Read sango Zo ti bongbingo azo 3 Bible Online

Zo ti bongbingo azo 3 - sango bible

Zo ti bongbingo azo 3

¹Aye so kue ayeke si na ndö ti sese so, ye oko oko ayeke na ngoi ti lo.

²Ngoi ti dungo ayeke daa, ngoi ti kuâ ayeke daa; ngoi ti lungo ye ayeke daa, ngoi ti gbotongo ye so a lu ayeke daa.

³Ngoi ti fango zo ayeke daa, ngoi ti kaingo kobela na tere ti zo ayeke daa; ngoi ti kungbingo da ayeke daa, ngoi ti sarango da ayeke daa.

⁴Ngoi ti toto ayeke daa, ngoi ti hengo ngia ayeke daa; ngoi ti demango tere ayeke daa, ngoi ti dodo ayeke daa.

⁵Ngoi ti bingo têne ayeke daa, ngoi ti bongbingo têne ayeke daa; ngoi ti sungo ngbangba ayeke daa, ngoi ti sungo ngbangba pepe ayeke daa.

⁶Ngoi ti gingo ye ayeke daa, ngoi ti girisango ye ayeke daa; ngoi ti batango ye ayeke daa, ngoi ti bingo ye ayeke daa.

⁷Ngoi ti surungo bongo ayeke daa, ngoi ti fungo bongo ayeke daa; ngoi ti kaingo kpoo ayeke daa, ngoi ti tenengo tënë ayeke daa.

⁸Ngoi ti yengo zo ayeke daa, ngoi ti kengo zo ayeke daa; ngoi ti bira ayeke daa, ngoi ti siriri ayeke daa.

⁹Zo so asara kua, nyen laa lo yeke wara na peko ti pasi so lo baa, nyen?

¹⁰Mbi baa kua so Nzapa amu na azo ti sarango ni.

¹¹Ye so kue Nzapa asara, ye oko oko ayeke pendere na ngoi ti lo. Lo zia na be ti azo tënë ti ye so ayeke ngba lakue lakue. Me zo alingbi ti hinga pepe nda ti ye so Nzapa ato nda ti sarango ni ngbii asi na ndani.

¹²Mbi hinga, mbi tene, mbeni nzoni ye ndali ti zo ayeke daa pepe, gi ti duti na ngia na ti duti nzoni.

¹³Tongana zo ate, anyon si lo duti na ngia na peko ti kua so kue lo sara, so matabisi ti Nzapa laa.

¹⁴Mbi hinga, mbi tene, ye so kue Nzapa asara ayeke ngba lakue lakue. Alingbi zo azia mbeni ye daa pepe, alingbi zo azi nga mbeni ye daa pepe. Nzapa asara tongaso titene azo akpe mbeto ti lo.

¹⁵Ye so ayeke daa fadeso, ayeke ye so asi kozoni awe; ye so ayeke si ande, ayeke ye so asi kozoni awe. Nzapa ayeke sara si ye so ahon awe, akiri asi.

¹⁶Mbi kiri mbi baa ndo na ndö ti sese so: na ndo so a yeke fâ ngbanga daa, sarango ye ti sioni ayeke daa; na ndo so mbirimbiri alingbi ti duti daa, sarango ye ti sioni ayeke daa.

¹⁷Mbi tene na be ti mbi, mbi tene: fade Nzapa ayeke fâ ngbanga ti zo ti mbirimbiri na ti zo ti sioni, ngbanga ti so ye oko oko na kua oko oko ayeke na ngoi ti lo.

¹⁸Ti azo, mbi tene na be ti mbi, mbi tene: Nzapa aye ti tara be ti ala si ala wani ahinga atene, ala hon anyama pepe.

¹⁹Biani, ye so ayeke si na azo, gi ni laa ayeke si na anyama. Ye so ayeke si na ala use kue ayeke legeoko: zo ayeke kui, nyama nga ayeke kui. Ala use kue ayeke wu gi pupu oko. Zo ahon nyama pepe. Biani, ye kue ayeke gi senge senge.

²⁰Ye kue ayeke gue gi na ndo oko; ye kue alondo na ya ti fuku ti sese, ye kue ayeke kiri na ya ti fuku ti sese.

²¹Zo wa laa ahinga atene, yingo ti zo ayeke gue na nduzu si yingo ti nyama ayeke zu na sese, zo wa?

²²Tongaso mbi baa mbi tene, alingbi tere ti zo anzere na lege ti kua so lo sara; mbeni nzoni ye ti hon so ayeke daa pepe. Ye so aga ti lo laa. Biani, zo wa laa ayeke sara ande titene lo kiri lo baa ye so ayeke si na peko ti lo, zo wa?