Read sango Ésaïe 47 Bible Online

Ésaïe 47 - sango bible

Ésaïe 47

¹*KOTA GBIA atene: “Babilone, pendere gbata, mo zu, mo duti na ya ti fuku ti sese; kua ti mo ti gbia-wali ahunzi awe! Gbata ti azo ti Babilone, mo duti taa na sese, ngbanga ti so a yeke kiri ti iri mo pepe: ‘Babilone, wali so maboko ti lo ayeke ndu ye oko pepe’, ‘Babilone, *wali-ndomo’.

²Mo mu atêne ti nikango na ye, mo nika na farini. Mo zi bongo na le ti mo, mo yo yanga ti bongo ti mo na nduzu, mo fa gere ti mo na gigi, mo fâ *abale.

³Fade tere ti mo ayeke ngba senge, azo ayeke baa tere ti mo ti kamene. Sioni so mo sara so, mbi yeke kiri peko ni na mo. Zo oko ti gbanzi mbi ayeke daa pepe.”

⁴Zo ti zingo e, iri ti lo ayeke KOTA GBIA, lo so lo yeke na ndö ti dunia kue; lo yeke Nzapa ti Israel so ayeke nde si ayeke nzoni kue.

⁵Mo gbata ti azo ti Babilone, mo duti, mo kai kpoo, mo honde tere ti mo na ya ti vukongo ndo. Biani, fade a yeke kiri ti iri mo pepe: “Gbia-wali so ayeke na ndö ti akodro-gbia”.

⁶Mbi sara lani ngonzo na tere ti azo ti mbi. Tongaso mbi zia kamene na le ti azo so ayeke ti mbi si mbi zia ala na maboko ti mo. Me mo baa mawa ti ala oko pepe, mo sara si komandema ti mo ane tongana *zuge na ndö ti ambakoro.

⁷Mo tene lani: “Mbi yeke ngba gbia-wali lakue lakue.” Me mo gbu ti li ti mo pepe na ndö ti aye so ayeke si, mo dabe ti mo pepe na ndö ti ye so ayeke si ande.

⁸Fadeso, ma tënë so si! Mo wali so mo ye ngia mingi so, mo so mo duti kpoo si mo tene fade na be ti mo, mo tene: “Mbi so, mbeni zo ti lingbi na mbi ayeke daa pepe, gi mbi awe! Mbi yeke ga ande wali-mua pepe, amolenge ti mbi ayeke kui pepe.”

⁹Baa, fade aye ti mawa use so ayeke si na mo: gi hio tongaso, na ya ti lango oko, amolenge ti mo ayeke kui, mo yeke ga nga wali-mua. Ataa gba ti azo ti mo ti yoro, ataa ngangu ti azo ti mazi ti mo, fade aye so kue ayeke si na mo.

¹⁰Mo zia be ti mo na ndö ti asioni sarango ye ti mo, mo tene: “Zo oko abaa mbi pepe.” Me sioni ndara ti mo na sioni hingango ndo ti mo laa ahanda mo. Mo tene na be ti mo, mo tene: “Mbi so, mbeni zo ti lingbi na mbi ayeke daa pepe, gi mbi awe!”

¹¹Baa, fade mbeni ye ti mawa ayeke ti na ndö ti mo, mo yeke hinga lege so mo yeke sigigi na ya ni pepe. Baa, mbeni kpale ayeke ti na ndö ti mo, mo yeke hinga lege ti bata tere ti mo daa pepe. Mbeni ngangu pupu ayeke ga na ndö ti mo biaku, mo yeke hinga li ti mo na ni pepe.

¹²Tongaso, mo ngba ti sara yoro ti mo nga na aye ti mazi ti mo ma! Mo to nda ti sarango aye ni so ngbene ye so mo de maseka. E hinga pepe, mo lingbi ti wara ye na peko ni, e hinga pepe, mo lingbi ti zia mbeto na be ti azo!

¹³Mo woko awe na bango azo ti gingo nda ti atongoro! Ala yeke baa le ti nduzu si nze na nze ala yeke fa ye so alingbi ti si na mo. Ayeke nzoni ala ga, ala soo mo!

¹⁴Ala yeke tongana pere, fade wâ ayeke gbi ala kue. Ala lingbi ti zi tere ti ala na ya ti menga ti wâ ni pepe. Wâ ni so ayeke ale ti wâ so e yeke to na kobe pepe, wala wâ so zo ayeke duti na tere ni titene tere ti lo amu wâ pepe.

¹⁵Baa ye so ayeke si ande na azo so mo baa pasi senge senge ti bango ala ngbene ye so mo de maseka. Fade ala yeke hon kirikiri, zo oko oko na lege ti lo; zo oko ti soo mo ayeke daa pepe.