Read sango Ésaïe 50 Bible Online

Ésaïe 50 - sango bible

Ésaïe 50

¹Tënë so *KOTA GBIA atene ayeke so: “Ala tene: mbi tumba Jérusalem, mama ti ala. Me mbeti ti kangbingo tere ni ayeke na ndo wa? Ala fa ni na mbi! Ala tene nga: mbi ka ala na ngbaa ti futa boon na li ti mbi; zo wa laa mbi ka ala na lo, zo wa? Tongana a ka ala, ayeke ndali ti sioni ti ala; tongana a tumba mama ti ala, ayeke ndali ti ngangu li ti ala.

²Mbi ga, mbi wara zo oko pepe, ngbanga ti nyen? Mbi iri ndo, zo oko ayeda pepe, ngbanga ti nyen? Maboko ti mbi ayeke nduru mingi titene mbi zi ala? Ngangu laa atia mbi titene mbi soo ala? Gi so mbi suku, kota ngu-ingo ahole; mbi sara si *abale aga kuru sese. Ndali ti so ngu ayeke daa pepe, asusu ayeke kui nzara ti ngu si ala yeke fun.

³Mbi yu yayu na vukongo ndo, mbi yu na lo bongo ti mua.”

⁴Kota Gbia NZAPA afa na mbi tënë so mbi lingbi ti tene, titene mbi hinga lege ti mu ngangu na zo so awoko. Lakue na ndaperere, lo yeke zingo mbi, lo yeke zi mê ti mbi titene mbi ma ndo tongana adisiple.

⁵Kota Gbia NZAPA azi mê ti mbi, mbi sara ngangu li pepe, mbi kiri na peko pepe.

⁶Mbi zia peko ti mbi na azo so ayeke pika mbi, mbi yoro ngbangba ti mbi na azo so ayeke gboto kua ti yanga ti mbi. Azo so ayeke zonga mbi si ala yeke tuku ngu ti yanga na le ti mbi, mbi honde le ti mbi na ala pepe.

⁷Kota Gbia NZAPA laa ayeke mu na mbi maboko, ndani laa zongango ndo ti ala asara ye oko na mbi pepe. Mbi sara si ndö ti le ti mbi akpengba tongana têne. Mbi hinga, mbi tene, fade kamene ayeke sara mbi pepe.

⁸*KOTA GBIA ayeke nduru na mbi, lo so lo yeke sara si mbi ga mbirimbiri. Zo wa laa aye ti bi tënë na li ti mbi, zo wa? Ayeke nzoni mbi na lo, e gue na ngbanga! Zo wa laa aye ti ga wato ti mbi na le ngbanga, zo wa? Ayeke nzoni lo ga na dawa ti mbi!

⁹Kota Gbia NZAPA laa ayeke mu na mbi maboko. Zo wa laa alingbi ti fâ ngbanga na li ti mbi? Biani, fade awato ti mbi ayeke buba kue tongana gbagba bongo so akangi ate ni kue.

¹⁰Mbeni zo ti kpengo mbeto ti *KOTA GBIA ayeke na popo ti ala? Alingbi lo ma yanga ti zo ti kua ti lo. Tongana mbeni zo ayeke tambula na ya ti vukongo ndo si lumiere oko ayeke daa pepe, alingbi lo zia be ti lo na ndö ti KOTA GBIA wani, lo luti na ndö ti Nzapa ti lo.

¹¹Me ti ala so kue ayeke tingo wâ, ala so agbu ale ti kokora so wâ ayeke na yanga ni, ala gue na ya ti menga ti wâ ti ala ni nga na popo ti ale ti kokora so ala tingo wâ daa so. Ye so KOTA GBIA aleke ti ku na ala laa; ala yeke kui na ya ti kota pasi.