Read sango Ésaïe 5 Bible Online

Ésaïe 5 - sango bible

Ésaïe 5

¹Mbi ye ti he bia ndali ti mba ti mbi; bia ni atene tënë ti mba ti mbi so mbi ye lo mingi nga na yaka ti *vinye ti lo. Mba ti mbi so mbi ye lo mingi so, yaka ti vinye ti lo ayeke daa. Yaka ni ayeke na ndö ti mbeni hoto; sese ni awoko pendere.

²Lo de ya ti sese, lo zi atêne na ya ni, lo lu pendere keke ti vinye daa. Lo sara da so ayo na nduzu taa na be ti yaka ni. Lo zi du ti petengo na ale ti vinye daa. Lo yeke ku fade anzoni lengo ni, me yaka ni ale gi afungo ni.

³Mba ti mbi ni atene: “Fadeso, ala azo ti Jérusalem, na ala azo ti Juda, ala fâ ngbanga na popo ti mbi na yaka ti vinye ti mbi.

⁴Yaka ti vinye ti mbi ni, nyen laa mbi yeke kiri ti sara ahon ye so mbi sara na lo awe so? Mbi ku fade anzoni lengo ni; ngbanga ti nyen si lo le afungo ni so-oo?

⁵Fadeso, mbi yeke fa na ala ye so mbi yeke sara na yaka ti vinye ti mbi ni: Mbi yeke zi gbagba so ayeke na tere ni si anyama aga ate akeke ti yaka ni kirikiri. Mbi yeke kungbi gbagba ni na sese si azo aga ado akeke ti vinye ni.

⁶Fade mbi yeke zia yaka ni aga ngonda; zo ti fango *aguruma ni ayeke daa pepe, zo ti sukulango gbe ni ayeke daa pepe; aki na asioni kamba ti aki ayeke suku amu ndö ni kue. Fade mbi yeke mu yanga na ambinda ti gbanzi ngu ti pika na ndö ti yaka ni.”

⁷Andaa yaka ti vinye ti *KOTA GBIA, lo so lo yeke na ndö ti dunia kue, ayeke azo ti Israel. Azo ti mara ti Juda laa ayeke ye so lo lu si lo ye ni mingi. Lo ku fade titene azo ni afâ ngbanga na legeni, me ala fâ ngbanga ti mbana kirikiri. Lo ku fade titene azo ni asara ye alingbi na ndia, me gi dekongo ti azo ti mawa laa mo yeke ma.

⁸Mawa na ala, azo so amu mbeni da ti tengbi na da ti ala, ala mu mbeni yaka ti tengbi na yaka ti ala! Ala sara tongaso ngbii, ala mu sese ni kue si ala duti gi ala oko na ya ti kodro ni.

⁹Mbi ma na mê ti mbi *KOTA GBIA so ayeke na ndö ti dunia kue adeba, atene: “Biani, fade gba ti apendere kota da so ayeke tuku kue na sese; azo ayeke lango na ya ni pepe.

¹⁰Tongana ala fâ kota yaka ti vinye so akono hektare ota, fade ala yeke wara gi litere baleoku ti vin; tongana ala lu kilo ngbangbo oko ti ble, fade ala yeke wara gi kilo baleoko.”

¹¹Mawa na ala, azo so alondo na kota ndaperere ti mu loro na peko ti angangu samba! Ti londo na ndaperere ngbii asi na lakui, samba ni angba ti sara ala.

¹²Na ya ti matanga ti ala, ala yeke pika kundi na kete kundi, ala yeke pika ngo, ala yeke huru *ngoli. Me ala yeke baa ndo pepe na ye so KOTA GBIA asara, ala yeke baa kua so lo sara pepe.

¹³Ndani laa KOTA GBIA atene: “Fade a yeke gbu azo ti mbi ti gue na ala na kodro wande, ngbanga ti so ala hinga ndo pepe. Akota zo ayeke kui nzara si asenge zo ayeke kui nzara ti ngu.”

¹⁴Tongaso, fade ndo ti akuâ ayeke zi yanga ti lo kota, lo yeke zi ni akono ahon ndoni. Akota zo ti kodro na asenge zo ti gbata ni ayeke li na ya ni, ala na aye ti wusuwusu ti ala, na ngia ti ala kue.

¹⁵Azo kue ayeke ba li ti ala na sese, azo ayeke kiri na kete ndo; kamene ayeke gbu le ti azo ti baba.

¹⁶KOTA GBIA so ayeke na ndö ti dunia kue, a yeke ya iri ti lo na lege ti fango ngbanga ti lo; Nzapa so ayeke nde si ayeke nzoni kue, lo yeke fa so lo yeke nde si lo yeke nzoni kue na lege ti mbirimbiri ti lo.

¹⁷Fade ataba ayeke te pere na ya ti gbata so abuba kue so tongana ndo ti tengo pere ti ala; angasa so akono nzoni ayeke te pere na ndo ni so.

¹⁸Mawa na ala, azo so ayeke gboto siokpari na peko ti ala na kamba ti mvene! Ala yeke gboto sioni ti ala tongana ti so a yeke gboto pusu ti mbarata.

¹⁹Ala yeke tene: “Ye so KOTA GBIA aye ti sara so, ayeke nzoni lo sara ni hio e baa ma! Pialo so Nzapa ti Israel so ayeke nde si ayeke nzoni kue aye ti sara so, ayeke nzoni lo sara ni si e hinga tënë ni ma!”

²⁰Mawa na ala, azo so abaa ye ti sioni si ala tene ye ti nzoni laa! Ala baa ye ti nzoni si ala tene ye ti sioni laa. Ala mu vukongo ndo tongana vurungo ndo, ala mu vurungo ndo tongana vukongo ndo. Ala mu ye so asee sengo, tongana ye so anzere, ala mu ye so anzere nzerengo tongana ye so asee.

²¹Mawa na ala, azo so abaa tere ti ala tongana azo ti ndara, azo so abaa tere ti ala tongana azo ti hingango ndo!

²²Mawa na ala, azo so amu ngangu ti ala kue gi ti nyongo samba, ala so akpengba gi ti bongbi mara ti asamba nde nde ti nyon!

²³Tongana a pete goro na ala, ala yeke zi zo so tënë ayeke na li ti lo, zo so tënë ayeke na li ti lo pepe, ala yeke ke titene a fâ ngbanga ti lo na legeni.

²⁴Ndani laa, fade ala yeke ga tongana pere so wâ agbi ni, ala yeke ga tongana holengo pere so menga ti wâ agbi ni kue. Ala yeke duti tongana pere so gunda ni afun na ya ti sese, tongana kongo so pupu ahon na ni tongana fuku ti sese. Biani, ye so KOTA GBIA so ayeke na ndö ti dunia kue afa, ala ke ni; tënë ti Nzapa ti Israel, lo so lo yeke nde si lo yeke nzoni kue, ala baa ni tongana mbumbuse ye.

²⁵Ndani laa ngonzo ti *KOTA GBIA alondo tongana wâ na tere ti azo ti lo. Lo yo maboko ti lo na nduzu ti pika ala. Ahoto ayingi, kuâ ti azo ni alango na ndö ti lege tongana zende. Ataa so kue, ngonzo ti KOTA GBIA akai pepe, maboko ti lo angba gi na nduzu.

²⁶KOTA GBIA ayo bendere na nduzu ndali ti amara so alango yongoro lo huru yanga ti lo na ala si ala londo na nda ti sese kâ aga. Baa, ala mu loro si ala si hio.

²⁷Mbeni zo na popo ti ala awoko pepe, mbeni zo apika gere ti lo pepe titene lo ti, lango asara mbeni zo oko pepe, zo oko alango nga pepe, kamba ti ndö ti bongo ti mbeni zo oko azi pepe si kamba ti poro ti mbeni zo oko afâ nga pepe.

²⁸Ala leke yanga ti ale ti kokora ti ala aza, ala gboto ya ti kamba ti kokora ti ala. Asokoto ti gere ti ambarata ti ala akpengba tongana têne, gere ti apusu ti ambarata ti ala ayeke turne wirrr tongana ngangu pupu.

²⁹Toto ti aturugu ti ala ayeke tongana ti mama ti bamara, toto ti ala ayeke tongana ti akete bamara, ala gbu nyama si ala yeke dekongo; ala yeke gue na nyama ni si mbeni zo alingbi ti gboto ni na maboko ti ala pepe.

³⁰Me na lango ni so, mbeni toto ayeke londo ti ga na tere ti ala tongana toto ti kota ngu-ingo. Tongana zo abaa ndo na ndö ti sese, fade lo yeke baa gi vukongo ndo na ye ti ngangu; angbongboro mbinda ayeke kanga sungo ti lâ.