Read sango Ésaïe 39 Bible Online

Ésaïe 39 - sango bible

Ésaïe 39

¹Na ngoi ni so, Merodak-Baladan, gbia ti Babilone, molenge ti Baladan, ama a tene, tere ti Ezekias aso si lo wara ngangu awe. Tongaso lo tokua na lo mbeti nga na akadoo.

²Tere ti Ezekias anzere mingi ndali ti gango ti alembe ni. Lo fa na ala ada so lo yeke bata amosoro ti lo daa, wen ti nginza, lôro, yombo na mafuta ti yombo. Lo fa nga na ala ndo so lo yeke bata aye ti bira ti lo daa, nga na aye so kue ayeke na ya ti kubu so a bata amosoro ti lo daa. Ezekias afa aye ti yangbo ti lo kue na aye ti kodro ti lo kue na ala; lo honde mbeni ye oko pepe.

³Na pekoni, wayanga-Nzapa Ésaïe aga awara gbia Ezekias si ahunda lo, atene: “Azo so atene na mo nyen? Ala londo na ndo wa?” Ezekias akiri tënë: “Ala londo na yongoro ndo, na Babilone, ti ga ti baa mbi.”

⁴Ésaïe atene: “Nyen laa ala baa na ya ti yangbo ti mo, nyen?” Ezekias akiri atene: “Ala baa aye so kue ayeke na ya ti yangbo ti mbi: aye ti ya ti kubu ti da so a bata amosoro ti mbi daa; mbi honde mbeni ye oko na ala pepe.”

⁵Tongaso Ésaïe atene na Ezekias: “Mo ma tënë ti *KOTA GBIA so ayeke na ndö ti dunia kue:

⁶‘Mbeni lango ayeke ga so a yeke mu aye ti yangbo ti mo kue, na aye so kue agbia so aga kozo ti mo abongbi ando ngbii asi laso, ti gue na ni na Babilone. Biani, KOTA GBIA atene, fade mbeni ye oko ayeke ngba ge pepe.

⁷Na popo ti amolenge ti mo, ala so mo wani, mo du ala, fade a yeke mu ambeni ti gue na ala titene ala ga *ambaiwa na yangbo ti gbia ti Babilone.’ ”

⁸Ezekias akiri tënë na Ésaïe: “Tënë ti KOTA GBIA so mo tene so ayeke nzoni.” Biani, Ezekias atene na be ti lo: “Na lango so kue mbi yeke ngba na fini, fade e yeke duti na siriri si mbeni sioni ye oko ayeke si na e pepe.”