Read sango Ésaïe 32 Bible Online

Ésaïe 32 - sango bible

Ésaïe 32

¹Fade mbeni gbia ayeke le-gbia na lege ti mbirimbiri, amakonzi ayeke sara komandema alingbi na ndia.

²Ala oko oko ayeke duti tongana mbeni gbefa so zo ayeke bata tere ti lo daa ndali ti pupu, tongana ndo so zo ayeke kpe ti honde tere ti lo daa ndali ti ngu-Nzapa, tongana ngu so ayeke sua na ndö ti holengo sese, tongana gbe ti de ti kota têne na kodro so ngu ayeke daa pepe.

³Le ti azo so alingbi fade ti baa ndo ayeke kiri ti kanga pepe, mê ti azo so alingbi fade ti ma ndo ayeke kiri ti ma ndo nzoni.

⁴Azo so ahinga ti gbu li ti ala pepe ayeke to nda ti ma ya ti tënë, azo ti guguma ayeke tene tënë hio, ala yeke tene tënë, le ni avuru.

⁵A yeke kiri ti di iri ti zo ti buba pepe, atene “ne-ne zo”. A yeke kiri ti tene na zo ti handango ndo pepe, atene “zo ti nzoni be.”

⁶Biani, zo ti buba ayeke tene abuba tënë, lo yeke zia be ti lo gi ti sara sioni, lo yeke sara aye so ayeke sioni mingi si lo yeke tene asioni tënë na tere ti *KOTA GBIA. Zo so nzara asara lo, lo yeke mu na lo kobe pepe, zo so nzara ti ngu asara lo, lo yeke mu na lo ngu ti nyongo ni pepe.

⁷Ti zo ti handango ndo, kua ti lo ayeke ti sarango sioni mingi na zo: lo yeke leke aye na mayere ti sara sioni na wayere na tenengo mvene na li ti wayere ni. Andaa wayere ni ahunda gi ye so ayeke ti lo.

⁸Me ne-ne zo ayeke leke na be ti lo ti sara gi nzoni ye, lo yeke sara gi ye so ane.

⁹Ala awali so ye ti songo ala ayeke daa pepe so, ala londo, ala ma mbi si! Ala amaseka-wali so abaa tere ti ala atene, ala lingbi awe so, ala dingi mê ti ala, ala ma mbi si!

¹⁰Ala so abaa tere ti ala atene, ala lingbi awe so, na peko ti ngu oko na ambeni lango na ndö ni, fade tere ti ala ayeke do, ngbanga ti so fango ale ti *vinye ahunzi awe, fango ale ti kobe ayeke daa mbeni pepe.

¹¹Ala awali so ye ti songo ala ayeke daa pepe so, alingbi ala do na mbeto. Ala awali so abaa tere ti ala atene, ala lingbi awe so, alingbi tere ti ala ado, ala zi bongo na tere ti ala, tere ti ala angba ndumbu, ala kanga bongo ti mua na ngbonda ti ala.

¹²Ala zia maboko na ndö ti go ti ala ti fa vundu ti be ti ala, ala toto ndali ti apendere yaka ti ala, ndali ti akeke ti vinye so lani ayeke le mingi so,

¹³ndali ti sese ti azo ti mbi so aki na akeke ti ki amu ndö ni kue. Ataa ada so lani azo ayeke duti na ngia daa na agbata so azo ayeke sara matanga daa mingi, aki na akeke ti ki ni amu ni kue.

¹⁴Yangbo ti gbia, azo ado azia awe, gbata so wuluwulu ayeke daa lani, azo akpe ni kue awe. Vaka ti Ofel na da so ayo na nduzu ayeke ga du ti hondengo tere kpu na kpu, ndo so alele ti ngonda ayeke sara ngia daa nga na ndo so anyama ayeke te pere daa.

¹⁵Mbeni lâ, fade *KOTA GBIA ayeke tokua yingo ti lo na ndö ti e. Tongaso, benyama ayeke ga yaka so a lu akeke so a yeke te lengo ni si yaka ni ayeke ga mbeni gbako.

¹⁶Na ya ti benyama, azo ayeke sara ye na lege ti ndia; na ya ti yaka so a lu akeke so a yeke te le ni tengo, azo ayeke fâ ngbanga mbirimbiri.

¹⁷Sarango ye ti mbirimbiri ayeke du siriri, ayeke sara si azo aduti kpoo, mbeni ye ti sioni ayeke si na ala pepe kpu na kpu.

¹⁸Fade azo ti KOTA GBIA ayeke duti na ndo so siriri ayeke daa, na ya ti ada so zo alingbi ti zia be ti lo na ndö ni, na ndo so ayeke nzoni si ayeke kpoo.

¹⁹Fade *pembe ti bekpa ayeke ti na ndö ti gbako, gbata ayeke ti.

²⁰Me ti ala nzoni, ala so ayeke lu ale ti kobe na ndo so kue ngu ayeke daa, ala yeke zia lege na bagara nga na lele ti tambula ti be ti ala!