Read sango Ésaïe 3 Bible Online

Ésaïe 3 - sango bible

Ésaïe 3

¹Biani, Kota Gbia NZAPA so ayeke na ndö ti dunia kue ayeke zi na ya ti gbata ti Jérusalem nga na ya ti kodro ti Juda aye so kue ayeke mu ngangu na azo: lo yeke zi kobe na ngu,

²akpengba turugu na asenge turugu, awafango-ngbanga na awayanga-Nzapa, azo ti bango nda ti aye na *akangba,

³aturugu ti kota kamba na akota zo ti kodro, awamungo-wango, azo ti sarango mazi nga na akota zo ti yoro.

⁴*KOTA GBIA atene: “Fade mbi yeke mu gi amolenge ti duti amakonzi na ndö ti ala, ala yeke sara komandema ti mbana na ndö ti ala.”

⁵Azo ayeke sara ngangu na amba ti ala na popo ti ala, zo oko oko ayeke sara ngangu na mba ti lo. Molenge ayeke londo ti tiri na kangba; senge zo ayeke londo ti tiri na kota zo.

⁶Mbeni zo ayeke gbu ita ti lo na da ti babâ ti lo si atene na lo: “Mo laa kota bongo angba na mo; mo ga makonzi ti e ma! Aye so abuba awe so, mo duti komandema na ndö ni!”

⁷Me na lango ni so, zo ni ayeke kiri tënë, atene: “Mbi yeke wanganga pepe; kobe wala bongo ayeke na da ti mbi pepe. Ala lingbi ti zia mbi makonzi pepe.”

⁸Jérusalem ati awe, kodro ti Juda abuba awe. Ala ke KOTA GBIA na lege ti tënë ti yanga ti ala nga na sarango ye ti ala; ala sara ngangu li na KOTA GBIA so ayeke na gonda.

⁹Ala yeke mu mbage ti ambeni zo, so laa ayeke bi tënë na li ti ala; ala yeke sara asiokpari gi polele tongana ti azo ti Sodome, ala yeke sara ni na hondengo ni pepe. So mawa na ala! Ala wani ayeke leke ye ti mawa ndali ti ala.

¹⁰Ala lingbi ti tene: ti zo ti mbirimbiri nzoni! Fade lo yeke baa nzoni na peko ti aye so lo sara.

¹¹Me ti zo ti sioni, so mawa na lo! Fade ye ti lo kue ayeke ga sioni, a yeke sara na lo alingbi na asarango ye ti lo.

¹²KOTA GBIA atene: “Azo ti mbi, azo so ayeke sara ngangu na ala ayeke gi amolenge, awali laa ayeke sara komandema na ndö ti ala. Azo ti mbi, azo so ayeke fa lege na ala asara si ala girisa lege, ala yeke fa na ala sioni lege.”

¹³*KOTA GBIA alondo ti fâ ngbanga; lo luti ti fâ ngbanga na li ti amara.

¹⁴KOTA GBIA ague na *akangba na amakonzi ti azo ti lo na ngbanga, lo tene: “Ala laa abuba yaka ti vinye; aye so ala nzi na maboko ti azo ti mawa, ala zia ni na ya ti ada ti ala.

¹⁵Ala yeke nika azo ti mbi ngbanga ti nyen? Ala yeke sara ngangu na awayere ngbanga ti nyen? So tënë ti yanga ti Kota Gbia NZAPA so ayeke na ndö ti dunia kue laa!”

¹⁶*KOTA GBIA atene: “Awali ti *Sion, so fango tere na ala! Ala yeke bi go ti ala si ala yeke tambula, le ti ala ayeke za ti handa na akoli. Ala yeke tambula ze ze si alenge so ala kanga na gere ti ala ayeke toto.”

¹⁷Ndani laa, fade KOTA GBIA ayeke sara si li ti ala kue gi na koto-mo-lango, ndö ti le ti ala angba gi senge.

¹⁸Na lango ni so, fade KOTA GBIA ayeke zi aye ti pendere ti ala: alenge ti gere, aye ti gbungo na kua ti li nga na aye ti go so akpa nze,

¹⁹aye ti mê, aye ti maboko, alafayi,

²⁰abongo so a yeke kanga na li tongana kpoto, aye ti go so ayeke za zango, akamba ti ndö ti bongo, awaraga na akamba ti batango na tere,

²¹abage, *akati ti hon,

²²abongo ti matanga, azarabia, anduru yanga ti bongo so a yeke kanga na go na abongo so a yeke rule na go, abozo ti maboko,

²³atatara, anduzu bongo so a sara na *len, abongo ti gbeni nga na abongo ti bingo na tere.

²⁴Afungo ka laa ayeke mu plase ti yombo, senge kamba laa ayeke mu plase ti pendere kamba ti ndö ti bongo, kiongo kua ti li laa ayeke mu plase ti pendere pete, agbagba bongo laa ayeke mu plase ti abongo ti matanga. Kamene laa ayeke mu plase ti sarango pendere.

²⁵Jérusalem, fade akoli ti mo ayeke kui kuâ ti yongoro zeme, akpengba turugu ti mo ayeke kui na ya ti bira.

²⁶Na ya ti gbata ni kue, gi demango tere na totongo akuâ. Gbata ni aga tongana wali so aye ti lo kue agirisa si lo yeke duti na sese.