Read sango Ésaïe 34 Bible Online

Ésaïe 34 - sango bible

Ésaïe 34

¹Ala amara nde, ala ga nduru ge, ala ma tënë! Ala azo ti dunia kue, ala dingi mê ti ala, ala ma tënë! Ayeke nzoni sese na aye so kue ayeke na ndö ni ama tënë, dunia na aye so kue ayeke sigigi daa ama tënë.

²Ngonzo ti *KOTA GBIA ayeke tuku na ndö ti amara kue, sioni ngonzo ti lo ayeke tuku na ndö ti aturugu ti ala kue. Lo zia ala titene a fâ ala, ahunzi ala, lo zia ala titene a fâ ala kue.

³A bi kuâ ti ala kirikiri, kuâ ti ala ayeke fun sioni sioni, mene ti ala ayeke sua na ndö ti ahoto tongana ngu so ayeke sua.

⁴Aye so kue ayeke na le ti nduzu ayeke hon kirikiri, le ti nduzu ayeke rule tere ti lo tongana mbeni mbeti. Aye so kue ayeke na le ti nduzu ayeke tuku tongana aholengo kugbe ti keke ti vinye wala ti keke ti fige.

⁵Na yayu kâ, yongoro zeme ti KOTA GBIA ayeke tongana zo so anyon samba ahon ndö ti lo Baa yongoro zeme ni ayeke ti na ndö ti azo ti Edom, na ndö ti azo so KOTA GBIA azia ala titene a fâ ala, a hunzi ala.

⁶Mene amu tere ti yongoro zeme ti KOTA GBIA kue, mafuta amu tere ni kue, mo baa mo tene, mene ti akete taba na ti akoli-ngasa, mo baa mo tene, mafuta ti ya ti akoli-taba. Na Bosra, li-kodro ni, a mu *sandaga na KOTA GBIA. Na kodro ti Edom, a fâ azo kue.

⁷Gi na oko ndembe ni, angbä ayeke ti, akete bagara na akoli-bagara ayeke ti na sese. Sese anyon mene si aga tongana zo so samba ahon ndö ti lo, mafuta amu ndö ti sese kue.

⁸Ti KOTA GBIA, lango ni so ayeke lango titene lo kiri na peko ti sioni ti azo ti Edom na ala; ngu ni so ayeke ngu titene lo so lo yeke gbu koko ti *Sion, lo kiri na peko ti sioni ti awato ti Sion na ala.

⁹Angu ti Edom ayeke ga angu ti gudron, sese ti lo ayeke ga *sufre. Kodro ni ayeke ga gudron so ayeke gbi.

¹⁰Na bi wala na kota lâ, gudron ni ayeke mingo pepe. Guru ti wâ ayeke londo daa lakue lakue. Ngu na ngu, kodro ni ayeke ngba benyama, zo oko ayeke kiri ti hon na ya ni pepe.

¹¹Kodro ni ayeke ga ti andeke ti bi na ti abelu; akete ndeke ti bi na *akpakpo ayeke lango daa. KOTA GBIA ayeke gboto kamba ti haka na ni si lo yeke buba ni; lo yeke haka ni, ayeke ga senge, ye oko ayeke daa pepe.

¹²Akota zo ti kodro ni ayeke duti daa mbeni pepe ti soro mbeni gbia, amakonzi kue ayeke hunzi.

¹³Akamba ti ki ayeke sigigi na yangbo ti gbia, asioni pere na akeke ti ki ayeke mu ndö ti ngangu gbagba. Kodro ni ayeke ga ndo ti lango ti *anzagua, ndo so *anaamo ayeke duti daa.

¹⁴Anyaû ti ngonda na agbongo ayeke wara tere kâ, akoli-ngasa ayeke wara amba ti ala kâ. Sioni yingo ti bi ayeke duti kâ; kâ, lo yeke wara ndo ti wungo tere.

¹⁵Na ndo so laa ngbo ayeke sara du ti lo, lo yeke du apara ti lo, lo yeke lango na ndö ni ngbii lo zi ni, lo yeke bata amolenge ni na gbe ti lo. Na ndo so nga, *angoalo ayeke bongbi tere.

¹⁶Tongana ala gi na ya ti mbeti ti KOTA GBIA, fade ala yeke diko tënë so: Na popo ti anyama so kue, mbeni oko angba na peko pepe, mbeni oko so ake ti ga ayeke daa pepe. KOTA GBIA laa amu yanga na ala, yingo ti lo laa abongbi ala.

¹⁷Lo laa lo bi mbeni ye ndali ti ala oko oko, lo mu kamba ti hakango na ye ti kangbi sese na ala. Sese ni ayeke ga ti ala kpu na kpu, ala yeke duti daa ngu na ngu.