Read sango Zo ti bongbingo azo 12 Bible Online

Zo ti bongbingo azo 12 - sango bible

Zo ti bongbingo azo 12

¹Na ngoi so mo de maseka, ayeke nzoni mo dabe ti mo na lo so asara mo. Dabe ti mo na lo kozoni si alango ti pasi asi, so ti tene ngoi so fade mo yeke tene: “Dunia ni anzere na mbi oko pepe”.

²Dabe ti mo na lo kozoni si lâ na sungo ti lâ, nze na atongoro avuko si mbinda akiri amu ndo kue.

³Na ngoi ni so, fade asanziri so ayeke bata da, tere ti ala ayeke do; azo ti ngangu, peko ti ala aba bango; awali so ayeke nika ale ti kobe ayeke zia ti sara kua ti ala, ngbanga ti so ala yeke mingi pepe; awali so ayeke baa ndo na gigi na le ti fenetere, le ti ala avuko.

⁴Na ngoi ni so, fade ayanga ti da so abaa ndo na ndö ti lege ayeke kanga; toto ti kpu ayeke kai, toto ti ndeke ayeke sara si zo azingo; amolenge-wali kue azia ti he bia.

⁵Na ngoi ni so, fade mbeto ti guengo na li ti hoto ayeke sara zo; kota mbeto ayeke sara zo na ndö ti lege; fade kua ti li ti zo ayeke vuru tongana tukia; tambula ti zo ayeke ne nengo tongana gbadola so ate ye ahon ndoni. Aye so asara si kobe anzere, nzerengo ni ahon. Tongaso laa zo ayeke gue na ndangba ndo ti lango ti lo. Awali so ahinga ti toto kuâ ayeke ku na ndö ti lege ti toto kuâ.

⁶Dabe ti mo na lo so asara mo kozoni si kamba ti wen ti nginza azi, kozoni si kopo ti lôro afâ, kozoni si ta ti sese afâ na li ti ngu, kozoni si kamba ti gbotongo na ngu afâ ati na ngbonda ti du ti ngu.

⁷Na ngoi ni so, fade tere ti zo ayeke kiri na ya ti fuku ti sese, ngbanga ti so a mu zo na ya ti fuku ti sese. Na pekoni, yingo ayeke kiri na Nzapa so amu yingo na zo.

⁸Zo ti bongbingo azo atene: “Ye kue ayeke senge senge; ye kue gi senge senge.”

⁹Ye so zo ti bongbingo azo asara ayeke so: lo kiri lo fa hingango ye na azo. Lo ma *amato mingi, lo gi nda ni si lo leke ni na legeni.

¹⁰Zo ti bongbingo azo asara kue ti wara anzerengo tënë. Lo su atënë ni mbirimbiri na mbeti, atënë ni ayeke taa-tënë.

¹¹Atënë ti azo ti ndara ayeke tongana keke so yanga ni ayo yongo ti kpongo na bagara ti sara si lo tambula. Azo so abongbi atënë ni na mbeti, ala yeke tongana pondi so a pika na ya ti keke si alinda ngangu. So matabisi ti Nzapa laa, lo oko so lo yeke bata azo tongana ataba ti lo.

¹²Molenge ti mbi, mo sara hange si mo zia mbeni ye na ndö ni pepe. Sungo ambeti ayeke hunzi laoko pepe; mandango mbeti mingi ayeke woko tere ti zo.

¹³Atënë so kue e tene ge so, kota tënë ni ayeke so: kpe mbeto ti Nzapa, mo sara ye alingbi na andia ti lo, ngbanga ti so gi ye so zo alingbi ti sara ni laa.

¹⁴Biani, aye so kue zo ayeke sara, ataa na hondengo ni, nzoni ni wala sioni ni, fade Nzapa ayeke iri zo na ngbanga.