Read sango Ésaïe 17 Bible Online

Ésaïe 17 - sango bible

Ésaïe 17

¹Nengo tënë na ndö ti Damas. Baa, Damas ayeke kiri ti ngba gbata pepe, gi gba ti atêne laa ayeke ngba.

²Agbata so ayeke na gbe ti Damas, fade ayeke ngba senge senge biani biani. Agbata ni ayeke ga ndo so ataba na angasa ayeke te pere daa si ala yeke lango daa, zo oko ti zia mbeto na be ti ala ayeke daa pepe.

³Gbagba ti bira so ayeke na tere ti Efraim ayeke kiri ti ngba pepe, gbia ayeke kiri ti ngba na Damas pepe. Tanga ti azo ti Sirii so angba so, ala yeke kpa nga ye oko pepe tongana azo ti Israel. So tënë ti yanga ti *KOTA GBIA so ayeke na ndö ti dunia kue laa.

⁴Na lango ni so, nengo ti Israel ayeke ti na gbeni; lo so lani lo kono konongo so, lo yeke kiri ti nge ngengo.

⁵Lango ni so ayeke duti tongana lango na peko ti so zo afâ ale ti kobe, lo bongbi ale ti ble si lo kanga agba ti le ni awe. Biani, ayeke duti tongana lango na peko ti so zo abongbi ale ti kobe awe na popo-hoto ti azo ti mara ti Refa.

⁶Azo kete laa ayeke ngba na Israel tongana ti so ale ti keke ayeke ngba gi kete na ya ti keke, tongana ti so zo afâ ale ti olive awe, gi ale ni use wala ota laa ayeke ngba na li ti keke ni, wala ale ni osio wala oku laa ayeke ngba na tere ti amaboko ti keke ni. So tënë ti yanga ti KOTA GBIA, Nzapa ti Israel laa.

⁷Na lango ni so, azo ayeke baa ndo na mbage ti lo so lo sara ala, ala yeke yo le ti ala na nduzu na mbage ti Nzapa ti Israel so ayeke nde si ayeke nzoni kue.

⁸Ala yeke kiri ti baa ndo pepe na mbage ti agbalaka so maboko ti ala wani asara. Akeke so ala leke aluti na nduzu si ala yeke voro ni, wala ata ti wen so ala zia nde titene ala zö dukani na ya ni, ala yeke kiri ti baa ndo daa pepe.

⁹Na lango ni so, agbata so a sara gbagba ti bira na tere ni, fade azo ayeke do ni azia tongana ti so azo ado ando agbako nga na ali ti ahoto azia na gango ti azo ti Israel. Agbata ni ayeke ga ngonda.

¹⁰Biani, Israel, be ti mo agirisa na Nzapa, wasongo mo awe. Lo so lo yeke Kota Têne, ndo so mo kpe daa ti bata tere ti mo, mo dabe ti mo na lo mbeni pepe. Ndani laa mo sara si apendere kongo amai, mo lu ale ti kobe ti awande.

¹¹Lango so mo lu na aye ni, mo yeke baa ni ayeke kono; gi na ndaperere, ye so mo lu so, mo baa ni ayeke mai. Me na ngoi so mo ye ti fâ ale ni, ale ni ahon awe, yoro ti kai na kobela ayeke daa pepe.

¹²So mawa ti nyen! Gba ti amara ayeke sara wusuwusu, wusuwusu ni ayeke tongana toto ti kota ngu-ingo. Amara nde ayeke sara wusuwusu, wusuwusu ni ayeke tongana toto ti ngu so ayeke sua ngangu.

¹³Wusuwusu ti amara nde ayeke tongana toto ti kota ngu. *KOTA GBIA asuku na ala, ala kpe yongoro, lo tumba ala tongana holengo pere so pupu ti li ti hoto ahon na ni, tongana fuku ti sese so kota pupu ahon na ni.

¹⁴Na lakui, ala yeke zia kota mbeto na be ti azo; me kozo titene ndo ahan, mbeni ye oko akiri angba pepe. Azo so ayeke gbu aye ti e, baa ye so ayeke si ande na ala laa; azo so ayeke nzi aye ti e, baa ye so ayeke si ande na ala laa.