Read sango Ésaïe 24 Bible Online

Ésaïe 24 - sango bible

Ésaïe 24

¹*KOTA GBIA ayeke buba sese kue, lo yeke buba aye ti ndö ni kue. Lo yeke sara titene aye ti ndö ti sese asanze, lo yeke kangbi azo ti ndö ti sese ni kirikiri.

²Ye so ayeke si na wayango-sandaga, gi ni laa ayeke si na senge zo; ayeke si na wa ti zo ti kua nga na zo ti kua ti lo; ayeke si na wali so ayeke wa ti zo ti kua nga na zo ti kua ti lo ti wali; ayeke si na zo ti kango ye nga na zo ti vongo ye; ayeke si na zo ti mungo yongo na amba ti lo nga na zo so ahunda yongo ni; ayeke si na zo so ayeke mu ye na amba ti lo ti wara mbeni ye na ndö ni nga na zo so afuta ye si azia mbeni na ndö ni.

³Sese abuba biani biani awe; azo anzi aye ti sese ni kue ahon na ni. Biani, ye ni asi alingbi na peko ti tënë ti yanga ti KOTA GBIA.

⁴Sese ayeke na mua, abuba kue. Dunia ati biani biani si ayeke buba. Le ti nduzu na sese ati legeoko.

⁵Azo so alango na ndö ti sese asara si sese ni aga sioni, ngbanga ti so ala do andia na gbe ti gere ti ala, ala sanze atënë ti ndia, ala ke tënë ti *mbuki so abongbi ala na Nzapa lakue lakue.

⁶Ndani laa Nzapa adeba sese ni si abuba, azo so alango na ndö ni ayeke wara ye ti peko ti sioni ti ala, ala yeke kui si ala ngba gi kete.

⁷Fini vin ayeke na mua, keke ti *vinye ahole kue; azo so kue be ti ala ayeke lani na ngia, ala yeke dema fadeso.

⁸Toto ti ngo so ayeke zia lani ngia na be ti azo akai awe, dekongo na ngia ti azo ahunzi awe, toto ti kundi so ayeke zia ngia na be ti azo akai awe.

⁹Azo akiri ahe bia pepe ti nyon na vin, angangu samba asee sengo na yanga ti azo ti nyongo ni.

¹⁰Gbata so abuba kue so ati awe, lege ti li na ya ti ada ayeke daa mbeni pepe.

¹¹Na ndö ti alege, azo ayeke toto tere ti ala, ngbanga ti so vin atia, ngia kue ahunzi awe, nzerengo tere ahon na ya ti kodro ni.

¹²Na ya ti gbata ni, gi gba ti atêne laa angba, yanga ti gbagba ni akungbi awe, abuba kue awe.

¹³Biani, na ndö ti sese, na popo ti amara, ye ayeke ngba gi kete tongana ti so ale ti keke ti olive ayeke ngba gi kete na ya ti keke ni na peko ti so a fâ ale ti olive ni awe, tongana ti so a fâ ale ti vinye si ahunzi awe.

¹⁴Tanga ti azo so angba na fini amu go ti ala na nduzu ti he bia, ala yeke fa gonda ti *KOTA GBIA; ala londo na ya ti akodro ti mbage ti Do si ayeke ga, ala yeke dekongo na ngia, ala tene:

¹⁵“Ala so ayeke na mbage ti To, ala gonda KOTA GBIA. Ala so ayeke na ya ti azoa ti kota ngu-ingo, ala he bia ti gonda na iri ti KOTA GBIA, Nzapa ti Israel.”

¹⁶Na nda ti sese kâ, e yeke ma bia so: “Gonda na Nzapa so ayeke mbirimbiri!” Ti mbi, mbi tene: “Ti mbi ahunzi awe! Ti mbi ahunzi awe! So mawa na mbi!” Azo ti kango zo ayeke sara kua ti ala. Ala yeke ka amba ti ala! Azo ti kango zo ayeke sara kua ti ala.

¹⁷Kota mbeto, kota du na gbanda, ye so ayeke ndali ti ala, azo ti sese so.

¹⁸Zo so ayeke kpe dekongo so ayeke zia kota mbeto na be ti zo, lo yeke ti na ya ti kota du; zo so ayeke londo ya ti du ni ti sigigi, lo yeke ti na ya ti gbanda. Fenetere ti yayu azi kota, gere ti sese ayingi.

¹⁹Sese ayeke suru kirikiri, ayeke sungba si ayeke yingi ngangu.

²⁰Sese ayeke hon mbage na mbage tongana zo so samba ahon ndö ti lo, ayeke yingi tongana mbeni kete da. Siokpari ti azo ane na ndö ti lo si lo ti, lo lingbi ti londo pepe.

²¹Na lango ni so, fade *KOTA GBIA ayeke ga na tere ti aye mingi mingi ti yayu; lo yeke ga na tere ti agbia ti sese.

²²Fade a yeke bongbi ala tongana azo ti kanga ti zia ala na ya ti kota du. A yeke zia ala na da ti kanga. Lango mingi na pekoni, ala yeke fa peko ti ye so ala sara na le ti ngbanga.

²³Le ti nze ayeke be na kamene, kamene ayeke gbu le ti lâ. Biani, KOTA GBIA so ayeke na ndö ti dunia kue, lo yeke duti gbia na Jérusalem nga na ndö ti hoto ti *Sion. Gonda ti lo ayeke za na dawa ti *akangba ti gbata ni.