Read sango Ésaïe 59 Bible Online

Ésaïe 59 - sango bible

Ésaïe 59

¹Ala baa atene, maboko ti *KOTA GBIA ayeke nduru ti soo ala? Mê ti lo akanga ti ma ala? Ên-en!

²Sioni ti ala laa akangbi popo ti ala na Nzapa ti ala; siokpari ti ala laa asara si lo bi le ti lo yongoro si lo lingbi ti ma ala pepe.

³Biani, ya ti maboko ti ala asi singo na mene, ali ti maboko ti ala aga sioni ndali ti sioni ti ala; yanga ti ala ayeke tene atënë ti mvene, menga ti ala ayeke diko atënë ti kirikiri.

⁴Tënë so ala gue na ni na le ti ngbanga, ayeke na legeni pepe; ala yeke gbu koko ti azo na lege ti taa-tënë pepe. Ala yeke luti na ndö ti ye so ayeke ye oko pepe, ala yeke tene atënë ti mvene; ala yeke mu ngo ti ye ti sioni si ala yeke du ye ti kirikiri.

⁵Sarango ye ti ala ayeke sioni tongana para ti sioni ngbo: tongana zo ate para ni, lo yeke kui; tongana a fâ ya ni, sioni ngbo laa ayeke sigigi daa. Akamba so ala yeke leke akpa akamba so mbeni tere aleke ti sara na gbanda ti lo; zo alingbi ti sara ni na bongo pepe, wala ti yu ni pepe. Akamba ni ayeke ga gi na kpale. Kua ti ala ayeke ti sara ngangu na zo.

⁷Ala yeke mu loro ti sara sioni, ala yeke kpe ti gue ti tuku mene ti zo so asara sioni pepe. Gbungo-li ti ala ayeke gi ti sara sioni; na ndö ti alege so kue ala yeke hon daa, gi sarango ngangu na zo nga na bubango ye.

⁸Ala hinga lege ti dutingo na siriri pepe; na ndö ti lege so ala hon daa, sarango ye ti mbirimbiri ayeke daa pepe. Ala sara si alege ti ala aba bango, zo so kue atambula na ndö ti lege ni, lo yeke duti na siriri pepe.

⁹Ndani laa Nzapa asara nzoni ye ndali ti e pepe si lo fâ ya ti ngbanga ti e pepe. E zia fade be ti e ti ku lumiere, me e yeke na ya ti vukongo ndo. E yeke ku fade sigingo ti lâ, me e yeke tambula na ya ti vukongo ndo so avuko pitipiti.

¹⁰E yeke tatara ndo si e yeke tambula na tere ti dere ti da tongana azo so le ti ala akanga. E yeke tatara ndo tongana azo so le ti ala ayeke daa pepe. Na kota lâ, e ye ti ti, mo baa mo tene, e yeke tambula na bi. E yeke na seni, me e kpa gi akuâ.

¹¹E kue, e yeke toto tongana *a-urse, e yeke dema tongana *ambipa. E zia fade be ti e ti ku titene Nzapa asara nzoni ye, me ye oko pepe. E yeke ku fade titene Nzapa asoo e, me lo ngba yongoro na e.

¹²Biani *KOTA GBIA, fani mingi, e ke ndia ti mo. Asiokpari ti e abi tënë na li ti e; lakue kengo ndia ti e agbu tere ti e si aga ye oko; e hinga asioni ti e:

¹³e ke ndia ti mo, e bere tënë ti mo, e ke ti mu peko ti mo, Nzapa ti e, e tene gi atënë ti sarango ngangu na zo nga na sarango ngangu li. Ye so e leke na be ti e na ye so e gbu li ti e daa ayeke gi atënë ti mvene.

¹⁴Ndani laa sarango ye na legeni akiri na peko, fango ngbanga ti mbirimbiri ayeke yongoro. Na be ti kodro, tenengo taa-tënë ati na sese, sarango ye na legeni ayeke daa mbeni pepe.

¹⁵Biani, taa-tënë ayeke daa mbeni pepe; tongaso, zo so ake ti sara sioni, azo ayeke nzi aye ti lo kue. *KOTA GBIA abaa aye so kue, aye ni ayeke sioni na le ti lo, fango ngbanga ti mbirimbiri ayeke daa pepe.

¹⁶Lo baa so zo oko ti sara ye ayeke daa pepe; li ti lo akpe, ngbanga ti so zo oko ti mu maboko ayeke daa pepe. Tongaso, maboko ti lo laa asara si lo so benda; mbirimbiri ti lo laa amu ngangu na lo ti sara ye ni.

¹⁷Lo kanga mbirimbiri na tere ti lo tongana kazaka ti wen, lo mu songo zo na kuâ tongana kpoto ti wen, lo mu kiringo na peko ti sioni na zo tongana bongo so lo yu, lo mu ngangu ti lo ti tiringo na bira tongana kota bongo ti de.

¹⁸Lo yeke futa zo oko oko alingbi na aye so zo ni asara. Azo so ake lo, ngonzo ti lo alondo na tere ti ala tongana wâ, awato ti lo, lo yeke kiri peko ti sioni na ala, ataa na azo ti azoa.

¹⁹Tongaso, ti londo na To ngbii asi na Do, fade azo ayeke kpe mbeto ti iri ti KOTA GBIA, azo kue ayeke kpe mbeto ti gonda ti lo. Biani, fade lo yeke ga tongana *bale so asua ngangu si pupu ti KOTA GBIA ayeke pusu ni.

²⁰KOTA GBIA ayeke ga ti zi Jérusalem nga na azo ti Israel so azia lege ti ngangu li ti ala. So tënë ti yanga ti KOTA GBIA laa.

²¹KOTA GBIA atene: “Tënë ti *mbuki so mbi na ala e yeke sara laa: yingo ti mbi ayeke duti na ndö ti ala, mbi yeke zia tënë ti mbi na yanga ti ala; tënë ni ayeke hon yongoro na yanga ti ala pepe, na yanga ti amolenge ti ala pepe, na yanga ti amolenge ti amolenge ti ala pepe, ti londo fadeso ti gue na ni, kpu na kpu. Tënë so mbi KOTA GBIA, mbi tene laa.”