Read sango Ésaïe 56 Bible Online

Ésaïe 56 - sango bible

Ésaïe 56

¹Tënë so *KOTA GBIA atene ayeke so: “Ala bata ndia, ala sara ye so ayeke mbirimbiri, ngbanga ti so mbi ga nduru ti soo ala awe, ala ga nduru ti baa mbirimbiri ti mbi awe.

²Ti lo nzoni, zo so asara ye alingbi na tënë so mbi tene, zo so agbu tënë ni ngangu, zo so asara ye alingbi na *lango ti wungo tere, lo sara si lango ni aga sioni pepe si lo kpe lege ti sarango sioni ye.”

³Wande so amu tere ti lo na KOTA GBIA, alingbi lo tene na be ti lo pepe, lo tene: “KOTA GBIA ayeke zi mbi na popo ti azo ti lo.” Alingbi *mbaiwa atene nga pepe, atene: “Mbi yeke ti mbi holengo keke.”

⁴Biani, tënë so KOTA GBIA atene ayeke so: “Ambaiwa so ayeke sara ye alingbi na lango ti wungo tere, ala so asoro ti sara ye so anzere na be ti mbi, ala so agbu tënë ti *mbuki ti mbi ngangu,

⁵fade mbi yeke mu na ala mbeni ndo na ya ti kota da ti mbi, mbi yeke zia mbeni têne na tere ti dere ti da ni titene ala su iri ti ala na ndö ni; so ayeke duti nzoni ahon amolenge-koli na amolenge-wali. Iri so mbi yeke mu na ala ayeke ngba lakue lakue, mbeni ye ayeke zi ni oko pepe.”

⁶Ti awande so amu tere ti ala na KOTA GBIA ti sara kua na lo, ti ye lo, ti ga azo ti kua ti lo, KOTA GBIA atene: “Ala so kue abata lango ti wungo tere, ala sara si lango ni aga sioni pepe, ala so agbu tënë ti mbuki ti mbi ngangu,

⁷fade mbi yeke sara si ala ga na ndö ti hoto ti mbi so ayeke nde si ayeke nzoni kue. Mbi yeke sara si be ti ala asi singo na ngia na ya ti da so a yeke sambela mbi daa. Asandaga so a yeke gbi ni kue na wâ nga na asandaga nde nde so ala yeke ya na mbi na ndö ti gbalaka, mbi yeke yamba ni. Biani, fade azo ayeke iri da ti mbi, ‘Da ti sambela ti amara kue.’ ”

⁸Kota Gbia NZAPA so abongbi azo ti Israel so a gbu ala ando a gue na ala na kodro wande, tënë so lo tene ayeke so: “Mbi bongbi azo na tere ti ala awe, mbi yeke kiri ti bongbi ambeni zo na tere ti ala.”

⁹Ala anyama kue ti ngonda, ala anyama kue ti gbako, ala ga ate ye!

¹⁰Asanziri ti Israel kue ayeke awaziba, ala hinga ye oko pepe. Ala yeke ambo so ayeke buburu, ala lingbi ti dekongo pepe. Ala yeke lango na sese, ala yeke baa li ti ala; ala ye gi ti lango.

¹¹Ala yeke nga ambo so ayeke gbongo ti kobe, ya ti ala ayeke si ka laoko pepe. Andaa ala laa ayeke azo ti batango azo ti mbi, me ala hinga nda ti ye oko pepe; ala kue ayeke sara gi ye so anzere na be ti ala, zo oko oko ayeke gi gi nzoni ti lo wani.

¹²Ala tene: “Ala ga, e gue, e gi vin, e nyon ngangu samba alingbi na e. Kekereke, e yeke kiri ti sara gi tongaso: samba angba mingi.”