Read sango Zo ti bongbingo azo 9 Bible Online

Zo ti bongbingo azo 9 - sango bible

Zo ti bongbingo azo 9

¹Biani, mbi gbu li ti mbi na ndö ti aye so kue si mbi baa ye so: azo ti mbirimbiri na azo ti ndara nga na akua so ala yeke sara ayeke na ya ti maboko ti Nzapa. Titene zo ahinga atene, fade a yeke ye lo wala a yeke ke lo, lege ni ayeke daa pepe. Aye kue alingbi ti si na lo.

²Ye kue ayeke gi legeoko ndali ti azo kue. Gi oko ye so ayeke si na zo ti mbirimbiri, gi ni laa ayeke si na zo ti sioni; gi ni laa ayeke si na zo so ayeke nzoni, zo so ayeke *nzoni na zo so ayeke *sioni; ye so ayeke si na zo so ayeke mu *sandaga, ayeke si nga na zo so ayeke mu sandaga pepe. Zo ti nzoni na zo ti siokpari, ye ti ala kue gi legeoko. Zo so adeba yanga ti lo na zo so asara mbeto ti deba yanga ti lo, ye ti ala nga gi legeoko.

³Na ndö ti sese so, mbeni sioni ye ayeke so: gi oko ye ayeke si na azo kue. Ndani laa be ti azo asi singo na aye ti sioni. So ala de na fini, ala sara ye tongana azo ti buba. Me na ndani, ala yeke gue na ndo ti akuâ.

⁴Azo so ade na fini laa alingbi ti zia be ti ala ti ku mbeni ye. Mbo so ade na fini ayeke nzoni ahon bamara so akui awe.

⁵Biani, azo so ade na fini ahinga atene, fade ala yeke kui. Me akuâ ahinga ye oko pepe; ti ala, ala yeke kiri ti wara futa pepe, ngbanga ti so be ti azo agirisa na ala awe.

⁶Yengo tere ti ala na kengo tere ti ala na kota be ti ala ahunzi awe. Aye so kue azo ayeke sara na ndö ti sese so, ala yeke ti ala na ya ni mbeni pepe.

⁷Tongaso, mo gue, mo te kobe ti mo na ngia, mo nyon vin ti mo na ngia na be ti mo, ngbanga ti so Nzapa ayeda na aye so mo sara awe.

⁸Ayeke nzoni mo yu apendere bongo lakue, mo girisa ti sara yombo na li ti mo pepe.

⁹Na ya ti akete lango so ayeke gi senge senge, sara ngia na wali ti mo so mo ye lo; ye so Nzapa amu na mo na ndö ti sese so na ya ti alango so ayeke gi senge senge laa. Ye so aga ti mo na popo ti akua so mo baa pasi na sarango ni na ndö ti sese so laa.

¹⁰Kua so kue mo yeke na ngangu ti sara, mo sara ni, ngbanga ti so na ndo ti akuâ so mo yeke gue ande daa, mbeni kua, wala gbungo-li, wala hingango ndo, wala ndara ayeke daa pepe.

¹¹Mbi kiri mbi baa ambeni ye na ndö ti sese so. Azo so ayeke kpe loro mingi, ala yeke so benda lakue pepe; akpengba zo ayeke kinda amba ti ala na bira lakue pepe. Azo ti ndara ayeke wara kobe ti tengo ni lakue pepe; azo ti hingango ndo ayeke wara mosoro lakue pepe; azo so ahinga ye mingi laa, azo ayeke gonda ala lakue pepe. Azo so kue so, mbeni lâ ala lingbi ti duti nzoni, mbeni lâ ye ti vundu alingbi ti si na ala.

¹²Lango so ye ti vundu ayeke si na zo, lo hinga ni pepe. Ye ti sioni ayeke wara azo biaku tongana ti so gbanda agbu susu, wala tongana ti so kuku agbu ndeke.

¹³Mbi kiri mbi baa mbeni ye na ndö ti sese so; ye ni ayeke kota ye mingi na le ti mbi na ndö ti tënë ti ndara:

¹⁴mbeni kete gbata ayeke ando daa; azo ti gbata ni ayeke mingi pepe. Mbeni lâ, mbeni kota gbia aga ti tiri bira na ala. Gbia ni na aturugu ti lo angoro gbata ni si ala leke angangu ye ti bira na tere ni.

¹⁵Na ya ti gbata ni, mbeni wayere so ayeke zo ti ndara ayeke daa. Lo laa lo lingbi fade ti soo gbata ni na lege ti ndara ti lo, me be ti azo ati na ndö ti wayere so pepe.

¹⁶Nilaa mbi tene, ndara ayeke nzoni ahon ngangu. Me tongana zo ti ndara ayeke wayere, azo ayeke baa ndara ti lo tongana mbeni ye oko pepe; ala yeke ma nga atënë ti lo pepe.

¹⁷Dutingo kpoo ti ma tënë so zo ti ndara atene, ayeke nzoni ahon mango tënë ti makonzi so lo dekongo na popo ti azo ti buba.

¹⁸Ndara ayeke nzoni ahon aye ti bira; me zo ti siokpari oko alingbi ti buba anzoni ye mingi.