Read sango Zo ti bongbingo azo 6 Bible Online

Zo ti bongbingo azo 6 - sango bible

Zo ti bongbingo azo 6

¹Mbi kiri mbi baa na ndö ti sese so mbeni sioni ye; sioni ye ni ayeke kota mingi ndali ti azo.

²Nzapa amu na mbeni zo mosoro, na aye mingi, azo ayeke ne lo, aye so kue lo sara nzara ni, lo wara ni. Me Nzapa azia lege na lo ti te ye ni pepe, mbeni zo nde laa ayeke te ni. Ye so nga ayeke gi senge senge; so ayeke sioni ye mingi.

³Mbeni zo alingbi ti du amolenge ngbangbo oko si lo lango ngu mingi na ndö ti sese so. Me tongana lo duti nzoni pepe si a wara nzoni ndo ti lu kuâ ti lo daa pepe, mbi tene: molenge so a du lo na kuâ ni aduti nzoni ahon zo ni so.

⁴Biani, molenge ni aga senge senge; lo yeke hon na ya ti vukongo ndo si iri ti lo ayeke ngba gi na ya ti vukongo ndo.

⁵Ataa lâ, lo baa ni pepe, lo hinga nga ye oko daa pepe. Lo wu tere ti lo nzoni ahon mbeni zo ni so.

⁶Ataa zo ni asara ngu saki use, lo yeke duti nzoni pepe. Biani, ye kue ayeke hunzi gi na kuâ pepe?

⁷Akua so kue zo ayeke sara, lo yeke sara ni ndali ti kobe ti yanga ti lo. Me laoko nzara ni ahunzi na be ti lo pepe.

⁸Nyen laa zo ti ndara ahon zo ti buba na ni, nyen? Wayere so ahinga lege ti dutingo ni na popo ti azo, nzoni ye ti nyen laa lo wara daa, nyen?

⁹Titene zo abaa ye gi na le, so ayeke nzoni ahon titene lo sara nzara ni. Ye so nga ayeke gi senge senge si ayeke tumbango peko ti pupu senge.

¹⁰Ye so ayeke ando daa, iri ni ayeke daa si e hinga ye so iri ni zo. Lo lingbi ti gi tënë na lo so ayeke ngangu ahon lo pepe.

¹¹Dikongo gba ti atënë ayeke gi senge senge. Nzoni ye ti nyen laa zo ayeke wara daa, nyen?

¹²Fini ti zo ayeke hon tongana gbe ti de. Na ya ti akete lango so lo de na fini, fini so ayeke gi senge senge so, zo wa laa ahinga ye so ayeke nzoni ndali ti lo? Ye so ayeke si ande na peko ti lo na ndö ti sese so, zo wa laa ayeke fa peko ni na lo, zo wa?