Read sango Zo ti bongbingo azo 8 Bible Online

Zo ti bongbingo azo 8 - sango bible

Zo ti bongbingo azo 8

¹Zo wa laa ayeke tongana zo ti ndara? Zo wa laa ahinga ti fa nda ti tënë so: “Ndara ti zo asara si ndö ti le ti lo aza zango si kangango ndö ti le ti lo ahon”?

²Mbi tene: E ma yanga ti gbia ndali ti dengo ba so e de na dawa ti Nzapa.

³E zia gbia hio ti hon pepe; ye so ayeke ye ti sioni, e ngba na ya ni pepe, ngbanga ti so gbia ayeke sara ye so be ti lo aye.

⁴Biani, tënë ti gbia ayeke na ngangu; zo wa laa alingbi ti tene na lo: “Nyen laa mo yeke sara so?”

⁵Zo so asara ye alingbi na tënë ti ndia, fade sioni ye ayeke wara lo pepe. Zo ti ndara ahinga na be ti lo atene, na ngoi so a diko, fade fango ngbanga ayeke duti daa.

⁶Biani, ye oko oko ayeke na ngoi ti lo si ngoi ti fango ngbanga ti ye oko oko ayeke daa. Me kota mawa ayeke daa ndali ti zo:

⁷lo hinga ye so ayeke si ande pepe. Zo wa laa ayeke fa ande na lo lango so ye ni ayeke si?

⁸Zo oko ayeke na komandema na ndö ti fini ti lo pepe; pupu so ayeke mu na lo fini, lo lingbi ti gbanzi ni pepe. Zo oko ayeke na komandema na ndö ti lango ti kuâ ti lo pepe. Tongana bira aga, turugu oko alingbi ti gboto tere ti lo ti hon pepe. Zo ti sioni, fade sioni ti lo ni alingbi ti soo lo pepe.

⁹Aye so kue so, mbi baa ni, mbi gbu li ti mbi na ndö ti aye so kue azo ayeke sara na ndö ti sese so. Mbeni ngoi ayeke daa so zo ayeke na komandema na ndö ti mba ti lo ti sara sioni na lo.

¹⁰Tongaso mbi baa azo alu kuâ ti azo ti sioni. Ala yeke gue lakue na kota da ti Nzapa. Me na ya ti gbata, be ti azo agirisa na sarango ye ti ala. Ye so nga ayeke gi senge senge.

¹¹Zo so asara sioni, a yeke fâ ngbanga na li ti lo hio pepe. Ndani laa azo ayeke na nzara ti sara sioni.

¹²Zo ti siokpari alingbi ti sara sioni fani ngbangbo oko, ataa so kue lango ti fini ti lo angba ti gue yongoro. Me mbi hinga, mbi tene: “Azo so akpe mbeto ti Nzapa, fade ala yeke duti nzoni.

¹³Fade zo ti sioni ayeke duti nzoni pepe. Lo yeke hon hongo tongana gbe ti de; lango ti fini ti lo ayeke gue yongoro pepe, ngbanga ti so lo yeke kpe mbeto ti Nzapa pepe.”

¹⁴Me na ndö ti sese so, ambeni ye ti senge senge ayeke daa: sioni so a lingbi fade ti sara na azo ti sioni, a kiri a sara ni na azo ti mbirimbiri; nzoni so a lingbi fade ti sara na azo ti mbirimbiri, a kiri a sara ni na azo ti sioni. Mbi tene tënë ni awe: ye so nga ayeke gi senge senge.

¹⁵Ti mbi, mbi gonda dutingo na ngia, ngbanga ti so na ndö ti sese so, ye so ayeke nzoni ndali ti zo ayeke tengo ye na nyongo ye, dutingo na ngia; mbeni ye ti hon so ayeke daa pepe. Aye so kue ayeke na tere ti kua so lo baa pasi na sarango ni na ya ti alango ti fini ti lo so Nzapa amu na lo na ndö ti sese so laa.

¹⁶Mbi zia be ti mbi ti gi ti hinga nda ti ndara, ti baa ye so azo ayeke sara na ndö ti sese so. Mbi baa so, ataa zo ake ti lango na bi nga na kota lâ,

¹⁷lo lingbi ti hinga nda ti ye so Nzapa asara pepe. Lo lingbi ti sara kue ti gi nda ni, fade lo yeke hinga ni pepe. Ataa zo ti ndara atene ni hinga ye ni, lo lingbi ti hinga nda ni pepe.