Read sango B. ti abia 3 Bible Online

B. ti abia 3 - sango bible

B. ti abia 3

¹Na ndö ti gbogbo ti mbi na bi, mbi gi lo so be ti mbi aye lo mingi, mbi gi lo, me mbi wara lo pepe.

²Fade mbi yeke londo, mbi yeke hon na ya ti gbata, na ndö ti alege nga na le ti akodro. Fade mbi yeke gi lo so be ti mbi aye lo; mbi gi lo, me mbi wara lo pepe.

³Asanziri so ayeke hon na ya ti gbata awara mbi si mbi hunda ala, mbi tene: “Lo so be ti mbi aye lo so, ala baa lo?”

⁴Mbi hon gi kete si mbi wara lo so be ti mbi aye lo so. Mbi gbu lo, maboko ti mbi angba na tere ti lo, mbi gue na lo ngbii na ya ti da ti mama ti mbi, na ya ti kubu so mama ti mbi amu ngo ti mbi daa.

⁵Ala amaseka-wali ti Jérusalem, mbi voro ala na iri ti adengbe nga na iri ti awuga ti ngonda, ala zingo yengo tere pepe, ala zingo yengo tere so ayeke na be ti mbi so pepe kozo titene yengo tere ni ayeda.

⁶Zo wa laa alondo na benyama si lo yeke ga tongana ngbongboro guru so? Zo wa laa asara na tere ti lo yombo ti *mire, ti dukani nga na ayombo ti azo ti dengo buze ti kodro wande so?

⁷Baa tipoi ti Salomon laa; angangu turugu baleomene angoro ni kue, angangu turugu ti Israel.

⁸Ala kue ayeke na yongoro zeme, ala manda lege ti tiringo bira nzoni. Zo oko oko akanga yongoro zeme ti lo na ngbonda ti lo ti bata na tere ti lo ndali ti sioni ti bi.

⁹Gbia Salomon atene na azo ti sara tipoi ti lo ti dutingo daa na keke ti Liban.

¹⁰Lo mu yanga si a sara gere ni na wen ti nginza, a sara peko ni na lôro, a leke ya ti tipoi ni na pendere bengba bongo. Amaseka-wali ti Jérusalem aleke nzoroko na ya ni ndali ti so ala ye lo mingi.

¹¹Ala amaseka-wali ti Sion, ala ga, abaa gbia Salomon. Lo yu kpoto ti gbia so mama ti lo amu na lo na lango ti mungo wali ti lo. Na lango ni so be ti lo asi singo na ngia.