Read sango Ésaïe 15 Bible Online

Ésaïe 15 - sango bible

Ésaïe 15

¹Nengo tënë na ndö ti Moab. Gbata ti Ar-Moab, a buba ni gi na bi ni oko, ye oko angba na ya ni pepe. Gbata ti Kir-Moab, a buba ni gi na bi ni oko, ye oko angba na ya ni pepe.

²Azo ti Dibon ague ti toto na ndo so a leke na nduzu ti voro anzapa nde daa. Na Nebo nga na Medeba, azo ti Moab ayeke he bia ti demango tere. A kio kua ti li ti azo kue, a fâ kua ti yanga ti azo kue.

³Na ndö ti abalabala, azo ayu bongo ti mua. Na li ti ada nga na ndo so gba ti azo ayeke wara tere daa, azo kue ayeke he abia ti demango tere si ala yeke toto.

⁴Na Heshebon nga na Elale, azo ayeke dekongo; azo angba kâ na Yahas ama go ti ala. Ndani laa aturugu ti Moab adekongo, be ti ala awoko kue.

⁵Mbi dema na vundu ndali ti Moab. Azo ni akpe ngbii asi na Soar nga na Eglat-Selisia. Ala yeke toto si ala yeke ma hoto ti Luhit. Na lege ti guengo na Horonaim, ala yeke dekongo, atene: “Ye kue abuba awe!”

⁶Ngu ti Nimrim ahole kue; pere ahole, pere ni akiri asigigi pepe, fini pere ayeke daa mbeni pepe.

⁷Ndani laa anzoni ye so angba, aye so ala bata, ala mu, afâ ngu ti Akeke-ti-yanga-ti-ngu na ni.

⁸Na tere ti sese ti Moab kue, azo ayeke dekongo. Abia ti demango tere ti ala ague ngbii asi na Eglaim, ague ngbii asi na du ti ngu ti Elim.

⁹Ngu so ayeke na Dimon asi singo na mene. *KOTA GBIA atene: “Mbi yeke kiri ti tokua mbeni kpale na Dimon: fade bamara ayeke ga na tere ti tanga ti azo ti Moab so akpe, ala so angba na fini na ya ti kodro ni.”