Read sango B. ti abia 7 Bible Online

B. ti abia 7 - sango bible

B. ti abia 7

¹Sulamite, mo kiri, mo kiri, mo kiri si e lingbi ti baa mo. Ngbanga ti nyen ala ye ti baa Sulamite na ngoi so lo yeke dodo si bongbi use ti azo ayeke baa lo so?

²Molenge ti gbia, gere ti mo apendere mingi na ya ti poro ti mo! Ndö ti ngbonda ti mo ayeke tongana aye ti go so zo ti lekengo ye na kode laa aleke ni.

³Turungu ti mo ayeke tongana mbeni kangu so nzoni vin alingbi ti hunzi na ya ni pepe. Ya ti mo apendere tongana gba ti *ble so kongo angoro tere ni kue.

⁴Ame ti mo use ayeke tongana amolenge use ti wuga, ayeke tongana amolenge ti dengbe so a du ala angbo.

⁵Go ti mo ayeke tongana da so a leke ni pendere mingi na pembe ti doli. Le ti mo aza tongana le ti ngu ti Heshebon so ayeke na yanga ti kota gbata ni. Hon ti mo apendere tongana da ti Liban so ayeke bata ndo si abaa ndo le na le na Damas.

⁶Li ti mo aluti na nduzu tongana hoto ti Karmel. Kua ti li ti mo ayeke za tongana bengba bongo; tongana mbeni gbia abaa ni, be ti lo kue angba gi daa.

⁷Mo pendere mingi, mo pendere ahon ndoni, mo so mbi ye mo mingi so, mo so mo yeke zia ngia na be ti mbi so!

⁸Tere ti mo aluti mbirimbiri tongana keke ti mburu; ame ti mo apendere tongana ali ti mburu ni.

⁹Mbi tene: “Fade mbi yeke ko na ndö ti keke ti mburu, mbi yeke ro ale ti mburu ni.” Ayeke nzoni ame ti mo aduti ndali ti mbi tongana gba ti ale ti vinye si fungo ti pupu ti hon ti mo afun pendere tongana anzoni le ti keke.

¹⁰Mbi su yanga ti mo, asara mbi tongana nzoni vin! Biani, nzoni vin so a bata ndali ti kamba ti be ti mbi, anzere na yanga ti e so e yeke lango.

¹¹Ti mbi, mbi yeke ti kamba ti be ti mbi si be ti lo kue ayeke gi na mbage ti mbi.

¹²Mo kamba ti be ti mbi, mo ga si! E sigigi, e gue na yaka, e gue, e lango na kete kodro.

¹³Na kota ndaperere, fade e yeke gue na ayaka ti vinye ti baa wala afini maboko asigigi na tere ti keke ni awe, ti baa wala akete kete kugbe asigigi daa, wala akeke ti grenade amu kongo awe. Kâ, fade mbi yeke sara ngia na tere ti mo.

¹⁴Fungo ti amandragore afun pendere amu ndo kue. Na yanga ti da ti e, e yeke na anzoni le ti keke nde nde, afini ni na angbene ni. Mbi bata ni ndali ti mo, kamba ti be ti mbi.