Read sango Zo ti bongbingo azo 4 Bible Online

Zo ti bongbingo azo 4 - sango bible

Zo ti bongbingo azo 4

¹Mbi kiri mbi baa ye ti ngangu so azo ayeke sara na amba ti ala na ndö ti sese so. A yeke sara ngangu na azo; me mbeni zo ti de be ti ala ayeke daa pepe. Azo so ayeke sara ngangu na amba ti ala laa ayeke na komandema; mbeni zo ti de be ti azo so a yeke sara ngangu na ala so ayeke daa pepe.

²Ti mbi, mbi baa so, azo so akui awe so, ti ala ayeke nzoni ahon ti azo so angba na fini.

³Zo so ade ti du lo pepe, ti lo nzoni ahon ti ala kue, ngbanga ti so lo baa pepe sioni ye so azo ayeke sara na ndö ti sese so.

⁴Mbi kiri mbi baa so akua so azo ayeke baa pasi na sarango ni, ala ye ti ga nzoni ti hon amba ti ala. Ye so nga ayeke gi senge senge si ayeke tumbango peko ti pupu senge.

⁵Taa-tënë, zo ti buba so akanga maboko ti lo, lo yeke kui nzara.

⁶Me kete ye so asi ya ti maboko oko si ayeke mu wungo tere, so laa ayeke nzoni ahon gba ti ye so asi ya ti maboko use na peko ti kua so zo abaa pasi na sarango ni si ayeke tumbango peko ti pupu senge.

⁷Na ndö ti sese so, mbi kiri mbi baa mbeni ye so ayeke gi senge senge:

⁸mbeni zo ayeke daa so lo yeke gi lo oko, mbeni zo ayeke na tere ti lo pepe; lo yeke na molenge pepe, wala na ita pepe. Lo yeke sara kua, lo wu tere pepe; me nzara ti warango mosoro mingi angba na be ti lo. Lo hunda tere ti lo, lo tene: “Akua so kue mbi sara, mbi yeke sara ni ndali ti zo wa?” Mbi gbanzi tere ti mbi ti sara ngia, mbi yeke sara ni ndali ti zo wa? Ye so nga ayeke gi senge senge; so ayeke sioni ye.

⁹Azo use ayeke nzoni ahon zo oko. Ndali ti so ala yeke use, futa so ala yeke wara na peko ti kua ti ala ayeke nzoni.

¹⁰Tongaso, tongana mbeni ati, mba ti lo ayo lo na nduzu. Me mawa na zo so ayeke gi lo oko. Tongana lo ti, mbeni zo ti yo lo na nduzu ayeke daa pepe.

¹¹Tongana ala use alango na ndo oko, tere ti ala ayeke mu wâ; me tongana zo alango gi lo oko, tere ti lo ayeke mu wâ tongana nyen?

¹²Tongana zo ayeke gi lo oko, mbeni zo ti ngangu alingbi ti kinda lo. Tongana ala yeke use, ala lingbi ti gbu le ni na zo ti ngangu ni. Tongana zo abongbi kamba ota ti ga kamba oko, ya ti kamba ni ayeke fâ hio pepe.

¹³Molenge so ayeke zo ti ndara si lo yeke na mosoro pepe, lo hon mbeni gbia so aga mbakoro awe si ayeke ma wango pepe, ngbanga ti so lo yeke zo ti buba.

¹⁴Ataa tongana molenge ni asigigi na da ti kanga titene lo le-gbia, ataa tongana a du lo wayere na kodro so fade lo yeke duti gbia daa,

¹⁵mbi baa azo so kue ayeke na fini si ala yeke tambula na ndö ti sese so, ala mu peko ti molenge so alondo ti le-gbia na peko ti kozo gbia ni.

¹⁶Azo so kue lo yeke na li ti ala awu ahon ndoni. Me azo so a du ala na peko ayeke wara ande ngia ndali ti gbia ni pepe. Ye so nga ayeke gi senge senge si ayeke tumbango peko ti pupu senge.

¹⁷Sara hange na tambula ti mo tongana mo yeke gue na da ti Nzapa. Mo gue ti ma tënë. So ayeke nzoni ahon mungo *sandaga tongana ti azo ti buba. Ala hinga ti ala atene, sioni laa ala yeke sara so pepe.