Read sango Ésaïe 29 Bible Online

Ésaïe 29 - sango bible

Ésaïe 29

¹*KOTA GBIA atene: “So mawa na mo Ariel, Ariel, gbata so David aga ti tiri bira na mo so! Ngu na ngu, mo lingbi ti sara amatanga na lege ti amolongo ni,

²me mbi KOTA GBIA, mbi yeke nika mo, Ariel. Fade demango tere na dema ayeke hon ndö ti mo si mo yeke ga tongana duke, ndo so a yeke gbi asandaga daa ndali ti mbi.

³Mbi yeke sara bâbâ ti ngoro mo kue; mbi yeke zia aturugu ti ngoro mo, mbi yeke sara gbagba na tere ti mo ti tiri bira na mo.

⁴Fade mo yeke ti taa na gbeni, asara si tënë ti mo ayeke londo na gbe ti sese si asigigi; go ti mo so alondo na ya ti fuku ti sese si asigigi, azo ayeke ma ni nzoni pepe. Azo ayeke ma go ti mo ni tongana go ti mbeni toro so ayeke tene tënë na gbe ti go ti lo na ya ti fuku ti sese.

⁵Gba ti awato ti mo ayeke duti tongana kete le ti fuku ti sese; gba ti azo so asara ngangu na mo ayeke ga tongana holengo pere so pupu amu ahon na ni.” Mo ye ti baa,

⁶KOTA GBIA so ayeke na ndö ti dunia kue ayeke ga ti mu maboko na mo na lege ti toto ti bekpa, na lege ti ye so atoto ngangu, na ya ti ngangu pupu, na ya ti pupu ti ngu-Nzapa nga na wâ so ayeke gbi ye kue.

⁷Gba ti azo so ayeke tiri bira lani na mo Ariel, fade ala kue ayeke hon tongana bango-li. Azo so kue ayeke sara gbagba na tere ti mo ti tiri bira na mo, azo so ayeke pete mo mbage na mbage, fade ala kue ayeke hon tongana ti so zo ayeke baa ye na ya ti mbeni ye tongana bango-li.

⁸Zo so nzara asara lo, lo baa li ti lo, lo yeke te kobe, me tongana lo zingo, ye oko ayeke na ya ti lo pepe; wala zo so nzara ti ngu asara lo, lo baa li ti lo, lo yeke nyon ngu, me tongana lo zingo, lo woko kue, lege ti go ti lo ahole kasakasa. Ye ni ayeke duti tongaso ndali ti gba ti azo so ayeke tiri lani bira na hoto ti *Sion.

⁹Li ti ala akpe, tënë ahunzi na yanga ti ala! Ala ga awaziba, ala ngba gi tongaso! Samba ahon ndö ti ala, me samba laa ala nyon pepe. Ala tambula kirikiri, me ngangu samba laa asara ala pepe.

¹⁰Biani, *KOTA GBIA asara si yingo ti kota lango aga na ndö ti ala. Lo kanga le ti awayanga-Nzapa ti ala, lo bi bongo na le ti azo ti bango nda ti aye ti ala.

¹¹Na ala, aye so kue Nzapa afa ayeke tongana tënë so a su na ya ti mbeti so a kanga yanga ni si a kpo nzoroko na ndö ni. A mu mbeti ni na zo so ahinga ti diko mbeti si a tene na lo: “Diko mbeti so!” Me zo ni akiri tënë: “Mbi lingbi ti diko ni pepe, ngbanga ti so a kpo nzoroko na ndö ti mbeti ni.”

¹²Tongaso a mu mbeti ni na zo so ahinga ti diko mbeti pepe si a tene na lo: “Diko mbeti so!” Me zo ni akiri tënë: “Mbi hinga ti diko mbeti pepe.”

¹³*KOTA GBIA atene: “Azo so ayeke ga nduru na mbi gi na lege ti atënë senge, ala yeke ne mbi gi na atënë ti yanga senge, me be ti ala ayeke yongoro na mbi. Kpengo so ala yeke kpe mbi ayeke gi na lege ti ndia so azo afa na ala.

¹⁴Ndani laa, fade mbi yeke ngba ti sara si li ti azo so akpe na lege ti aye ti dongo be. Fade a yeke buba ndara ti azo ti ndara, a yeke honde hingango ndo ti azo ti hingango ndo.”

¹⁵So mawa na azo so ayeke sara ye na gbe mingo si ala yeke honde apialo ti ala na *KOTA GBIA so! Ala yeke sara aye ti ala na ya ti vukongo ndo, ala yeke tene: “Zo wa laa abaa e, zo wa? Zo wa laa ahinga ye so e sara, zo wa?”

¹⁶So buba tënë ti nyen laa ala yeke tene so! Fade a yeke mu wasarango-ta ti lingbi na sese ti sarango na ta ni? Ye so zo asara, fade ye ni atene na zo ti sarango lo, atene: “Lo laa lo sara mbi pepe”? Fade ta ti sese atene na zo ti sarango lo, atene: “Lo hinga ndo pepe”?

¹⁷Gi na ya ti kete ngoi, fade gbako ti Liban ayeke kiri ti ga yaka ti akeke so a yeke te le ni tengo si yaka ni ayeke kiri ti ga mbeni gbako.

¹⁸Na lango ni so, azo so mê ti ala akanga, fade ala yeke ma atënë so a tene na ya ti mbeti; azo so le ti ala abuba ayeke sigigi na ya ti vukongo ndo so avuko pitipiti si ala yeke baa ndo.

¹⁹Azo so ayeke sara tere ti ala kete ayeke wara ngia so ayeke gue guengo na nduzu ndali ti *KOTA GBIA; azo so yere ti ala ahon ndoni ayeke dodo na ngia ndali ti Nzapa ti Israel so ayeke nde si ayeke nzoni kue.

²⁰Biani, azo so ayeke sara ngangu na azo, ti ala ayeke hunzi; azo so ayeke he azo, a yeke mingo ala; azo so ayeke gi lege ti sara sioni na azo, a yeke hunzi ala biani biani:

²¹azo ni ayeke azo so ayeke bi tënë ti mvene na li ti azo, ala so ayeke zia kuku titene awafango-ngbanga ati daa, ala so ayeke fâ ngbanga na li ti azo so asara ye oko pepe.

²²Ndani laa, tënë so KOTA GBIA atene na azo ti Jacob, lo so lo soo Abraham ayeke so: “Fadeso, kamene ayeke kiri ti sara azo ti Jacob pepe, kamene ayeke kiri ti gbu le ti ala pepe.

²³Biani, tongana ala na amolenge ti ala ayeke baa ande ye so mbi yeke sara na popo ti ala, fade ala yeke hinga atene mbi, mbi yeke taa Nzapa, Nzapa ti Jacob so ayeke nde si ayeke nzoni kue; ala yeke do na mbeto na dawa ti mbi, Nzapa ti Israel.

²⁴Azo so lani li ti ala aga kirikiri, fade ala yeke ga azo ti hingango ndo; azo so lani ayeke ke tënë mingi, ala yeke yeda titene a fa ye na ala.”