Read sango Awayango-sandaga 16 Bible Online

Awayango-sandaga 16 - sango bible

Awayango-sandaga 16

¹Amolenge-koli use ti Aaron akui na ndembe so ala ga nduru na dawa ti KOTA GBIA. Na pekoni, KOTA GBIA atene na Moïse:

²“Mo tene na ita ti mo Aaron, mo tene: Alingbi lo li na ngoi kue pepe na ndo so ayeke nde si ayeke nzoni kue ahon atanga ni si ayeke na peko ti ridoo so; ndo ni ayeke baa le na *ye ti kangango na yanga ti sanduku ti mbuki. Tongana lo li kâ, lo lingbi ti kui na ndembe so mbi yeke ga ande na ya ti mbinda na ndö ti ye ti kangango na yanga ti sanduku ti mbuki ni.

³“Titene Aaron ali na ya ti da so ayeke nde si ayeke nzoni kue, alingbi lo mu aye tongaso: koli-bagara oko ndali ti *sandaga ti zingo siokpari na li ti lo nga na koli-taba oko ndali ti sandaga so ayeke gbi ni kue na wâ.

⁴Alingbi lo yu yongoro bongo so a sara na *len, lo yu kilote so a sara na len, lo kanga kamba ti ndö ti bongo so a sara na len si lo kanga na li ti lo bongo so ayeke tongana kpoto. So ayeke abongo so a zia ni nde ndali ti Nzapa. Alingbi lo sukula ngu kozoni si lo yu ni.

⁵Alingbi bongbi ti azo ti Israel amu na lo akoli-ngasa use ndali ti sandaga ti zingo siokpari na li ti ala; ala mu nga na lo koli-taba oko ndali ti sandaga so a yeke gbi ni kue na wâ.

⁶“Aaron ayeke mu koli-bagara ni na sandaga ndali ti zingo siokpari na li ti lo wani. Lo yeke ya bagara ni na Nzapa ti fa atene, lo zi siokpari na li ti lo wani nga na li ti asewa ti lo.

⁷Na pekoni, lo yeke gue na akoli-ngasa use so na dawa ti KOTA GBIA, na yanga ti da ti bongo so KOTA GBIA na azo ti lo ayeke wara tere daa.

⁸Aaron ayeke bi mbeni ye ti baa na popo ti angasa use so, ngasa wa laa ayeke ti KOTA GBIA, ngasa wa laa ayeke ti Azazel.

⁹Ngasa so ye ni afa atene, lo yeke ti KOTA GBIA, Aaron ayeke mu lo na sandaga ndali ti zingo siokpari.

¹⁰Ti ngasa so ye ni afa atene, lo yeke ti Azazel, Aaron ayeke zia lo na fini le ti lo na dawa ti KOTA GBIA tongana sandaga ti zingo siokpari na li ti ala. Na pekoni, Aaron ayeke tumba ngasa ni na benyama.

¹¹“Aaron ayeke ya koli-bagara ni na sandaga ndali ti siokpari ti lo wani. Lo yeke sara titene a zi siokpari na li ti lo wani nga na li ti asewa ti lo. Na peko ti so lo fâ go ti koli-bagara ni ti mu na sandaga ndali ti zingo siokpari awe,

¹²lo yeke mu kete ta ti zongo na dukani so le ti wâ asi singo na ya ni; le ti wâ ni ayeke na ndö ti gbalaka so ayeke na dawa ti KOTA GBIA; lo yeke mu fuku ti dukani asi ya ti maboko ti lo fani use. Lo yeke gue na aye so kue na peko ti ridoo so akangbi ya ti da ni.

¹³Kâ, na dawa ti KOTA GBIA, lo yeke zia yombo ni na le ti wâ titene guru ni amu ndö ti ye ti kangango na yanga ti sanduku ti mbuki, sanduku so a zia na ya ni atêne so a su atënë ti mbuki na le ni. Tongana lo sara tongaso, fade lo yeke kui pepe.

¹⁴Na li ti maboko ti lo, lo yeke mu mene ti koli-bagara ni, lo fi na tere ti ye ti kangango na yanga ti sanduku ti mbuki ni, na mbage ti To. Na pekoni, lo yeke fi mene ni na dawa ti ye ti kangango na yanga ti sanduku ti mbuki ni fani mbarambara.

¹⁵Koli-ngasa so a ga na lo ndali ti zingo siokpari na li ti azo ni, lo yeke fâ go ti lo, lo mu mene ni ti gue na ni na peko ti ridoo so akangbi ya ti da ni. Gi oko ye so lo sara na mene ti koli-bagara ni, ni laa lo yeke sara na mene ti koli-ngasa ni. Lo yeke fi mene ni na tere ti ye ti kangango na yanga ti sanduku ti mbuki ni nga na dawa ti ye ti kangango na yanga ti sanduku ti mbuki ni.

¹⁶Lo yeke sara titene a zi *sioni na tere ti ndo so ayeke nde si ayeke nzoni kue ahon atanga ni. Biani, ndali ti kengo yanga ti azo ti Israel na sioni sarango ye ti ala laa da ni aga *sioni. Lo yeke sara gi oko ye so na ya ti da ti bongo so KOTA GBIA na azo ti lo ayeke wara tere daa, ngbanga ti so da ni ayeke na popo ti azo so aga *sioni awe.

¹⁷Na ndembe so Aaron ayeke li na ndo so ayeke nde si ayeke nzoni kue ti sara titene a zi siokpari na li ti azo, alingbi zo oko ali na ya ti da ti bongo so KOTA GBIA na azo ti lo ayeke wara tere daa so pepe, ngbii Aaron asigigi si. Aaron ayeke sara titene a zi siokpari na li ti lo wani, na li ti asewa ti lo nga na li ti bongbi ti azo ti Israel kue.

¹⁸Aaron ayeke londo kâ, lo gue na mbage ti gbalaka so ayeke na dawa ti KOTA GBIA; lo yeke sara titene a zi *sioni na tere ti gbalaka ni. Na pekoni, lo yeke mu mene ti koli-bagara ni na ti koli-ngasa ni si lo yeke zia na andangoro ti gbalaka ni.

¹⁹Lo yeke yoro li ti maboko ti lo na ya ti mene ni si lo yeke fi ni na tere ti gbalaka ni fani mbarambara; lo yeke sara tongaso ti zi *sioni na tere ti gbalaka ni si lo yeke zia ni nde ndali ti Nzapa.

²⁰“So Aaron ahunzi ti zi *sioni na tere ti ndo so ayeke nde si ayeke nzoni kue ahon atanga ni, na tere ti da ti bongo so KOTA GBIA na azo ti lo ayeke wara tere daa nga na tere ti gbalaka ni awe, lo yeke ya na KOTA GBIA koli-ngasa so angba na fini ni so.

²¹Aaron ayeke zia maboko ti lo use kue na li ti koli-ngasa ni, lo yeke diko na li ti ngasa ni asioni so kue azo ti Israel asara, ngangu li ti ala kue nga na siokpari ti ala kue si lo yeke zia ni kue na li ti ngasa ni. Na pekoni, lo yeke tokua ngasa ni na benyama si mbeni koli so a soro lo ayeke mu lo ti gue na lo.

²²Tongaso koli-ngasa ni ayeke mu asioni kue ti azo ti Israel na li ti lo si lo hon na ni na ndo so zo ayeke daa pepe. “So a tokua koli-ngasa ni na benyama awe,

²³Aaron akiri na ya ti da ti bongo so KOTA GBIA na azo ti lo ayeke wara tere daa. Abongo so a sara na len si lo yu lani titene lo li na ndo so ayeke nde si ayeke nzoni kue ahon atanga ni so, lo zi ni si lo zia ni kâ.

²⁴Lo yeke sukula ngu na mbeni ndo so ayeke nde si ayeke nzoni kue, lo yeke yu ambeni bongo nde. Lo yeke sigigi si lo yeke ya na KOTA GBIA sandaga so a yeke gbi ni kue na wâ ndali ti lo wani nga ndali ti azo ni kue. Na pekoni, lo yeke sara titene a zi siokpari na li ti lo wani nga na li ti azo ni.

²⁵Lo yeke mu kasa ti mafuta ti anyama so azo aga na ni, lo yeke gbi ni na ndö ti gbalaka ndali ti siokpari ti azo ni.

²⁶“Koli so amu koli-ngasa ni ague na lo na benyama na Azazel, alingbi koli ni asukula abongo ti lo, lo sukula ngu; na pekoni, lo yeke kiri na ya ti bâbâ.

²⁷Koli-bagara na koli-ngasa so ala mu na sandaga ndali ti zingo siokpari na li ti ala, ala so a gue na mene ti ala na ndo so ayeke nde si ayeke nzoni kue ahon atanga ni ti sara titene Nzapa asukula *sioni ti ndo ni, ala sigigi na anyama ni na ya ti bâbâ, ala gbi ala kue na poro ti ala, na kasa ti ala nga na puru ti ala.

²⁸Zo so agbi anyama ni, alingbi lo sukula abongo ti lo, lo sukula ngu; na pekoni, lo yeke kiri na ya ti bâbâ.

²⁹“So ayeke mbeni ndia so ayeke ngba kpu na kpu ndali ti ala: na lango baleoko ti nze mbarambara ni, fade ala yeke ke kobe ti sambela, ala yeke sara kua oko pepe, ataa ala azo ti Israel, ataa awande so aduti na popo ti ala.

³⁰Biani, na lango ni so laa a yeke sara titene a zi siokpari na li ti ala si ala ga *nzoni. Tongaso, ala yeke ga *nzoni na le ti KOTA GBIA.

³¹Lango ni so ayeke *lango ti wungo tere, lango so ala yeke wu tere ti ala si ala yeke ke kobe. Ndia so ayeke ngba kpu na kpu.

³²“Wayango-sandaga so a tuku mafuta na li ti lo si a zia kua ti kota wayango-sandaga na maboko ti lo na peko ti babâ ti lo, lo laa lo yeke sara titene Nzapa azi siokpari na li ti azo. Lo yeke yu abongo so a sara na len, abongo so a zia ni nde ndali ti Nzapa.

³³Lo yeke sara titene Nzapa azi *sioni ti ndo so ayeke nde si ayeke nzoni kue ahon atanga ni; ti zi sioni na tere ti da ti bongo so KOTA GBIA na azo ti lo ayeke wara tere daa nga na tere ti gbalaka. Lo yeke sara nga titene Nzapa azi siokpari na li ti awayango-sandaga nga na bongbi ti azo ti Israel kue.

³⁴“So ayeke mbeni ndia so ayeke ngba kpu na kpu ndali ti ala. Fade ala yeke sara ye alingbi na ni ti zi siokpari kue na li ti azo ti Israel, fani oko na ya ti ngu oko oko.” Aaron asara ye alingbi na yanga so kue KOTA GBIA amu lani na Moïse.