Read sango B. ti abia 2 Bible Online

B. ti abia 2 - sango bible

B. ti abia 2

¹Mbi yeke kongo ti Saron mbi yeke pendere kongo ti apopo-hoto.

²Tongana pendere kongo na popo ti akamba ti ki, wali so mbi ye lo so ayeke tongaso na popo ti amaseka-wali.

³Tongana keke ti pome na popo ti akeke ti gbako, kamba ti be ti mbi ayeke tongaso na popo ti amaseka-koli. Mbi ye ti duti na gbe ti de ti lo; le ti keke ti lo anzere nzerengo na yanga ti mbi.

⁴Lo mu mbi, lo gue na mbi na ya ti da ti matanga, ye so a su na nduzu na yanga ti da ni ayeke “Mbi ye mo”.

⁵Ala mu na mbi agatoo ti ale ti vinye, ala mu na mbi anzerengo le ti keke, mbi te si amu na mbi ngangu, ngbanga ti so yengo so mbi ye mo so asara mbi kobela.

⁶Maboko ti lo ti wali ayeke lango na gbe ti li ti mbi si maboko ti lo ti koli agbu mbi na tere ti lo.

⁷Ala amaseka-wali ti Jérusalem, mbi voro ala na iri ti adengbe nga na iri ti awuga ti ngonda, wali ti mbi so mbi ye lo so, ala zingo yengo tere pepe, ala zingo yengo tere so ayeke na be ti mbi so pepe kozo titene yengo tere ni ayeda.

⁸So go ti kamba ti be ti mbi laa mbi yeke ma so! Baa, lo laa lo yeke ga so! Lo yeke huru na ndö ti akota hoto, lo yeke huru na ndö ti akete hoto.

⁹Kamba ti be ti mbi ayeke tongana dengbe, lo yeke tongana molenge ti wuga. Baa, lo laa lo yeke na peko ti dere ti da ti e so, lo yeke baa ndo na le ti fenetere, lo yeke baa ndo na popo ti wen ti le ti fenetere.

¹⁰Kamba ti be ti mbi atene na mbi, lo tene: “Wali ti mbi so mbi ye mo so, londo, mo ga si!

¹¹Biani, ngoi ti de ahon awe; ngu-Nzapa akai awe, ahon awe.

¹²Akongo asigigi na ndö ti sese, ngoi ti hengo bia asi awe. Azo ayeke ma toto ti ambipa na ya ti ngonda.

¹³Ale ti keke ti fige abe awe si kongo ti yaka ti vinye afun amu ndo kue. Wali ti mbi so mbi ye mo so, mo so mo yeke pendere mingi so, londo, mo ga si!

¹⁴Mbipa ti mbi, mo so mo honde tere ti mo na ya ti adu ti têne so asuru so, na popo ti atêne so ayo na nduzu so, fa na mbi le ti mo, mbi baa si! Tene tënë, mbi ma go ti mo si! Biani, go ti mo apendere mingi si le ti mo apendere mingi.”

¹⁵Ala gbu na e anyama ti gbungo kondo, akete nyama ti gbungo kondo so ayeke buba ayaka ti vinye so. Andaa ngoi so ayaka ti vinye ti e amu kongo laa.

¹⁶Kamba ti be ti mbi ayeke ti mbi si mbi yeke ti lo. Lo gue na anyama ti lo ti te pere na popo ti akongo.

¹⁷Kozo titene pupu ti lakui alondo si gbe ti de ahon, mo kamba ti be ti mbi, mo kiri ma! Mu loro tongana dengbe, tongana molenge ti wuga na ndö ti ahoto so akangbi tere.