Read sango Ésaïe 23 Bible Online

Ésaïe 23 - sango bible

Ésaïe 23

¹Nengo tënë na ndö ti Tir. “Ala amangboko ti Tarsis, ala he bia ti demango tere! Biani, a buba ndo ti lutingo ti amangboko ti Tir awe, ada ayeke daa mbeni pepe.” So ala londo na zoa ti Shipre, ala kiri laa ala ma tënë ni.

²“Ala duti kpoo, ala azo so ayeke lango na tere ti ngu so, ala azo ti dengo buze ti gbata ti Sidon, ala so ayeke tokua azo ti ala ti vo ye

³na le ti kota ngu-ingo so. Kobe so azo ayeke lu ando na yanga ti ngu ti Nil, kobe so azo ayeke fâ na yanga ti *bale, aye ni kue ayeke ga ti Sidon. Gbata ni ayeke ando gara ti amara nde.”

⁴Mo gbata ti Sidon, kamene agbu le ti mo awe, mo so mo yeke ngangu gbagba na tere ti kota ngu-ingo so! Biani, kota ngu-ingo atene: “Mbi ke titene ya ti mbi aso, mbi ke ti du molenge. Mbi ye ti bata amolenge-koli pepe, mbi ye ti sara si amolenge-wali aga zo pepe.”

⁵Na ndembe so Ezipte ayeke ma tënë ni ande, kota vundu ayeke gbu be ti ala, tongana ti so lani vundu agbu be ti ala na mango tënë ti tingo ti gbata ti Tir.

⁶Ala fâ kota ngu-ingo ni ngbii ala si na Tarsis; ala azo so ayeke lango na tere ti ngu so, ala he bia ti demango tere!

⁷Taa gbata ti ala so laa? Gbata so azo ayeke sara ando ngia mingi daa, gbata so abaa gigi aninga awe si ayeke tokua azo ti gue ti zia ando ti dengo buze na ya ti ambeni kodro yongoro so?

⁸Zo wa laa amu yanga si a sara ye tongaso na tere ti Tir, zo wa? Tir so ayeke kangbi ando kpoto ti gbia na azo, azo ti dengo buze ti lo ayeke amolenge ti gbia, azo ti dengo buze ti lo ayeke akota zo ti dunia so.

⁹*KOTA GBIA so ayeke na ndö ti dunia kue laa aleke na be ti lo ti mingo baba ti azo so azo ayeke gonda ala, ti bi kamene na le ti akota zo ti dunia so.

¹⁰Mo Tir, mo fâ yaka na sese ti mo, tongana ti so a yeke sara na tere ti *bale ti Nil, ngbanga ti so ndo ti lutingo ti amangboko ayeke daa mbeni pepe.

¹¹KOTA GBIA asuku ngangu na kota ngu-ingo; lo sara si akodro ti agbia ayingi, lo mu yanga si a kungbi agbagba ti bira ti Kanaan.

¹²Lo tene: “Ala azo ti Sidon, ngia ti ala ahunzi awe, ala yeke tongana maseka-wali so koli asuru lo awe. Ataa ala gue, afâ kota ngu-ingo ngbii ala si na Shipre, kâ, ala lingbi nga ti wu tere ti ala pepe.

¹³Ala baa kodro ti azo ti Babilone: azo ni ayeke daa mbeni pepe. Asirii asara si kodro ni aga ndo ti anyama ti ngonda. Azo ti Asirii aleke ada so ayo na nduzu ti tiri bira na kodro ni, ala kungbi ayangbo ti kodro ni, ala sara si kodro ni aga ndo ti gba ti atêne.

¹⁴Ala amangboko ti Tarsis, ala he bia ti demango tere, ngbanga ti so a buba ngangu gbagba ti ala awe.”

¹⁵Na lango ni so, fade be ti azo ayeke girisa na Tir na ya ti ngu balembarambara, ngu so alingbi na lango ti fini ti mbeni gbia. Na peko ti ngu balembarambara ni, tënë so a he na ya ti bia so na tere ti wali-ndumba ayeke si na Tir:

¹⁶Mo wali-ndumba, mo so be ti azo agirisa na mo awe so, mo mu kundi ti mo, mo tambula mo ngoro gbata ni. Mo pika kundi ni nzoni, mo he abia gbani gbani titene azo akiri adabe ti ala na mo.

¹⁷Na peko ti ngu balembarambara ni, fade KOTA GBIA ayeke ga na mbage ti Tir. Gbata ni ayeke kiri ti wara nginza na lege ti sarango aye ti ndumba na akodro-gbia ti dunia.

¹⁸Me aye so gbata ni ayeke wara nga na futa ti lo, a yeke zia ni nde ndali ti KOTA GBIA. A yeke bongbi ni pepe, a yeke bata ni pepe. Aye so lo wara so, a yeke vo na kobe na azo so ayeke duti na dawa ti KOTA GBIA, ala te ya ti ala asi; a yeke vo nga na apendere bongo na ala.