Read sango Ésaïe 13 Bible Online

Ésaïe 13 - sango bible

Ésaïe 13

¹Nengo tënë na ndö ti Babilone; ye so Ésaïe, molenge ti Amoz abaa na ya ti mbeni ye tongana bango-li.

²*KOTA GBIA atene: “Na ndö ti hoto so ndö ni ayeke senge, ala ya bendere na nduzu, ala dekongo na aturugu, ala sara maboko na ala titene ala ga na yanga ti da ti akota zo.

³Mbi wani, mbi mu yanga na azo so mbi zia ala nde ndali ti mbi. Mbi iri akpengba turugu ti mbi, ala so ayeke wara ngia na lege ti nengo ti mbi; mbi iri ala titene ala fa ngonzo ti mbi.”

⁴Ala ma go ti azo na ndö ti hoto, go ni ayeke tongana go ti gba ti azo. Ala ma wusuwusu na ya ti akodro-gbia, amara nde so abongbi ayeke sara wusuwusu. KOTA GBIA so ayeke na ndö ti dunia kue ayeke hon ti baa aturugu ti lo oko na oko so ayeke gue ti tiri bira.

⁵Aturugu ni alondo na kodro yongoro si aga, ala londo yongoro kâ na nda ti sese. KOTA GBIA na azo so ayeke fa ngonzo ti lo ayeke ga ti buba kodro ni kue.

⁶Ala dekongo na vundu maa! *Lango ti KOTA GBIA aga nduru awe; lango ni ayeke tongana mbeni kota kpale so ayeke buba ndo kue; kpale ni alondo na lo so ngangu ti lo ahon angangu kue.

⁷Ndani laa amaboko kue awoko, be ti zo oko oko afun kue.

⁸Kota mbeto agbu ala, gere ti ala akui, ya ti tere ti ala aso songo. Ala yeke ba tere ti ala tongana wali so ayeke du molenge. Ala yeke baa le ti tere si li ti ala kue akpe, le ti ala kue gi na ngonzo.

⁹Baa lango ti KOTA GBIA ayeke ga, lango so ayeke baa mawa ti zo pepe, lango ti sioni ngonzo, lango ti ngonzo ti wâ. Lango ni ayeke sara si sese aga ngonda, ayeke fâ azo ti siokpari kue.

¹⁰Fade atongoro ti le ti nduzu na ala so abongbi tere na ndo oko ayeke kiri ti za pepe. Gi na sigingo ti lâ tongaso, le ti lâ ni ayeke vuko si nze ayeke kiri ti su pepe.

¹¹KOTA GBIA atene: “Fade mbi yeke fâ ngbanga na ndö ti azo ti dunia ndali ti sioni ti ala, na ndö ti azo ti sioni ndali ti sioni ti ala. Mbi yeke kai baba ti azo ti sioni yanga, mbi yeke hunzi baba ti azo ti nikango amba ti ala.

¹²Mbi yeke sara titene warango zo aga ngangu tongana warango lôro ti nzoni ni, wala warango lôro ti Ofir.”

¹³Ndani laa, fade yayu ayeke yingi si gere ti sese ayeke do na lege ti ngonzo ti KOTA GBIA so ayeke na ndö ti dunia kue, na lango so ngonzo ti lo ni ayeke londo tongana wâ.

¹⁴Tongaso, tongana dengbe so zo ayeke tumba peko ti lo, tongana ataba so zo ti batango ala ayeke daa pepe, fade zo oko oko ayeke mu lege ti gue na mbage ti azo ti lo, zo oko oko ayeke kpe ti kiri na kodro ti lo.

¹⁵Azo so kue a yeke wara ala, fade a yeke kpo ya ti ala na likongo, azo so kue a yeke gbu ala, a yeke fâ ala na yongoro zeme.

¹⁶A yeke do ya ti amolenge ti ala taa na le ti ala, a yeke nzi aye ti da ti ala, a yeke gbu awali ti ala na ngangu ti lango na ala.

¹⁷KOTA GBIA atene: “Mbi yeke tokua azo ti mara ti Medii na tere ti ala; azo ni ayeke sara nzara ti nginza pepe, ala yeke nga na nzara ti lôro pepe.

¹⁸Ala yeke fâ amaseka na kokora ti ala, akete molenge so a du ala fini ni, azo ni ayeke zia ala pepe; mawa ti amolenge ayeke sara ala pepe.”

¹⁹Babilone, gbata so apendere ahon ambeni gbata ti kodro ni, azo ti Babilone ayeke pika kate ti ala ndali ni, fade Nzapa ayeke buba ni tongana ti so lo buba ando agbata ti Sodome na Gomore.

²⁰Zo ayeke kiri ti lango na gbata ti Babilone pepe; ngu na ngu, zo ayeke kiri ti duti daa pepe. Ataa azo ti tambulango ka na benyama, ala yeke kiri ti sara ada ti ala ti bongo kâ pepe; ataa azo ti batango nyama, ala yeke sara si anyama ti ala alango kâ pepe.

²¹Me anyaû ti ngonda laa ayeke lango kâ, andeke ti bi ayeke si singo na ya ti ada ti azo ni. *Anaamo ayeke lango na ya ti gbata ni, angasa ayeke dodo na ya ni.

²²Agbongo ayeke lango na ya ti ayangbo ti gbata ni si *anzagua ayeke lango ti ala na ya ti akota da ti ngia ti gbata ni. Ngoi ti Babilone aga nduru awe, lango ni asi awe; a yeke kiri ti zia mbeni lango na ndö ni pepe.