Read sango Zo ti bongbingo azo 2 Bible Online

Zo ti bongbingo azo 2 - sango bible

Zo ti bongbingo azo 2

¹Mbi tene na be ti mbi, mbi tene: “Ayeke nzoni mbi gi ti wara ngia, mbi tara nzerengo ye ti gigi so!” Me ye so nga ayeke gi senge senge.

²Mbi tene: “Hengo ngia ayeke ye ti buba!”; mbi tene nga: “Ngia ayeke sara nzoni ti nyen?”

³Mbi leke na be ti mbi ti mu tere ti mbi na nyongo vin; ti sara ye tongana ti azo ti buba, ataa so mbi ngba ti sara ye na lege ti ndara. Mbi ye fade ti hinga nzoni ye ti nyen azo alingbi ti sara na ndö ti sese so, na ngoi so ala de na fini.

⁴Mbi sara akota kua mingi: mbi sara ada ti mbi wani, mbi fâ ayaka ti vinye;

⁵mbi fâ ayaka ti pendere kongo na ti keke, mbi lu mara ti akeke nde nde so kue a yeke te le ni tengo.

⁶Mbi zi *alende ti to ngu ni ti tuku na ndö ti gba ti akeke so mbi lu.

⁷Mbi vo angbaa ti koli na ti wali; amolenge so ala du ayeke sara kua na da ti mbi. Mbi wara gba ti abagara, ataba na angasa ahon ti azo so kue ale-gbia na Jérusalem kozo ti mbi.

⁸Mbi bongbi wen ti nginza na lôro mingi; mbi bongbi mosoro ti agbia na ti akodro so ayeke na gbe ti mbi. Mbi yeke na akoli na awali ti hengo bia. Mbi wara nga ye so ayeke zia ngia mingi na be ti zo: mbi mu awali gbani gbani.

⁹Mbi ga kota zo, mbi wara ye mingi ahon azo so kue ale-gbia na Jérusalem kozo ti mbi. Me ndara ti mbi angba na mbi.

¹⁰Aye so kue le ti mbi abaa si mbi sara nzara ni, mbi hon daa ti sara ni. Mbi sara angia kue, mbi ke mbeni oko pepe. Be ti mbi awara ngia ndali ti akua so kue mbi sara; angangu kua so kue mbi sara, mbi wara nzoni ye ti pekoni si aga ye ti mbi.

¹¹Tongaso, mbi kiri mbi gbu li ti mbi na ndö ti akua so kue mbi sara na pasi so kue mbi baa na sarango ni. Mbi baa so aye so kue ayeke gi senge senge si ayeke tumbango peko ti pupu senge. Aye so kue azo ayeke sara na ndö ti sese so, ala yeke wara ye na pekoni pepe.

¹²Mbi kiri mbi gbu li ti mbi ti hinga ye ti ndara, ye ti buba na ye ti buburu. Nilaa mbi hunda tere ti mbi, mbi tene: zo so ayeke ga gbia na peko ti mbi, fade lo yeke sara nyen? Lo yeke sara gi ye so azo so aga kozo ti lo asara.

¹³Mbi baa so nzoni ye so zo ayeke wara na peko ti ndara ahon ti buba, tongana ti so nzoni ye so zo ayeke wara ndali ti vurungo ndo ahon ti vukongo ndo.

¹⁴Zo ti ndara ayeke baa ndo so lo yeke gue daa; zo ti buba ayeke tambula na ya ti vukongo ndo. Me mbi baa so ala use kue, gi ye oko laa ayeke ku ala.

¹⁵Mbi tene na be ti mbi, mbi tene: “Ye so asi na zo ti buba, gi ni laa ayeke si ande na mbi. Mbi yeke fade zo ti ndara mingi ngbanga ti nyen?” Mbi kiri mbi tene na be ti mbi, mbi tene: “Ye so nga ayeke gi senge senge.”

¹⁶Aye so kue ayeke si, na ya ti alango so ayeke ga, azo ayeke girisa ni kue. Zo ti ndara na zo ti buba, fade ala use kue ayeke kui; iri ti ala ayeke ngba lakue lakue na popo ti azo pepe. So kue ngbanga ti nyen?

¹⁷Tongaso, nzara ti gigi so ahunzi na mbi awe. Biani, aye so kue azo ayeke sara na ndö ti sese so anzere na mbi oko pepe. Ye so kue ayeke gi senge senge si ayeke tumbango peko ti pupu senge.

¹⁸Akua so kue mbi baa pasi ndali ni na ndö ti sese so, nzara ni ahunzi na be ti mbi awe, ngbanga ti so fade mbi yeke zia aye ni na zo so ayeke ga na peko ti mbi.

¹⁹Zo ni so ayeke ande zo ti ndara wala zo ti buba; e hinga? Me akua so kue mbi baa pasi na sarango ni, akua so mbi sara na ndara na ndö ti sese so, fade ayeke ga ye ti lo. Ye so nga ayeke gi senge senge.

²⁰Tongaso be ti mbi awoko ndali ti akua so mbi baa pasi na sarango ni na ndö ti sese so.

²¹Mbeni zo abaa pasi na sarango kua na ndara, na kode si kua ni aga nzoni. Me a mu ye ti lo ni na zo so asara kua ndali ni oko pepe. Ye so nga ayeke gi senge senge; so ayeke sioni ye mingi.

²²Zo asara kua ngangu, lo baa pasi na ndö ti sese so, nyen laa angba na lo, nyen?

²³Alango ti fini ti lo kue gi pasi; akua so kue lo sara aga gi na vundu. Ataa na bi, be ti lo gi na nduzu. Ye so nga ayeke gi senge senge.

²⁴Ye ti nzoni ndali ti zo ayeke daa pepe, gi tengo ye na nyongo ye, dutingo na ngia na peko ti kua so lo sara. Mbi baa so ye so kue alondo nga na Nzapa.

²⁵Biani, tongana Nzapa ayeda pepe, zo wa laa alingbi ti wara ye ti tengo ni, wala ti duti na ngia?

²⁶Nilaa, zo so ayeke nzoni na le ti Nzapa, Nzapa ayeke mu na lo ndara, hingango ndo na ngia. Me ti zo ti siokpari, Nzapa ayeke mu na lo kua ti bongbingo ye ndali ti zo so ayeke nzoni na le ti lo. Ye so nga ayeke gi senge senge si ayeke tumbango peko ti pupu senge.