Read sango Ésaïe 21 Bible Online

Ésaïe 21 - sango bible

Ésaïe 21

¹Nengo tënë na ndö ti benyama so ayeke nduru na kota ngu-ingo. Tongana ti so kota pupu afâ ya ti sese ti mbage ti Mbongo, wato alondo na benyama si ayeke ga, lo londo na kodro so ayeke zia mbeto na be ti azo.

²Na ya ti mbeni ye tongana bango-li, mbi baa mbeni ye so ayeke sioni mingi: zo so lani ayeke na ya ti *mbuki, lo ga zo ti kango azo, zo ti bubango ye ayeke sara kua ti lo. *KOTA GBIA atene: “Azo ti Elam, ala londo na bira ma! Azo ti Medii, ala ngoro gbata ni na bira! Mbi yeke sara titene dema kue akai.”

³Ndani laa tere ti mbi ayeke do na mbeto, tere ti mbi ayeke so tongana ti wali so aga nduru ti du. Ye so mbi ma so asara si li ti mbi aga kirikiri, ye so mbi baa so azia kota mbeto na be ti mbi.

⁴Li ti mbi aga kirikiri, mbeto ahon ndö ti mbi. Mbi yeke ku fade lakui ti wu pupu, me lakui ni akiri aga ye ti zia kota mbeto na be ti mbi.

⁵A leke meza awe, a zia asanziri ti baa ndo, azo ayeke te, ala yeke nyon. Mo ye ti baa, mbeni zo adekongo: “Aturugu ti kota kamba, ala londo! Ala zia mafuta na tere ti *avala ti ala!”

⁶Biani, KOTA GBIA atene tënë tongaso na mbi: “Gue, mo zia sanziri titene lo tene tënë ti ye so fade lo yeke baa.

⁷Tongana lo baa pusu ti mbarata so ambarata use laa ayeke gboto ni, wala lo baa mbeni zo na ndö ti lele, wala lo baa mbeni zo na ndö ti *zambala, alingbi sanziri ni asara hange, le ti lo akpengba nganganga!”

⁸Sanziri ni adekongo, atene: “Kota zo, mbi ngba na ndo ti kua ti mbi na kota lâ kue, mbi luti na yanga ti kua ti mbi na bi kue.

⁹Ala baa, mbeni koli ayeke ga, lo duti na ndö ti pusu ti mbarata so ambarata use laa ayeke gboto ni. Lo kiri lo dekongo, lo tene: ‘Babilone ati awe! Babilone ati awe! Ayanda kue ti anzapa so ayeke na ya ti gbata ni ayeke lango na sese; ya ni afâ kete kete.’ ”

¹⁰Ala azo ti mbi so a pika ala tongana *ble na ndö ti lakere so, tënë so mbi ma na yanga ti KOTA GBIA so ayeke na ndö ti dunia kue, Nzapa ti Israel, tënë ni laa mbi yeke fa na ala so.

¹¹Nengo tënë na ndö ti Duma. Ti londo na Seir, mbeni go adekongo na mbi, atene: “Sanziri, bi aga nduru ti hunzi awe? Sanziri, bi aga nduru ti hunzi awe?”

¹²Sanziri ni akiri tënë: “Ndo ayeke han si na pekoni, ndo ayeke kiri ti vuko. Tongana ala ye ti kiri ti hunda ndo, ala hunda senge! Ala lingbi ti kiri ti ga mbeni lâ.”

¹³Nengo tënë na ndö ti Arabii. Ala azo ti Dedan so ayeke tambula na lege so, ala yeke lango ande na benyama ti Arabii.

¹⁴Ala azo so ayeke lango na Tema, ala mu ngu ague na ni na azo so nzara ti ngu ayeke sara ala; ala gue na kobe na azo so ayeke kpe.

¹⁵Biani, azo ni akpe bira, ala kpe yongoro zeme so ayeke nduru ti fâ ala, ala kpe kokora so a gboto na tere ti ala, ala kpe kpale so bira ayeke ga na ni.

¹⁶Biani, *KOTA GBIA atene tënë tongaso na mbi: “Na ya ti ngu oko, so ti tene mbeni lango oko ayeke ti na ndö ni pepe, fade gonda ti Kedar ayeke hunzi.

¹⁷Na popo ti gba ti azo ti pikango kokora nga na angangu turugu ti Kedar, gi azo kete laa ayeke ngba ande.” Tënë so KOTA GBIA, Nzapa ti Israel atene laa.