Read sango Zo ti bongbingo azo 11 Bible Online

Zo ti bongbingo azo 11 - sango bible

Zo ti bongbingo azo 11

¹Mo bi mapa ti mo na le ti ngu, gbanda gbaa, mo yeke kiri ti wara ni.

²Mo mu mbage ti aye ti mo na azo mbarambara wala miombe, ngbanga ti sioni ye so ayeke si na ndö ti sese so, mo hinga ni pepe.

³Tongana mbinda ane nengo, fade ngu-Nzapa ayeke pika. Tongana mbeni keke ati na mbage ti maboko ti koli wala na mbage ti maboko ti wali, keke ni ayeke ngba na ndo so lo ti daa.

⁴Zo so angba ti ku pupu aya ahon si, lo yeke lu le ti kobe pepe; zo so angba ti ku mbinda ahon si, lo yeke fâ le ti kobe pepe.

⁵Pupu so ayeke mu fini na zo, mo hinga lege ni pepe; lege so molenge ayeke kono na ya ti mama ti ngo, mo hinga nga ni pepe. Legeoko nga, Nzapa so asara aye kue so, mo lingbi nga ti hinga lege so lo sara na aye ni pepe.

⁶Na ndaperere, mo lu ale ti kobe ti mo; mo ngba gi ti sara kua ngbii asi na lakui. Mo hinga pepe kua wa laa ayeke ga ande nzoni, wala akua ni kue!

⁷Vurungo ndo anzere; dutingo na fini ayeke nzoni ye mingi.

⁸Tongana zo alango ngu mingi, ayeke nzoni lo duti na ngia ndali ti angu ni oko oko kue. Me ayeke nzoni lo dabe ti lo so mingi ti alango ni ayeke ti vukongo ndo. Aye so kue ayeke si so ayeke gi senge senge.

⁹Maseka-koli, na ngoi so mo de maseka, mo sara ngia biani. Ayeke nzoni be ti mo aduti na ngia na ngoi ti maseka ti mo. Sara ye so be ti mo aye; sara ye so le ti mo abaa. Me ayeke nzoni mo hinga, mo tene, Nzapa ayeke iri ande mo na ngbanga ndali ti aye oko oko so mo sara.

¹⁰Zi vundu na be ti mo, zi sioni na ya ti fini ti mo, ngbanga ti so ngoi ti maseka na ngangu ti maseka ayeke gi senge senge.