Read sango Ésaïe 55 Bible Online

Ésaïe 55 - sango bible

Ésaïe 55

¹Ala so kue nzara ti ngu asara ala, baa ngu laa, ala ga! Ataa ala yeke na nginza pepe, ala ga! Ala mu kobe, ala te; ala mu vin, ala mu ngu ti me ti bagara senge senge, ala yeke vo ni vongo pepe.

²Ndani nyen si ala yeke buba nginza ndali ti ye so ayeke kobe pepe so? Ndani nyen si ala yeke baa pasi ndali ti ye so ayeke si ya ti zo pepe so? Ala ma mbi nzoni, fade ala yeke duti na nzoni kobe ti tengo ni, ala yeke te anzerengo kobe.

³Ala dingi mê ti ala, ala ma mbi, ala ga na mbi. Ala ma mbi si fade ala yeke duti na fini. *KOTA GBIA atene: “Mbi na ala, e yeke sara *mbuki so ayeke ngba lakue lakue; mbi yeke mu na ala anzoni ye so mbi mu zendo ni na David.

⁴Mbi zia lo na tere ti amara tongana zo so ahinga ngangu ti mbi; mbi zia lo makonzi nga na zo so ayeke na komandema na ndö ti amara.

⁵Mo Israel, fade mo yeke iri mara so mo hinga ni pepe; mara so ahinga mo pepe ayeke mu loro ti ga na mbage ti mo. Lo yeke ga ndali ti mbi KOTA GBIA, Nzapa ti mo, Nzapa ti Israel so ayeke nde si ayeke nzoni kue, lo so lo sara si mo wara gonda.”

⁶Ala gi *KOTA GBIA na ndembe so ala lingbi ti wara lo. Ala iri lo na ndembe so lo yeke nduru na ala.

⁷Alingbi zo ti sioni azia lege ti sioni ti lo; zo ti sarango sioni azia asioni tënë ti be ti lo. Ayeke nzoni ala kiri na KOTA GBIA si fade lo baa mawa ti ala. Ayeke nzoni lo kiri na Nzapa ti e si lo zi tënë na li ti ala biani biani.

⁸“Biani, tënë ti be ti mbi alingbi na tënë ti be ti ala pepe, lege ti sarango ye ti mbi alingbi na lege ti sarango ye ti ala pepe; so tënë ti yanga ti KOTA GBIA laa.

⁹Tongana ti so le ti nduzu ayo mingi na sese, lege ti sarango ye ti mbi ayo legeoko tongaso ahon lege ti sarango ye ti ala, tënë ti be ti mbi ayo legeoko tongaso ahon tënë ti be ti ala.

¹⁰Ngu-Nzapa na *neze alondo na le ti nduzu si ayeke ti na sese. Ala yeke kiri na le ti nduzu senge pepe: ala yeke tuku na ndö ti sese, ala yeke sara si sese ni awoko pendere, ala yeke sara si ale ti kobe asigigi. Lege so zo ti lungo kobe ayeke wara ale ti kobe ti lungo ni na kobe ti tengo ni laa.

¹¹Tënë so ayeke sigigi na yanga ti mbi ayeke legeoko tongaso: tënë ni ayeke kiri na mbi senge pepe, tënë ni ayeke sara ye so mbi ye, tënë ni ayeke sara kua so mbi tokua lo ti sara.”

¹²Fade ala yeke londo na Babilone na ngia, a yeke kiri na ndo ti ala na siriri. Na hongo ti ala, ahoto na akete hoto ayeke dekongo na ngia, akeke kue ti ngonda ayeke pika sako.

¹³Keke ti sipre ayeke sigigi na plase ti keke ti ki, mirte ayeke sigigi na plase ti ki. Ye so ayeke si titene azo agonda KOTA GBIA. Ye so ayeke buba laoko pepe, ayeke ngba lakue lakue ti dabe ti ala na ye so mbi sara.