Read sango Ésaïe 37 Bible Online

Ésaïe 37 - sango bible

Ésaïe 37

¹So gbia Ezekias ama ala awe, lo suru bongo na tere ti lo, lo yu bongo ti mua si lo gue na ya ti kota da ti *KOTA GBIA.

²Na pekoni, lo tokua Eliakim, makonzi ti yangbo ti gbia, lo na wakuasu Shebna nga na ambakoro wayango-sandaga na ndo ti wayanga-Nzapa Ésaïe, molenge ti Amoz. Ala kue ayu bongo ti mua.

³Ala tene na lo: “Tënë so Ezekias atene ayeke so: ‘Lango ti laso ayeke lango ti ye ti ngangu, lango ti kota kpale, lango ti kota kamene. Azo ayeke tene: molenge aga nduru ti sigigi na ya ti mama ti lo, me ngangu atia mama ni ti du molenge ni.

⁴Gbia ti Asirii atokua makonzi ti aturugu ti lo ti zonga Nzapa so ayeke na fini. E hinga pepe, wala KOTA GBIA, Nzapa ti mo ama tënë ti zonga ni si lo pika lo ndali ti asioni tënë so lo tene so! Ti mo Ésaïe, sambela Nzapa ndali ti tanga ti azo so angba na fini so.’ ”

⁵Azo ti kua ti gbia Ezekias aga nduru na tere ti Ésaïe

⁶si lo tene na ala: “Ala gue, atene na wa ti ala, atene: ‘Tënë so KOTA GBIA atene ayeke so: zonga so azo ti kua ti gbia ti Asirii azonga na mbi si mo ma tënë ni so, sara mbeto ni pepe.

⁷Gbia ayeke ma mbeni tënë; mbi yeke tokua mbeni yingo na ya ti lo si lo yeke kiri na kodro ti lo. Mbi yeke sara titene lo kui kuâ ti yongoro zeme na kodro ti lo wani.’ ”

⁸Makonzi ti aturugu ti Asirii ama a tene, gbia ti Asirii alondo na gbata ti Lakish, lo ga na gbata ti Libna si lo yeke tiri bira na azo ti gbata ni. Makonzi ni aga si lo wara gbia ni kâ.

⁹Me gbia ti Asirii ama a tene, Tiraka, gbia ti Etiopii ayeke ga ti tiri bira na lo. Gi so lo ma tënë so, lo tokua azo na Ezekias, lo tene:

¹⁰“Tënë so ala yeke tene na Ezekias, gbia ti Juda ayeke so: Ayeke nzoni Nzapa ti mo so mo zia be ti mo mingi na ndö ti lo so ahanda mo pepe, atene: ‘Fade Jérusalem ayeke ti na maboko ti gbia ti Asirii pepe!’

¹¹Mo wani, mo ma ye so agbia ti Asirii asara na akodro kue; mo ma lege so ala fâ azo ti akodro kue, zo oko angba na fini pepe. Mo baa ti mo, mo tene, fade a yeke zi mo ma?

¹²So ababâ ti mbi abuba ando agbata tongana: Gozan, Haran, Resef nga na gbata ti Telasar so azo ti sese ti Bet-Eden ayeke lango ando daa so, anzapa ti ala azi ala na maboko ti ababâ ti mbi ni?

¹³Agbia ti Hamat, ti Arpad, ti Lair, ti Sefarvaim, ti Hena na ti Ava ayeke na ndo wa?”

¹⁴Ezekias amu mbeti ni na maboko ti awatokua ni, lo diko ni si lo gue na ya ti kota da ti *KOTA GBIA. Lo zi ya ti mbeti ni na le ti KOTA GBIA.

¹⁵Na pekoni, lo sambela KOTA GBIA, lo tene:

¹⁶“KOTA GBIA, mo so mo yeke na ndö ti dunia kue, Nzapa ti Israel, mo so mo yeke duti na ndö ti *asheruben, gi mo oko mo yeke Nzapa na ndö ti akodro-gbia ti sese kue, ngbanga ti so mo laa mo sara yayu na sese.

¹⁷KOTA GBIA, dingi mê ti mo, mo ma si! KOTA GBIA, zi le ti mo, mo baa ye si! Mo ma atënë so Senakerib atokua ni ti zonga Nzapa so ayeke na fini so!

¹⁸KOTA GBIA, taa-tënë, agbia ti Asirii ahunzi amara nde kue si ala buba akodro ti amara ni.

¹⁹Agbia ni abi anzapa ti azo ni na le ti wâ. Andaa, anzapa ni ayeke taa Nzapa pepe, me ala yeke gi ye so maboko ti zo laa asara ni na keke nga na têne; nilaa agbia ti Asirii abuba anzapa ni kue.

²⁰Me mo KOTA GBIA, Nzapa ti e, soo e na maboko ti Senakerib; tongaso si akodro-gbia ti sese kue ahinga atene, gi mo oko KOTA GBIA laa mo yeke Nzapa.”

²¹Tongaso, Ésaïe, molenge ti Amoz atokua azo na Ezekias, atene: “Tënë so KOTA GBIA, Nzapa ti Israel, lo so mo sambela lo ndali ti Senakerib, gbia ti Asirii atene ayeke so:

²²Baa, tënë so KOTA GBIA atene na tere ti lo ayeke so: Pendere maseka-wali, gbata ti *Sion abaa mo tongana mbumbuse zo, lo yeke he mo na ngia. Pendere maseka-wali, gbata ti Jérusalem ayeke yingi li ti lo si ayeke he mo na peko ti mo.

²³Zo wa laa mo zonga lo si mo bi buba na tere ti lo so, zo wa? Zo wa laa mo dekongo na li ti lo si mo baa lo tongana mbumbuse zo so, zo wa? Mo sara ye so na mbi Nzapa ti Israel, mbi so mbi yeke nde si mbi yeke nzoni kue!

²⁴Na lege ti azo ti kua ti mo, mo zonga mbi, Kota Gbia. Mo tene: ‘Mbi Senakerib, na gba ti apusu ti mbarata ti mbi, mbi gue na li ti akota hoto, mbi gue ngbii mbi si taa na ya ti gbako ti Liban. Mbi de ayongoro keke ti sedre ti gbako ni; mbi de apendere keke ti sipre ti gbako ni. Mbi si taa na li ti ahoto ni kâ; na ndo so akeke asi singo daa.

²⁵Mbi zi adu ti ngu si mbi nyon ngu ti adu ni. Mbi yeke do angu ti Ezipte kue na gbe ti gere ti mbi si ahole.’

²⁶Senakerib, mo hinga pepe? Mbi leke aye so ngbene ye aninga awe, mbi leke pialo ni na be ti mbi giriri. Fadeso mbi yeke sara aye ni. Ti mo, ayeke ti sara si agbata so ngangu gbagba ayeke na tere ni aga gba ti atêne.

²⁷Azo so ayeke lango na ya ti gbata ni, ala yeke na ngangu pepe, kota mbeto ahon ndö ti ala, kamene ahon ndö ti ala. Ala yeke tongana pere ti yaka, ala yeke tongana fini pere ti ngonda, ala yeke tongana pere so asigigi na li ti da, wala tongana sese so ayeke daa kozo titene le ti kobe asigigi daa.

²⁸Mbi hinga ye kue na ndö ti mo: tongana mo yeke duti, tongana mo yeke sigigi na da ti mo, tongana mo yeke kiri na da ti mo, nga tongana mo yeke sara ngonzo na tere ti mbi.

²⁹Biani, mo sara ngonzo na tere ti mbi, zongango mbi so mo zonga mbi so, mbi ma tënë ni awe. Ndani laa, fade mbi yeke yoro *kongi ti wen na hon ti mo, mbi yeke yoro kamba ti wen na yanga ti mo. Fade mbi yeke zia mo gi na oko lege so mo mu ti ga ge so ti kiri na ndo ti mo.

³⁰“Ti mo Ezekias, ye so ayeke fa na mo ye so ayeke si ande ayeke so: na ngu so, azo ayeke te le ti kobe so asigigi na be ti lo wani. Na ngu ti peko, ala yeke te gi mara ni. Me na ota ngu ni, fade ala yeke lu ale ti kobe, ala yeke fâ ale ti kobe ni, ala yeke lu yaka ti *vinye si ala yeke te alengo ni.

³¹Tanga ti azo ti kodro ti Juda so ayeke ngba na fini ayeke duti ande tongana keke so agunda ni ali sese si amaboko ni ale lengo.

³²Biani, tanga ti azo so angba na fini ayeke sigigi na Jérusalem, azo so awara lege ti kpe ayeke londo na ndö ti hoto ti *Sion.” Baa, ye so *KOTA GBIA so ayeke na ndö ti dunia kue ayeke sara na lege ti kota nzara ti be ti lo laa.

³³Ndani laa, tënë so KOTA GBIA atene na ndö ti gbia ti Asirii ayeke so: “Fade lo yeke li na ya ti gbata so pepe, lo yeke bi ale ti kokora kâ pepe, lo yeke gbu *vala ti tiri na ni pepe, lo yeke bongbi sese aga *koto na tere ti gbata ni pepe.

³⁴Lege so lo mu lani ti ga, gi ni laa lo yeke mu ti kiri. Fade lo yeke li na ya ti gbata so pepe; so tënë ti yanga ti KOTA GBIA laa.

³⁵Fade mbi yeke bata gbata so si mbi yeke soo ni ndali ti mbi nga ndali ti David, zo ti kua ti mbi.”

³⁶*Ange ti *KOTA GBIA asi na ya ti bâbâ ti azo ti Asirii si lo fâ aturugu 185 000. So azo alondo na kota ndaperere, ala baa gi akuâ kue laa ayeke lango na sese so!

³⁷Tongaso Senakerib, gbia ti Asirii alondo na ya ti bâbâ ni, lo kiri na gbata ti Ninive si lo duti kâ.

³⁸Mbeni lâ, so lo yeke sambela na ya ti da ti nzapa ti lo Nisrok, amolenge ti lo Adramelek na Sareser afâ lo na yongoro zeme si ala kpe ague na sese ti Arara. Molenge ti lo Asaradon laa aga gbia na peko ti lo.