Read sango Ésaïe 28 Bible Online

Ésaïe 28 - sango bible

Ésaïe 28

¹So mawa na gbata ti Samarii so akpa kpoto ti gbia! Azo ti Efraim so ayeke angbaa ti samba ayeke pika kate ti ala ndali ni. Gbata ni ayeke na nduzu ti popo-hoto so akobe ayeke le daa mingi. Gbata ni akpa kongo so awoko awe si a zia na li ti azo ti sara pendere ti ala, azo so anyon vin si ahon ndö ti ala.

²Baa mbeni zo ti ngangu, zo so mbeto asara lo pepe ayeke ga; *KOTA GBIA laa atokua lo. Zo ni akpa kota pupu ti ngu-Nzapa so asara si *apembe ti bekpa atuku, lo kpa ngu-Nzapa so ayeke buba ndo, kota ngu-Nzapa so apika si amu ndo kue. Zo ni ayeke sara ye gi na ngangu ngangu si lo yeke kinda aye kue na sese.

³Gbata so ayeke tongana kpoto ti gbia si azo ti Efraim, angbaa ti samba so ayeke pika kate ti ala ndali ni, fade a yeke do ni na gbe ti gere.

⁴Kongo so awoko awe si ayeke sara pendere ti gbata ni, gbata so ayeke na nduzu ti popo-hoto so akobe ayeke le daa mingi so, fade ayeke ga tongana le ti fige so abe kozo na ngoi ti fango ale ti kobe. Gi so mbeni zo abaa le ti fige ni, lo mu ni si hio lo mene ni.

⁵Na lango ni so, fade KOTA GBIA so ayeke na ndö ti dunia kue, lo wani, lo yeke ga tongana kpoto ti gbia so ayeke za zango, lo yeke ga tongana anzoni ye ti pendere ndali ti azo ti lo so angba na fini.

⁶Lo yeke mu yingo ti mbirimbiri na awafango-ngbanga; lo yeke mu ngangu na azo so ayeke tumba awato so ayeke na yanga ti gbata ni.

⁷Ndali ti vin so asara ala, ataa awayango-sandaga na awayanga-Nzapa agirisa lege. Ndali ti ngangu samba, ala yeke tambula kirikiri. Samba asara si ala girisa lege. Ndali ti vin, li ti ala aga kirikiri, tongana ala baa ye na ya ti mbeni ye tongana bango-li, ala yeke girisa lege, ala hinga li ti ala na ngbanga so ala yeke fâ pepe.

⁸Ndö ti meza kue asi singo na ye so ala de, ndo kue gi zende!

⁹Ala yeke hunda ndo, atene: “Ésaïe ayeke fa ti lo ye ni na zo wa? Lo yeke fa nda ti atënë ti Nzapa ni na zo wa? Na amolenge so a zi ala na yanga ti me fafadeso? Na akete molenge so a gbanzi ala na me fafadeso?

¹⁰Ala ma lo: ‘BA-BA, BABA, MA-MA, MAMA, GE, KÂ, GE, KÂ!’ ”

¹¹Biani, fadeso *KOTA GBIA ayeke tene tënë na azo so na lege ti guguma, na yanga ti kodro ti awande.

¹²Lo tene ando na ala, lo tene: “Baa, ndo ti wungo tere ti ala laa! Zo so awoko, ala zia lo, lo wu tere ti lo. Ndo ti dutingo kpoo laa.” Me ala ye ti ma pepe.

¹³Ndani laa, fade KOTA GBIA ayeke tene na ala gi oko tënë so: “BA-BA, BABA, MA-MA, MAMA, GE, KÂ, GE, KÂ.” Tongaso, tongana ala yeke tambula, ala yeke ti na mbage ti peko ti ala si bio ti ala ayeke kungbi. Ala yeke ti na ya ti kuku si a yeke gbu ala.

¹⁴Ala so ayeke he azo si ala yeke sara komandema na ndö ti azo ti Jérusalem so, ala ma tënë ti *KOTA GBIA si!

¹⁵“Ala yeke tene: E na kuâ e ga *ambuki awe, e na ndo ti akuâ, e leke tënë awe. Tongana ye ti ngangu ayeke si ande, ye ni ayeke wara e pepe. Biani, tenengo mvene aga ndo so e yeke kpe daa ti bata tere ti e, handango azo ayeke ndo ti hondengo tere ti e.”

¹⁶Ndani laa, tënë so Kota Gbia NZAPA atene ayeke so: “Baa, mbi zia na *Sion têne so mbi tara ni awe, ngangu têne ti gere ti da so a lu ni ngangu. Zo so aluti na ndö ni, fade lo yeke ti pepe.

¹⁷Mbi yeke mu sarango ye na legeni tongana kamba ti hakango na ye, ye ti mbirimbiri tongana kamba ti amason.” Me fade *pembe ti bekpa ayeke zi ndo ti batango tere ti ala ti mvene ti hon na ni, ngu ayeke suku ti mu ndo ti hondengo tere ti ala.

¹⁸Mbuki so ala na kuâ asara so, fade ya ni ayeke fâ; lekengo tënë so ala na ndo ti akuâ aleke so ayeke luti pepe. Tongana ye ti ngangu asi ande, fade ayeke nika ala.

¹⁹Na ngoi so kue ye ti ngangu ni ayeke si, fade ayeke wara ala. Biani, ye ni ayeke hon na ndaperere, na kota lâ nga na bi. Gi so azo ayeke ma tënë ni, kota mbeto ayeke hon ndö ti ala.

²⁰Biani, ye ni ayeke duti tongana ti so mbeni *mato atene: gbogbo ni ayeke nduru mingi titene zo alango na ndö ni, le ti balangeti ni ayeke kete mingi titene zo abi na ndö ti lo.

²¹Fade KOTA GBIA ayeke sara ye tongana ti so lo sara na li ti hoto ti Perasim; lo yeke do na ngonzo tongana ti so lo sara na popo-hoto ti Gabaon, na ndembe so lo yeke sara kua ti lo, kua ti lo so zo ahinga li ti lo daa pepe, kua ti lo ti ndima.

²²Fadeso, ala zia lege ti hengo ndo, tongaso pepe, kamba so akanga na ala, ayeke kiri ti kanga ala ngangu. Biani, Kota Gbia NZAPA so ayeke na ndö ti dunia kue atene na mbi atene, lo leke na be ti lo ti buba kodro ni biani biani.

²³Ala dingi mê ti ala, ala ma mbi! Ala duti kpoo, ala ma tënë ti mbi!

²⁴Zo ti fango yaka so aye ti lu ale ti kobe, lo yeke mu ngoi kue ti de ya ti sese? Lo yeke mu ngoi kue ti suru alege, ti pika ya ti angbongboro sese?

²⁵Kozoni, lo yeke leke sese ni nzoni si; ye ni ayeke tongaso pepe? Na pekoni, lo yeke bi ale ti kugbe ti kasa, lo yeke lu ale ti *ble na ale ti bondo nga na ale ti orze na ndo so alingbi na ni. Ti hunzi na ni, lo yeke lu ambeni le ti kobe nde na yanga ti yaka ni.

²⁶Nzapa ti lo laa afa na lo lege ti sarango ye ni, lo laa lo fa na lo ye ni.

²⁷Zo ayeke mu wen so apondi ayeke na le ni ti zi na ale ti nizele pepe; zo ayeke mu gere ti pusu ti zi na ale ti kumine pepe. Me lo yeke mu keke si lo yeke pika na ale ti nizele na ti kumine ni.

²⁸Titene zo asara mapa, lo yeke nika ale ti ble, me lo yeke ngba gi ngbango ti pika ni pepe. Tongana lo mu gere ti pusu na ambarata ti hon na ni na ndö ti ale ti kobe, ayeke nika ale ti kobe ni pepe.

²⁹Ye so kue alondo na *KOTA GBIA so lo yeke na ndö ti dunia kue, lo so wango ti lo ayeke sara si be ti zo ado, ndara ti lo ayeke kota.