Read sango Ésaïe 57 Bible Online

Ésaïe 57 - sango bible

Ésaïe 57

¹Azo ti mbirimbiri akui, tënë ti kuâ ti ala aso be ti zo oko pepe; azo ti sarango nzoni ati akui, zo oko ti gbu li ti lo daa ayeke daa pepe. Biani, azo ti mbirimbiri ati akui ndali ti sioni ti azo ti sioni.

²Me fade siriri ayeke kiri ti ga si azo so ayeke sara ye na legeni ayeke lango na ndö ti gbogbo ti ala kpoo.

³Ala ga nduru, ala so mama ti ala ayeke zo ti gingo nda ti aye, ala azo ti gingo wali ti amba ti ala, ala azo ti sarango ye ti ndumba so!

⁴Zo wa laa ala yeke he lo so, zo wa? Zo wa laa ala zi yanga ti ala kota na tere ti lo, zo wa? Zo wa laa ala sigigi na menga ti ala na lo, zo wa? Ala yeke amolenge ti ngangu li pepe? Ala yeke azo ti mara ti tenengo mvene pepe?

⁵Nzara ti tere ti ala ayeke gbi ala tongana wâ nduru na tere ti akota keke, na gbe ti afini keke so kue kugbe ni ayeke gbani gbani. Ala yeke fâ amolenge ti mu na *sandaga na tere ti ngu nga na popo ti atêne so asuru.

⁶Israel, atêne so tere ni aga pendere ndali ti ngu so ayeke sua na tere ni, atêne ni laa aga ye ti mo, ni laa aga ye so a mu na mo! Mo yeke mu sandaga ti samba na ala, mo yeke ya nga asandaga na ala. *KOTA GBIA ahunda ndo, atene: “Aye tongaso alingbi ti de be ti mbi?”

⁷Mo leke gbogbo ti mo na ndö ti akota hoto so ayo na nduzu. Kâ laa mo gue ti ya asandaga.

⁸Na peko ti yanga ti da nga na tere ti kadere ni, mo kanga ye ti dango be ti mo. Mo honde tere ti mo na le ti mbi, mo zi bongo na tere ti mo, mo gue na ndö ti gbogbo ti mo, mo sara si gbogbo ni akono. Mo na andeko ti mo aleke tënë na popo ti ala, ala so mo ye ti lango na ala si mo yeke baa ye ni!

⁹Mo mu mafuta, mo gue na ni na kota gbia, mo gue na mara ti ayombo nde nde. Mo tokua azo ti mo yongoro kâ, ala zu ngbii, ala si na ndo ti akuâ.

¹⁰Mo tambula mingi, ni laa mo woko awe so. Me mo tene pepe, mo tene: “Mbi zia lege ni!” Mo kiri mo wara ngangu, mo ngba ti woko pepe.

¹¹Zo wa laa azia lani mbeto na be ti mo, zo wa laa mo sara mbeto ti lo si mo handa mbi, be ti mo agirisa na mbi so? Mo kiri mo dabe ti mo na mbi pepe so? Aninga mingi mbi zi yanga pepe, ndani laa mo yeke kpe mbeto ti mbi pepe so?

¹²Me mbi yeke sigigi na nda ti mo polele. Aye so mo yeke sara si mo baa mo tene, ayeke nzoni so, mo yeke wara ye ti peko ni oko pepe.

¹³Tongana mo dekongo, ayeke nzoni gba ti ayanda ti mo ni asoo mo ma! Fade pupu ayeke mu ala kue ti hon na ala, pupu ti yanga ayeke hon na ala! Me azo so ayeke kpe na mbi ti bata tere ti ala, fade a yeke mu kodro ni ti ga ti ala, hoto ti mbi so ayeke nde si ayeke nzoni kue ayeke ga ye ti ala.

¹⁴*KOTA GBIA atene: “Ala suru lege, ala sara hio, ala leke lege; ala zi ye so kue ayeke kanga lege na azo ti mbi!”

¹⁵Nzapa so ayeke na nduzu mingi, yongoro kâ, lo so ndo ti lo ayeke kpu na kpu, lo so iri ti lo ayeke nde si ayeke nzoni kue, tënë so lo tene ayeke so: “Mbi Nzapa so mbi yeke nde si mbi yeke nzoni kue, mbi yeke na nduzu mingi. Me mbi yeke na azo so a nika ala awe nga na azo so asara tere ti ala kete. Mbi yeke mu ngangu na be ti azo so asara tere ti ala kete; mbi yeke kiri fini na azo so a nika ala awe.

¹⁶Biani, mbi yeke bi tënë na li ti azo lakue pepe, wala mbi yeke sara ngonzo lakue lakue pepe. Tongaso pepe, azo so kue mbi sara ala, ka ala yeke kui.

¹⁷Ndali ti sioni nzara ti warango ye ti Israel, ngonzo agbu mbi ngangu. Na ya ti ngonzo ti mbi, mbi pika lo, mbi ye ti kiri ti baa lo pepe. Me lo ngba ti sara ngangu li, lo ngba ti sara ye ti be ti lo.

¹⁸Mbi baa lege ti sarango ye ti lo awe, me mbi yeke kai kobela ti lo. Mbi yeke fa lege na lo, mbi yeke sara titene be ti lo ade. Ti azo so ayeke sara mua ti lo,

¹⁹fade mbi yeke zia bia ti sepela na yanga ti ala.” KOTA GBIA atene: “Siriri na zo so ayeke na yongoro ndo, siriri na zo so ayeke nduru! Biani, mbi yeke kai kobela ti azo ti mbi.”

²⁰Me azo ti sioni ayeke tongana kota ngu-ingo so ayeke yingi, so alingbi ti duti kpoo pepe; *amapo ni ayeke mu potopoto nga na sarate asigigi na ni.

²¹Nzapa ti mbi atene: “Siriri ayeke ndali ti azo ti sioni pepe.”