Read sango Ésaïe 41 Bible Online

Ésaïe 41 - sango bible

Ésaïe 41

¹*KOTA GBIA atene: “Ala azo ti azoa, ala kai kpoo, ala ma mbi si! Ala azo, ala duti na ngangu, ala pusu nduru si ala tene tënë! E kue, e gue legeoko na ngbanga.

²Mbeni zo alondo na mbage ti To si lo yeke ga; lo so benda na ndo so kue lo yeke hon daa. Zo wa laa azia lo na lege si lo ga so, zo wa? Zo wa laa azia amara nde na maboko ti lo, zo wa? Zo wa laa azia agbia na gbe ti komandema ti lo, zo wa? Yongoro zeme ti lo asara si ala ga tongana fuku ti sese, kokora ti lo asara si ala kangbi kirikiri tongana holengo pere so pupu amu ahon na ni.

³Zo ni so ayeke tumba peko ti ala, lo yeke hon, mbeni sioni oko awara lo pepe, gere ti lo andu sese pepe.

⁴Zo wa laa asara aye so kue, zo wa? Lo laa lo sara si aye abaa gigi, ngbene ye na tongo nda ni. Mbi laa mbi yeke *KOTA GBIA. Mbi yeke lo so ayeke kozoni, mbi yeke ngba tongaso na tere ti aye ti ndangba ni.

⁵Azo ti azoa abaa lo, mbeto agbu ala. Azo so ayeke na nda ti sese aga nduru, tere ti ala ayeke do dongo.

⁶Zo oko oko amu maboko na mba ti lo; mbeni zo atene na mba ti lo: ‘Gbu ngangu!’

⁷Wakode-kua ayeke mu ngangu na zo so ayeke kporo lôro na wâ ti sara na alimo; zo so ayeke sara si tere ti wen aza zango ayeke mu ngangu na zo ti pikango ndao. Lo yeke tene tënë ti kua ti lo, lo tene: ‘Kua ni ayeke nzoni!’ Na pekoni, lo yeke pika limo ni na pondi titene ayingi pepe.”

⁸“Ti mo Israel, zo ti kua ti mbi, mo Jacob so mbi soro mo, mo yeke *hale ti Abraham, kamarade ti mbi.

⁹Mo so mbi mu mo na nda ti sese kâ si mbi ga na mo, mo so mbi iri mo ngbene ye so mo ngba na nda ti sese yongoro; mbi tene na mo, mbi tene: ‘Mo yeke zo ti kua ti mbi, mbi soro mo, mbi ke mo pepe.’

¹⁰Mo sara mbeto pepe, ngbanga ti so mbi yeke na mo. Mo baa ndo na mbeto pepe, ngbanga ti so mbi yeke Nzapa ti mo. Mbi yeke sara titene mo kpengba, mbi yeke ga ti mu maboko na mo; biani, mbi yeke bata mo na lege ti maboko ti mbi ti koli so ayeke so benda.

¹¹Baa, azo so kue asara ngonzo na tere ti mo, fade kamene ayeke gbu le ti ala si ala yeke ti buba. Azo so agi tënë na mo, ala yeke kiri ti ngba pepe, ala yeke kui.

¹²Ataa azo so aye ti tiri na mo, mo yeke gi ala, me mo yeke wara ala pepe. Azo so ayeke tiri bira na mo, ala yeke ngba ye oko pepe, ala yeke senge ye.

¹³Biani, mbi *KOTA GBIA, mbi yeke Nzapa ti mo; mbi gbu maboko ti mo ti koli, mbi tene na mo, mbi tene: ‘Sara mbeto pepe, mbi laa mbi yeke mu maboko na mo.’ ”

¹⁴“Jacob, sara mbeto pepe, mo so mo yeke tongana ngusu, Israel, mo so mo yeke tongana makongo. Mbi yeke ga ti mu na mo maboko, so tënë ti yanga ti *KOTA GBIA laa. Mbi laa mbi yeke zi mo, mbi Nzapa ti Israel so mbi yeke nde si mbi yeke nzoni kue.

¹⁵Baa, mbi yeke sara titene mo ga tongana fini wen so apondi ayeke na le ni si aza mingi. Fade mo yeke nika ahoto, mo yeke sara si ala ga fuku ti sese; mo yeke sara si akete hoto aga tongana poro ti le ti kobe.

¹⁶Mo yeke pe ya ti ala si pupu ayeke mu ala ti hon na ala; kota pupu ayeke kangbi ya ti ala kirikiri. Me ti mo, mo yeke dodo na ngia ndali ti KOTA GBIA, mo yeke pika kate ti mo ndali ti Nzapa ti Israel, lo so lo yeke nde si lo yeke nzoni kue.”

¹⁷Azo ti mawa na awayere ayeke gi ngu, me ala wara ni pepe. Nzara ti ngu ahole menga ti ala. Me mbi *KOTA GBIA, mbi yeke kiri tënë na ala; mbi Nzapa ti Israel, mbi yeke zia ala pepe.

¹⁸Ndö ti ahoto so keke ayeke daa pepe, mbi yeke sara titene *bale asigigi daa; ndo so ayeke na popo-hoto, mbi yeke sara titene ngu asigigi daa. Mbi yeke sara titene holengo sese aga ndo so kota ngu ayeke daa si kuru sese aga li ti ngu.

¹⁹Na benyama, fade mbi yeke lu mara ti akeke nde nde, akota ni na akete ni. Ando so ngu ayeke daa pepe, mbi yeke lu na ndo oko mara ti akeke nde nde.

²⁰Tongaso, fade azo kue ayeke baa, azo kue ayeke hinga, ala kue ayeke ma ya ni atene, aye so kue, maboko ti KOTA GBIA laa asara ni, Nzapa ti Israel so ayeke nde si ayeke nzoni kue.

²¹*KOTA GBIA, Gbia ti Jacob atene: “Ala anzapa ti amara nde, ala ga afa nda ti tënë ti ala! Ala fa ye so ala sara awe, e baa!

²²Ala ga, ala tene na e ye so ayeke si ande. Ye so ahon awe, ala fa na e, ye ni ayeke lani tongana nyen? Fade e yeke gbu li ti e daa si e yeke baa ye so ayeke si na pekoni. Wala ala fa na e ye ti kekereke si e hinga ye so ayeke si ande.

²³Ala fa na e ye so ayeke si gbanda si e hinga, e tene, ala yeke taa anzapa. Ala sara gi mbeni ye ti nzoni wala ti sioni, tongaso si e baa ni si fade e ne ala!

²⁴Me ala yeke ye oko pepe, ye so kue ala yeke sara ayeke taa senge senge. Zo so asoro ala tongana anzapa, lo yeke fungo zo tongana anzapa ni.

²⁵Na mbage ti Banga kâ, mbi soro mbeni zo, mbi zia lo na lege si lo yeke ga. Na mbage ti To, mbi iri lo na iri ti lo; lo yeke do azo ti komandema na gere tongana ti so zo ayeke do potopoto, tongana ti so wasarango-ta ayeke do ya ti sese ti sarango na ta.

²⁶Zo wa laa afa tënë ni na tongo nda ni titene e hinga ni, zo wa? Zo wa laa afa tënë ni giriri si e tene: ‘Tënë ni ayeke taa-tënë’? Zo oko afa tënë ni pepe, zo oko azi yanga pepe, zo oko ama nga tënë ti ala pepe.

²⁷Mbi KOTA GBIA laa mbi yeke kozoni, mbi fa na *Sion, mbi tene: ‘Baa aye ni laa!’ Mbi tokua na Jérusalem mbeni zo ti gango na nzoni tënë.

²⁸Mbi baa ndo, me zo oko ayeke daa pepe. Na popo ti anzapa ni, mbeni oko ti mu wango ayeke daa pepe! Tongana ala yeke fade daa si mbi hunda ala, ka ala kiri tënë na mbi.

²⁹Ala kue ayeke ye oko pepe: kua ti ala ayeke senge senge, ayanda ti ala ayeke pupu senge, ye ayeke daa pepe!”