Read sango Ésaïe 9 Bible Online

Ésaïe 9 - sango bible

Ésaïe 9

¹Azo so atambula na ya ti vukongo ndo, ala baa kota lumiere. Azo so aduti na ndo so avuko pitipiti, lumiere aza na ndö ti ala awe.

²*KOTA GBIA, mo sara si azo awara ngia mingi, mo sara si ngia ti ala asi singo. Ala sara ngia na dawa ti mo tongana ti so azo ayeke sara ngia na ngoi ti fango ale ti kobe; ala sara ngia tongana ti so azo ayeke dekongo na ngia na ngoi so azo ayeke kangbi aye so ala gbu na peko ti bira.

³Biani, *zuge so lani ane azo ni, keke so a yeke pika na peko ti ala, nduru keke so makonzi ti kua ti ala ayeke pika na ala, mo fâ ya ni tongana ti so mo sara ando na lango so mo kinda azo ti Madian.

⁴Aporo ti gere kue ti awato so ala yeke do na sese, akota bongo ti de kue so mene amu tere ni, fade a yeke bi na le ti wâ titene wâ agbi ni kue.

⁵Biani, a du na e molenge awe, a mu na e molenge-koli awe. Nzapa azia komandema na maboko ti lo. Fade a yeke di iri ti lo: Zo ti kpene, Wamungo-wango, Nzapa ti ngangu, Babâ ti lakue lakue, Makonzi ti siriri.

⁶Fade lengo-gbia ti lo ayeke mu ndo ti gue na ni, lo yeke mu siriri so ayeke hunzi pepe, lo yeke duti na ndö ti mbata ti gbia David si lo yeke le-gbia na kodro ti lo. Lo yeke sara titene kodro-gbia ni akpengba na lege ti sarango ye so ayeke na legeni nga na lege ti sarango ye ti mbirimbiri, ti to nda ni laso ti gue na ni ngbii kpu na kpu. Ye so KOTA GBIA so ayeke na ndö ti dunia kue ayeke sara na lege ti kota nzara ti be ti lo laa.

⁷*KOTA GBIA atokua mbeni tënë na tere ti azo ti Jacob, tënë ni ati na ndö ti Israel.

⁸Fade azo kue, azo ti kodro-gbia ti Efraim nga na azo ti Samarii, ala kue ayeke hinga tënë ni. Baba ahon ndö ti ala si ala tene:

⁹“Abiriki ti ada atuku awe, fade e yeke kiri ti sara ada ni na têne so a de tere ni dengo. A de akeke ti sikomor na sese awe, fade e yeke kiri ti lu akeke ti sedre na plase ni.”

¹⁰Tongaso KOTA GBIA airi awato ti Resen ti ga na tere ti azo ti Israel; lo pusu azo so ake ala ti ga na tere ti ala:

¹¹Azo ti Sirii na mbage ti To, azo ti Filistii na mbage ti Do. Ala te azo ti Israel tengo. Ataa so kue, ngonzo ti KOTA GBIA akai pepe, maboko ti lo angba gi na nduzu.

¹²KOTA GBIA apika azo ti lo, me ala kiri na mbage ti lo pepe; KOTA GBIA so ayeke na ndö ti dunia kue, ala gi lo pepe.

¹³Tongaso, gi na ya ti lango oko, KOTA GBIA azi na Israel li na damba, maboko ti mburu na pere ti sosongo.

¹⁴*Akangba na akota zo ti kodro, li ni laa; awayanga-nzapa ti mvene, damba ni laa.

¹⁵Azo so afa lege na azo ni so, ala fa na azo ni sioni lege; azo so azo ni afa lege na ala so, ala mu sioni lege.

¹⁶Ndani laa KOTA GBIA ayeke baa mawa ti amaseka ti azo ni so pepe; anyindu ti ala nga na awali-mua ti ala, lo yeke baa mawa ti ala pepe. Biani, ala kue ake Nzapa, ala yeke azo ti sarango sioni; atënë ti yanga ti ala kue gi buba tënë. Ataa so kue, ngonzo ti KOTA GBIA akai pepe, maboko ti lo angba gi na nduzu.

¹⁷Biani, sioni ti azo ni ayeke gbi ye tongana wâ so ayeke gbi aki na akamba ti ki. Wâ ni ati na ya ti gbako si ngbongboro guru ayeke londo ti gue na nduzu.

¹⁸Ndali ti ngonzo ti KOTA GBIA so ayeke na ndö ti dunia kue, wâ agbi kodro ni kue; azo ni aga tongana ye so wâ agbi ni. Zo oko abaa mawa ti mba ti lo pepe.

¹⁹Zo ayeke fâ kasa ti mbage ti maboko ti koli ti te, me nzara ayeke ngba ti sara lo; lo yeke te na mbage ti maboko ti wali, me ya ti lo ayeke si pepe. Zo oko oko ayeke te kasa ti tere ti lo wani.

²⁰Azo ti mara ti Manase ayeke te azo ti mara ti Efraim, azo ti mara ti Efraim ayeke te azo ti mara ti Manase. Amara use so kue abongbi ti ga na tere ti azo ti mara ti Juda. Ataa so kue, ngonzo ti KOTA GBIA akai pepe, maboko ti lo angba gi na nduzu.