Read sango Ésaïe 26 Bible Online

Ésaïe 26 - sango bible

Ésaïe 26

¹Na lango ni so, na kodro ti Juda, azo ayeke he bia so: “Gbata ti e ayeke ngangu gbata. *KOTA GBIA asara gbagba ti ya ni na gbagba ti use ni na tere ni ti bata na e.

²Alingbi ala zi ayanga ti gbagba ni si mara so ama yanga ti Nzapa, mara so asara ye alingbi na tënë ti lo, alingbi ti li na ya ti gbata ni.

³Na zo so be ti lo aduti kpoo, KOTA GBIA, mo yeke mu na lo siriri, ngbanga ti so lo zia be ti lo na ndö ti mo.

⁴Ala zia be ti ala na ndö ti KOTA GBIA lakue lakue, ngbanga ti so KOTA GBIA ayeke tongana kota têne so aluti kpu na kpu.

⁵Azo so lani alango na ndo so ayeke na nduzu, lo kinda ala na sese; gbata so zo alingbi ti li daa pepe, lo kungbi ni na sese, lo sara si alango na ya ti fuku ti sese.

⁶Awayere na asenge zo ayeke do gbata ni na gbe ti gere ti ala.”

⁷*KOTA GBIA, zo ti mbirimbiri, lege ti lo ayeke mbirimbiri; mo yeke sara si lege ti zo ti mbirimbiri aba pepe.

⁸Biani, KOTA GBIA, lege so mo mu yanga titene e hon daa, e zia be ti e ti ku mo. Ye so nzara ni agbu be ti e ayeke ti dabe ti e na mo.

⁹Na bi, be ti mbi ayeke na nzara ti mo, mbi yeke gi mo na be ti mbi kue. Tongana mo fâ ngbanga ti mo na li ti azo ti sese so, azo ti dunia ayeke manda ti sara ye ti mbirimbiri.

¹⁰Me tongana a de ngbanga na li ti azo ti sioni pepe, ala yeke manda ti sara ye ti mbirimbiri pepe. Ataa kodro so a yeke sara ka ye na legeni, azo ti sioni ni ayeke sara sioni, ala yeke baa ngangu ti mo KOTA GBIA pepe.

¹¹KOTA GBIA, mo yo maboko ti mo na nduzu ti pika ala, me ala baa ni pepe. Fade ala yeke baa so mo yeke na nzara mingi ti sara na azo ti mo, tongaso kamene ayeke gbu le ti ala. Wâ so a leke ndali ti awato ti mo ayeke gbi azo ni.

¹²KOTA GBIA, mo yeke mu na e siriri, aye so kue e yeke sara, mo laa mo yeke sara ni ndali ti e.

¹³KOTA GBIA, Nzapa ti e, ambeni makonzi nde so ayeke mo pepe, ala laa asara komandema na ndö ti e. Me gi mo oko laa e yeke di iri ti mo.

¹⁴Azo ni so akui awe so, ala yeke kiri ti duti na fini pepe, ala yeke kiri ti londo pepe. Mo ga na tere ti ala si mo hunzi ala kue, mo sara si azo akiri adabe ti ala na ala mbeni pepe.

¹⁵KOTA GBIA, mo sara si mara ti e awu mingi, mo fa gonda ti mo; mo sara si mara ti e awu mingi, mo sara ya ti kodro ti e akono na mbage kue.

¹⁶KOTA GBIA, na ya ti ye ti ngangu, e baa ndo na mbage ti mo. Na ndembe so mo pika e, e yeke sambela mo na gbe ti go ti e.

¹⁷KOTA GBIA, e yeke na dawa ti mo tongana mama ti ngo so aga nduru ti du, lo yeke baa pasi si na ya ti songo tere, lo yeke dekongo.

¹⁸E nga, e mu ngo, e baa pasi; so e du, e du gi pupu. E sara mbeni ye ti soo sese pepe, e ga na afini zo na ndö ti dunia pepe.

¹⁹Azo ti mbi, azo ti ala so akui so, ala yeke kiri ti duti na fini, ala yeke zingo na kuâ. Ala azo so alango na ya ti fuku ti sese, ala zingo, ala dekongo na ngia! Biani, *KOTA GBIA ayeke tokua na ala ngu ti pere so ayeke mu lumiere, ndali ti ngu ti pere ni, sese ayeke sara si akuâ akiri ti duti na fini.

²⁰Azo ti mbi, ala gue na da ti ala, ala kanga yanga ti da ni na li ti ala. Ala honde tere ti ala na ya ti kete ngoi ngbii ngonzo ti KOTA GBIA ahon si.

²¹Baa, KOTA GBIA alondo na ndo ti lo ti sigigi. Lo yeke hunda na azo ti sese ti fa peko ti asioni ti ala. Sese ayeke fa na gigi mene so atuku, azo so a fâ ala, sese ayeke kiri ti honde kuâ ti ala pepe.