lege na ala ti sara aye ti ala nzoni. Mbi laa mbi yeke hingango nda ti aye; ngangu ayeke ti mbi.

¹⁵Mbi laa mbi yeke mu lege na agbia ti le-gbia nga na akota zo ti kodro ti leke andia mbirimbiri.

¹⁶Mbi laa mbi yeke mu lege na amakonzi, na akota zo nga na azo so kue ayeke fâ ngbanga mbirimbiri ti sara komandema.

¹⁷Mbi, mbi ye azo so aye mbi. Azo so ayeke gi mbi, fade ala yeke wara mbi.

¹⁸Mbi yeke mu na azo mosoro na gonda, anzoni ye so angba lakue nga na futa so alingbi.

¹⁹Aye so mbi yeke mu na azo ayeke nzoni ahon lôro ti nzoni ni; ye so zo awara na pekoni ayeke kota ahon wen ti nginza ti nzoni ni.

²⁰Mbi yeke tambula na ndö ti lege ti mbirimbiri, na ndö ti lege so alingbi na ndia.

²¹Kâ, mbi yeke sara si azo so aye mbi awara anzoni ye; mbi yeke sara si da ti ala asi singo na mosoro.

²²KOTA GBIA asara mbi kozo ti aye so lo sara, kozoni na tanga ti aye so kue lo sara giriri.

²³Lo sara mbi ngbene ye kâ na tongo nda ti aye, kozoni si dunia abaa gigi.

²⁴Na ndembe so a du mbi, akota ngu ayeke daa pepe; ali ti ngu so ngu ayeke sigigi daa ayeke nga daa pepe.

²⁵A du mbi kozo titene ahoto abaa gigi, kozo titene a sara akete hoto.

²⁶Na ngoi ni kâ, ade KOTA GBIA asara sese na ayaka pepe; ade lo sara fuku ti sese ti dunia so pepe.

²⁷Mbi yeke ando daa na ndembe so lo leke yayu si lo suru ye *kerebende na tere ti ngu so ali;

²⁸na ndembe so lo zia ambinda na le ti nduzu si lo mu ngangu na ali ti ngu titene asua;

²⁹na ndembe so lo leke maka titene akota ngu-ingo aluti daa, lo mu yanga titene ngu ahon ni pepe. Mbi yeke ando daa na ndembe so lo leke gere ti sese.

³⁰Na ngoi ni so, mbi yeke na tere ti lo tongana mbeni wakode-kua. Lakue, mbi yeke zia ngia na be ti lo; lakue, mbi yeke sara ngia na dawa ti lo.

³¹Mbi duti na ndö ti sese so lo sara si mbi yeke sara ngia; mbi yeke wara ngia ti mbi na popo ti azo.”

³²“Fadeso amolenge ti mbi, ala ma mbi si! Ti ala nzoni, azo so ayeke sara ye alingbi na atënë ti mbi!

³³Ala ma awango ti mbi si ala ga azo ti ndara; ala baa ni tongana senge ye pepe.

³⁴Ti lo nzoni, zo so ama mbi, zo so ayeke bata yanga ti da ti mbi lakue; lo yeke sara sanziri na tere ti yanga ti da ti mbi.

³⁵Biani, zo so awara mbi, awara fini awe; be ti KOTA GBIA ayeke nzere na lo.

³⁶Me zo so asara sioni ti ke mbi, lo wani, lo zia ka na tere ti lo; azo so kue be ti ala ake mbi, ala ye kuâ.”