Read sango Ésaïe 43 Bible Online

Ésaïe 43 - sango bible

Ésaïe 43

¹Me fadeso mo Jacob, lo so lo sara mo, mo Israel, lo so lo leke mo, tënë so KOTA GBIA atene ayeke so: “Mo sara mbeto pepe, mbi zi mo awe, mbi iri mo na iri ti mo, mo yeke ti mbi.

²Tongana mo hon na ya ti kota ngu, fade mbi yeke na mo; tongana mo fâ *abale, abale ni ayeke mene mo pepe. Tongana mo hon na ya ti wâ, wâ ni ayeke gbi mo pepe, menga ti wâ ni ayeke ndu mo pepe.

³Biani, mbi KOTA GBIA, mbi yeke Nzapa ti mo, Nzapa ti Israel so ayeke nde si ayeke nzoni kue, mbi yeke wasongo ala. Mbi mu Ezipte ti ga ye ti vongo na mo, mbi mu Etiopii na Seba ti sanze na mo.

⁴Mbi sara tongaso, ngbanga ti so na le ti mbi, ngere ti mo ayeke ngangu, mo ne na le ti mbi si mbi ye mo. Tongaso, mbi mu azo na plase ti mo, mbi mu amara ti sanze na mo.

⁵Mo sara mbeto pepe, ngbanga ti so mbi yeke na mo. Kâ na mbage ti To, mbi yeke sara titene *ahale ti mo akiri; kâ na mbage ti Do, mbi yeke bongbi azo ti mo na ndo oko.

⁶Fade mbi yeke tene na Banga: ‘Kiri na ala’, mbi yeke tene na Mbongo: ‘Gbanzi ala pepe.’ Amolenge ti mbi ti koli so ayeke na yongoro ndo, mo kiri na ala; amolenge ti mbi ti wali so ayeke na nda ti sese kâ, mo kiri na ala.

⁷Mo kiri na azo so kue iri ti mbi ayeke na ndö ti ala, ala so mbi sara ala, so mbi leke ala si mbi sara ala titene ala gonda mbi.”

⁸Azo so le ti ala ayeke daa, me ala yeke baa ndo pepe so, azo so mê ti ala ayeke daa, me ala ma ndo pepe so, ala sigigi na ala.

⁹Ayeke nzoni amara kue abongbi, ayeke nzoni amara abongbi tere! Na popo ti ala, zo wa laa alingbi ti fa na e ye so ayeke si ande, zo wa? Zo wa laa alingbi ti tene tënë ti ye so asi awe, zo wa? Ayeke nzoni ala fa azo so ayeke fade na tere ti aye ni, ala fa atene, tënë ti ala ayeke na legeni! Ayeke nzoni azo so ayeke na tere ti aye ni ayeda, atene: “Ye ni ayeke taa-tënë!”

¹⁰Ala laa ayeke azo ti tenengo tënë ti ye so ala hinga na ndö ti mbi, so tënë ti yanga ti *KOTA GBIA laa; ala laa ayeke azo ti kua ti mbi so mbi soro ala. Mbi ye titene ala hinga mbi, ala zia be ti ala na ndö ti mbi si ala hinga biani so mbi yeke Nzapa. Kozo ti mbi, mbeni nzapa oko ayeke daa pepe, na peko ti mbi, mbeni nzapa oko ayeke duti daa pepe.

¹¹Mbi laa mbi yeke KOTA GBIA, gi mbi oko. Mbeni wasongo-zo nde ayeke daa pepe, gi mbi oko.

¹²Mbi laa mbi soo azo na kuâ, mbi laa mbi fa tënë ni, mbi sara si ala hinga tënë ni. Na ndo ti ala, a yeke wara mbeni nzapa nde pepe, gi mbi oko. Ala laa ayeke azo ti tenengo tënë ti ye so ala hinga na ndö ti mbi atene, mbi yeke Nzapa, so tënë ti yanga ti KOTA GBIA laa.

¹³Ngbene ye na lango ni so, mbi yeke Nzapa, zo oko alingbi ti gboto ye na maboko ti mbi pepe. Ye so mbi yeke sara, zo wa laa alingbi ti buba ni?

¹⁴*KOTA GBIA so azi ala na gbe ti ngbaa, Nzapa ti Israel, lo so lo yeke nde si lo yeke nzoni kue, baa, tënë so lo tene ayeke so: “Ndali ti ala, mbi tokua mbeni zo ti tiri bira na Babilone. Fade mbi yeke kinda ala si ala kue aga tongana azo so ayeke kpe. Tongaso, fade dekongo ti ngia ti azo ti Babilone ayeke ga bia ti demango tere.

¹⁵Mbi yeke KOTA GBIA, Nzapa ti ala so ayeke nde si ayeke nzoni kue, lo so lo sara Israel, Gbia ti ala.”

¹⁶Ando, *KOTA GBIA asuru lege na ya ti kota ngu-ingo, lo suru lege na popo ti ngu so ayeke sua ngangu ngangu.

¹⁷Lo sara si apusu ti mbarata na ambarata, aturugu nga na angangu zo ti bira amu lege ti gue na bira. Ala ti, ala kiri alondo pepe, ala mingo si ala ga tongana meshe ti lamba so agbi kue.

¹⁸Tënë so KOTA GBIA atene ayeke so: “Ye so asi kozoni awe so, ala kiri adabe ti ala na ni pepe, ye so ayeke ti ngoi ti giriri, ala girisa ni.

¹⁹Baa, mbi yeke sara mbeni fini ye, fini ye ni aga nduru ti si awe; ade ala baa ni pepe? Biani, mbi yeke suru lege na ya ti benyama, mbi yeke sara titene *abale asua na ndo so ahole holengo.

²⁰Fade anyama ti ngonda, *anzagua na *anaamo ayeke gonda mbi, ngbanga ti so mbi sara si ngu asua na ndo so ngu ayeke daa pepe, abale asua na ndo so ahole holengo. Biani, mbi ye ti mu ngu ti nyongo ni na azo ti mbi so mbi soro ala.

²¹Azo so mbi leke ala ndali ti mbi, ala yeke he bia ti sepela na mbi.”

²²*KOTA GBIA atene: “Israel, mbi laa mo iri mbi pepe; me mo Jacob, be ti mo awoko na mbi awe.

²³Ataba ti mo so a yeke gbi ni kue na wâ na *sandaga so, mo ga na ni na mbi pepe, mo mu ni ti gonda na mbi pepe. Mbi gbu mo na ngangu pepe ti ga ngbaa na mungo na mbi asandaga, wala mbi so li ti mo pepe ti zö na mbi dukani.

²⁴Ndali ti mbi laa mo vo pere ti yombo ti kota ngere so pepe, ndali ti mbi laa mo zö mafuta ti anyama ti mo titene ya ti mbi asi na ni pepe. Me na lege ti siokpari ti mo, mo gbu mbi ti ga ngbaa ti mo; mo woko mbi na lege ti asioni ti mo.

²⁵Me mbi, gi mbi oko, mbi wani laa mbi yeke zi siokpari na li ti mo; fade mbi yeke kiri ti dabe ti mbi na sioni ti mo pepe.

²⁶Dabe ti mbi na sioni so mo baa mbi sara si e kue legeoko, e gue na ngbanga! Mo wani, mo fa oko na oko so tënë ti mo ayeke legeni.

²⁷Kozo kotara ti mo asara siokpari awe, azo ti tenengo peko ti tënë ti yanga ti mo atomboka na tere ti mbi.

²⁸Tongaso mbi bi buba na tere ti amakonzi so ayeke sara kua na ndo so a zia ni nde ndali ti mbi, mbi zia Jacob titene a fâ lo, mbi zia Israel na maboko ti awato ti lo titene ala zonga lo.